Read Central Bicolano 2 Chronicles 27 Bible Online

2 Chronicles 27 - Central Bicolano bible

2 Chronicles 27

¹Beynte y singko an edad ni Jotam kan siya magin hade, asin dyes y seis na taon siyang naghade sa Jerusalem. An saiyang ina iyo si Jerusa na aki ni Zadok.

²Ginibo niya an matanos sa atubangan nin Kagurangnan siring kan ginibo kan saiyang ama na si Uzzias. Alagad dai siya naggibo kan kasalan na pagtutong nin insenso sa laog kan Templo bakong arog kan saiyang ama. An mga tawo iyo an padagos na nagkasala.

³Ipinatugdok niya an Trangkahan sa Amihan kan Templo asin ipinatrabaho niya an sarong kabtang kan kudal kan syudad sa lugar na inaapod Ofel.

⁴Nagpatindog siya nin mga syudad sa kabubuldan nin Juda asin nagpagibo siya nin mga tore saka mga bantayan duman sa kadlagan.

⁵Nakilaban siya sa hade kan mga Ammonita asin dinaog niya ini. Dangan pinagbotan niya an mga Ammonita na magbayad saiya nin buhis sa laog nin tolong taon. Taon-taon, ini an buhis na hinagad niya: tres mil kwatro syentos na kilo nin plata, sangribong toneladang trigo, asin sangribong toneladang sebada.

⁶Orog na nagin mapangyari si Jotam huli ta maimbod niyang kinuyog an Kagurangnan na saiyang Dios.

⁷An iba pang ginibo ni Jotam, an saiyang mga pakigera saka an saiyang mga palakaw gabos nasusurat sa An Kasaysayan kan mga Hade nin Israel asin nin Juda.

⁸Beynte y singko an edad niya kan siya magin hade, asin dyes y seis na taon siyang naghade sa Jerusalem.

⁹Nagadan si Jotam asin ilinubong sa Syudad ni David; si Ahaz na saiyang aking lalaki iyo an nagsalihid saiya bilang hade.