Read Central Bicolano 2 Chronicles 31 Bible Online

2 Chronicles 31 - Central Bicolano bible

2 Chronicles 31

¹Pakatapos kan pyesta, naglibot an mga Israelita sa mga syudad nin Juda asin pinaralod an mga harigi saka mga simbolo kan diosang si Asera saka rinaot an mga paganong altar asin mga lugar na pagsasambahan sa bilog na Juda, sa Benjamin, sa Efraim asin sa Manases. Pakatapos nagpuruli sinda gabos sa saindang harong.

²Pinaggrupo-grupo giraray ni Hadeng Ezekias an mga padi asin an mga Levita, sosog sa saindang mga katongdan. Kaiba digdi an pagdolot nin mga tinutong na atang asin mga atang para sa katoninongan, an pag-ayon sa gawe nin pagsamba sa Templo dangan an pagtao nin kaomawan saka pasasalamat sa manlaen-laen na kabtang kan Templo.

³Hale sa mga hayop na pagsadiri kan hade, nagtao siya nin mga hayop na tututongon sa aldaw saka sa banggi, sa aldaw nin Sabbath, sa Pyesta nin Bagong Bulan, asin sa iba pang pyesta na hinahagad kan Katogonan nin Kagurangnan.

⁴Pinagbotan man kan hade an mga nag-eerok sa Jerusalem na magdara kan mga dolot na kahirasan kan mga padi saka mga Levita, tanganing idusay ninda an bilog nindang panahon sa pag-otob kan kahagadan kan Katogonan nin Kagurangnan.

⁵Kan makalakop an pagboot, an banwaan nin Israel nagdara nin mga dolot hale sa pinakamarahay na trigo, arak, lana nin oliba, dugos saka iba pang bunga kan kaomahan. Nagtao man sinda nin himoloan kan gabos na pagsadiri ninda.

⁶An gabos na nag-eerok sa mga syudad nin Juda nagdara kan himoloan kan saindang mga baka saka karnero, asin nagdara man sinda nin dakul na mga dolot na idinusay ninda sa Kagurangnan na saindang Dios.

⁷An mga dolot nagpoon pag-abot kan ikatolong bulan, asin orog na nagdakul kan sunod pang apat na bulan.

⁸Kan mahiling kan hade saka kan saiyang mga opisyal an kadakul na dolot, inomaw ninda an Kagurangnan asin an banwaan nin Israel.

⁹Kinaolay kan hade an mga padi saka an mga Levita manongod sa mga dolot,

¹⁰asin sinabihan siya ni Azarias, an Halangkaw na Padi, na gikan sa pamilya ni Zadok, “Poon na magdara nin mga dolot sa Templo an mga tawo, nagkakan kami saka nabasog asin dakul pa an natada. Nagkaigwa kami kaini huli ta benendisyonan nin Kagurangnan an saiyang banwaan.”

¹¹Dangan sa pagboot kan hade, inandam ninda an mga kwartong sarayan sa Templo.

¹²Maimbod na sinaray ninda duman an mga dolot, an mga himoloan saka an mga bagay na kinonsagra. An opisyal na namahala kaini iyo an Levita na si Conanias, asin an tugang niyang si Simei iyo an saiyang katabang.

¹³Sampolong Levita an nasa irarom kan pamamahala ninda. An mga ini iyo si Jehiel, Azazias, Nahat, Asahel, Jerimot, Jozabad, Eliel, Ismakias, Mahat saka si Benaias. An pagpili sainda ginibo ni Ezekias asin ni Azarias, an Halangkaw na Padi.

¹⁴Si Kore, na aking lalaki kan Levitang si Imna na bantay kan Trangkahan sa Sirangan, iyo an namahala kan pag-ako asin paghiras kan mga boluntad na dolot sa Dios.

¹⁵Sa ibang syudad na pinag-erokan kan mga padi, tinabangan siya sa trabahong ini kan mga Levita na si Eden, Miniamin, Jesua, Semaias, Amarias saka Secanias. Ipinanao ninda an mga kakanon sa kapwa ninda mga Levita, sosog sa katongdan kan mga ini,

¹⁶asin bakong sosog sa saindang mga kamaganakan. Hinirasan ninda an gabos na lalaki, treyntang taon an edad paitaas, na nagtrabaho sa Templo sosog sa saindang mga katongdan.

¹⁷An mga padi tinawan kan saindang mga katongdan sosog sa saindang mga kamaganakan, mantang an mga Levita na beynte an edad paitaas, tinawan nin trabaho sosog sa pagkakagrupo sainda.

¹⁸Kaiba sa lista kan mga padi an saindang mga agom saka mga aki, huli ta kaipuhan andam sinda sa paggibo kan saindang banal na katongdan sa gabos na panahon.

¹⁹Sa grupo nin mga padi na nag-erok sa mga syudad na kahirasan kan mga kapagarakian ni Aaron o sa mga kaomahan na sadiri kan mga syudad na ini, igwa nin malalaoman na mga lalaki na namahala kan paghiras kan kakanon sa gabos na lalaki na kabilang sa pamilya kan mga padi asin sa gabos na Levita na nasa lista.

²⁰Sa bilog na Juda, ginibo ni Hadeng Ezekias an matanos saka an nawiwilihan nin Kagurangnan na saiyang Dios.

²¹Nagin mauswag siya huli ta an gabos na ginibo niya para sa Templo o sa pag-otob kan Katogonan, ginibo niya sa bilog niyang puso.