Read Central Bicolano 2 Chronicles 34 Bible Online

2 Chronicles 34 - Central Bicolano bible

2 Chronicles 34

¹Walong taon an edad ni Josias kan siya magin hade nin Juda, asin treynta y unong taon siyang naghade sa Jerusalem.

²Ginibo niya an matanos sa atubangan nin Kagurangnan asin sinunod niya an paarog kan saiyang ginikanan na si David; maimbod na kinuyog niya an mga togon nin Dios.

³Sa ikawalong taon kan paghahade ni Josias, maski hoben pa siya, nagpoon siyang magsamba sa Dios nin saiyang ginikanan na si David. Pakalihis nin apat na taon, pinonan niyang haleon sa Juda saka sa Jerusalem an paganong mga lugar na pagsasambahan kan mga dios-dios asin an mga tanda kan diosang si Asera pati an inukit saka tinunaw na mga imahen.

⁴Sa pagboot niya, ginaba kan mga tawohan niya an mga altar ni Baal saka an mga altar nin insenso na harani duman. Pinasa niya an mga tanda kan diosang si Asera pati an inukit saka tinunaw na mga imahen. An mga ini rinonot niya siring sa alpog dangan iwinarak sa ibabaw kan mga lulubngan kan mga tawong nagsakripisyo sa mga ini.

⁵An mga tolang kan paganong mga padi tinutong niya sa ibabaw kan mga altar na pinagsambahan ninda. Huli sa paggibo kan gabos na ini, nalinigan niya an Juda saka an Jerusalem.

⁶Siring man an ginibo niya sa mga syudad asin sa mga nagkararaot na lugar nin Manases, Efraim, Simeon asin sagkod sa Neftali na nasa amihan.

⁷Ginaba niya an mga altar asin an mga tanda kan diosang si Asera, rinonot siring sa alpog an ladawan kan mga dios-dios saka rinaot an gabos na altar nin insenso sa bilog na daga nin Israel. Pakatapos, nagbalik siya sa Jerusalem.

⁸Kan ikadyes y otsong taon nin saiyang paghahade, pakatapos na malinigan niya an daga asin an Templo sa paagi kan pag-ontok kan pagsamba sa mga dios-dios, nagsugo si Josias nin tolong lalaki tanganing hirahayon an Templo nin Kagurangnan na saiyang Dios. An mga lalaking ini iyo si Safan na aking lalaki ni Azalias, si Maaseias na gobernador nin Jerusalem saka si Joa na aking lalaki ni Joahaz, na sarong halangkaw na opisyal.

⁹Nagduman sinda ki Hilkias na Halangkaw na Padi saka itinao an kwarta na natipon sa Templo kan mga bantay na Levita. An kwartang ini iyo an nakolekta sa mga banwaan nin Efraim saka Manases asin sa ibang kabtang kan Kahadean sa Amihan, patin sa banwaan nin Juda, Benjamin saka Jerusalem.

¹⁰Dangan an kwartang ini itinao sa tolong lalaki na namamahala kan paghirahay kan Templo, asin itinao man kan mga ini

¹¹sa mga karpintero saka mga kantero tanganing ibakal nin mga gapo saka mga kahoy na kaipuhan sa paghirahay kan mga edipisyo na pinabayaan na magralapa kan mga hade nin Juda.

¹²Maigot na nagtrabaho an mga lalaki. Apat na Levita an namahala sainda; an mga ini iyo si Jahat saka si Obadias kan kamaganakan ni Merari, dangan si Zacarias saka si Mesullam kan kamaganakan ni Kohat. (Gabos may kakayahan sa musika an mga Levita.)

¹³An ibang mga Levita iyo an namahala kan pagdara kan mga kagamitan; an iba namahala kan manlaen-laen na trabaho, mantang an iba naglingkod bilang mga parasaray kan mga lista o bilang mga bantay.

¹⁴Mantang dinadara an kwarta paluwas sa kwartong sarayan, nakua ni Hilkias an libro kan Katogonan nin Kagurangnan na itinao nin Dios ki Moises.

¹⁵Sinabihan ni Hilkias an sekretaryo na si Safan, “Nakua ko sa Templo an libro kan Katogonan.” Itinao niya an libro ki Safan,

¹⁶dangan dinara man kaini sa hade. Nagpahayag si Safan, “Inotob mi an gabos na ipinagboot mo.

¹⁷An kwarta na nasasaray sa Templo kinua mi na dangan itinao sa mga trabahador asin sa mga namamahala sainda.”

¹⁸Dangan nagsabi siya, “Tinawan ako ni Hilkias nin sarong libro.” Makosog niya ining binasa sa hade.

¹⁹Kan madangog kan hade an nasusurat sa libro, ginisi niya an saiyang gubing.

²⁰Dangan pinagbotan niya si Hilkias, si Ahikam na aking lalaki ni Safan, si Abdon na aking lalaki ni Micaias, an sekretaryo na si Safan, asin si Asaias na sorogoon kan hade,

²¹“Magduman kamo dangan makihumapot sa Kagurangnan para sako asin para sa natatada sa mga taga Israel saka Juda, manongod sa mga tataramon na yaon sa librong ini. Anggot sato an Kagurangnan huli ta dai kinuyog kan satong mga ginikanan an mga tataramon nin Kagurangnan, asin dai ginibo an gabos na ipinagboboot kan librong ini.”

²²Si Hilkias asin an mga sinugo kan hade nagduman ki Hulda na sarong babaeng propeta na nag-erok sa bagong kabtang nin Jerusalem. (An agom ni Hulda na si Sallum, na aking lalaki ni Tikva asin makoapo ni Harhas, iyo an namamahala kan mga gubing sa Templo.) Isinaysay ninda ki Hulda an nangyari.

²³Sinabihan sinda ni Hulda na magbalik sa hade dangan itao sa hade

²⁴an mensaheng ini nin Kagurangnan: “An Jerusalem asin an mga nag-eerok digdi papadusahan ko kan gabos na sumpa na nasusurat sa libro na binasa sa atubangan kan hade nin Juda.

²⁵Tinalikodan ninda ako asin nagtutong sinda nin insenso para sa mga dios-dios tanganing paanggoton ako huli kan saindang mga gibo. Kaya maglalaad an kaanggotan ko laban sa Jerusalem, asin dai iyan masisigbo.

²⁶Alagad para sa hade nin Juda, na nagsugo saindo tanganing makihumapot sako, ako, an Kagurangnan, an Dios nin Israel, minataram: Dinangog mo an nasusurat sa libro,

²⁷asin nagsolsol ka saka nagpakumbaba sa atubangan ko. Pakadangog kan plano kong pagpadusa sa Jerusalem asin sa mga nag-eerok digdi. Ginisi mo an saimong gubing saka naghibi sa atubangan ko. Nadangog ko an saimong pamibi,

²⁸kaya an padusa na ipapadara ko sa Jerusalem dai mangyayari mantang buhay ka pa. Tutugotan takang magadan sa katoninongan.” Dangan nagbalik an mga sinugo ki Hadeng Josias dara an mensaheng ini.

²⁹Dangan tinipon ni Hadeng Josias an gabos na kamagurangan nin Juda saka nin Jerusalem.

³⁰Nagduruman sinda gabos sa Templo kaiba an mga Levita, an mga padi asin an gabos na tawo, mayaman man o dukha. Sa pandangog kan gabos, binasa kan hade an bilog na libro kan tipan na nakua sa laog kan Templo.

³¹Nagtindog an hade sa saiyang lugar asin nakipagtipan sa Kagurangnan, na susunodon niya an Kagurangnan, kukuyogon an gabos na togon saka mga pagboot sa bilog niyang puso asin kalag, patin gigibohon an mga kahagadan kan tipan na nasusurat sa libro.

³²Pinasumpa niya an banwaan nin Benjamin asin an gabos na yaon duman sa Jerusalem na mag-otob kan tipan. Kinuyog kan mga taga Jerusalem an gabos na kahagadan kan tipan na ginibo ninda sa Dios kan saindang mga ginikanan.

³³Sa gabos na lugar na sadiri kan banwaan nin Israel, rinaot ni Josias an makauuyam na mga ladawan kan mga dios-dios, dangan sa gabos na aldaw nin saiyang pagkabuhay, pinagbotan niya an mga tawo na maglingkod sa Kagurangnan, an Dios nin saindang mga ginikanan.