Read Central Bicolano 2 Chronicles 5 Bible Online

2 Chronicles 5 - Central Bicolano bible

2 Chronicles 5

¹Kan mahaman na an gabos na ipinagibo ni Solomon para sa Templo nin Kagurangnan, ilinaog niya sa mga sarayan na kwarto an gabos na kinonsagra ni David, na saiyang ama, para sa Kagurangnan—an plata, bulawan asin an gabos na kasangkapan.

²Dangan tinipon ni Solomon sa Jerusalem an kamagurangan nin Israel, an mga pamayo kan mga tribu asin an mga lider kan mga kamaganakan kan banwaan nin Israel, tanganing kuahon sa Sion, an syudad ni David, an Kaban nin Tipan nin Kagurangnan, dangan darahon sa Templo.

³Nagtiripon sinda sa atubangan kan hade kan Pyesta nin mga Harong-harong na ginigibo sa ikapitong bulan.

⁴Kan tiripon na an gabos na kamagurangan, binuhat kan mga Levita an Kaban nin Tipan

⁵saka dinara sa Templo. Dinara man kan mga padi asin kan mga Levita an Tabernakulo saka an gabos na banal na kagamitan sa Tabernakulo.

⁶Nagtiripon sa atubangan kan Kaban nin Tipan si Solomon pati an bilog na banwaan nin Israel, dangan nagdolot nin karnero saka baka, na dai mabilang sa kadakulan.

⁷An Kaban nin Tipan nin Kagurangnan ilinaog kan mga padi sa pinakalaog na santwaryo kan Templo, sa Kabanal-banaleng Lugar, sa irarom kan mga pakpak kan mga kerubin.

⁸Natahoban kan nakaunat nindang mga pakpak an Kaban nin Tipan asin an mga pasanan kaini.

⁹Haralaba an mga pasanan, kaya an mga poro kaini nahihiling sa Banal na Lugar, sa atubangan kan Kabanal-banaleng Lugar; alagad an mga ini dai pwedeng mahiling sa luwas. (Yaon pa ini duman sagkod ngunyan.)

¹⁰Mayong ibang laog an Kaban kundi an duwang tablang gapo na ibinugtak duman ni Moises kan yaon siya sa Bukid nin Sinai, saen nakipagtipan an Kagurangnan sa banwaan nin Israel pakahale ninda sa Egipto.

¹¹An gabos na padi na yaon duman, maski ngani manlaen-laen na grupo nin paglingkod an saindang naaayonan, nagpabanal kan saindang sadiri. Nagtindog sa sirangan na parte kan altar an paratugtog na mga Levita, si Asaf, si Heman, asin si Jedutun, kaiba an saindang mga aki saka kadugo; gabos sinda nakasulot nin pinong lino asin nagtutugtog nin mga gimbal, mga arpa asin lira. Kairiba ninda sa pagtugtog an syento beynteng mga padi na paratugtog nin trompeta. An mga paratrompeta saka mga paratugtog sarabay na nag-omaw asin nagpasalamat sa Kagurangnan, kasabay kan mga trompeta, mga gimbal saka iba pang mga instrumento. Ini an saindang inawit sa makosog na tingog: “Omawon an Kagurangnan, huli ta siya marahayon, asin an saiyang pagkamoot nagdadanay sagkod pa man.” Mantang nagluluwas an mga padi sa banal na lugar, napano nin panganoron an Templo, an harong nin Kagurangnan, kaya an mga padi dai nakatagal sa paglingkod sa laog kan Templo. Napano an Templo kan kamurawayan nin Kagurangnan.