Read Central Bicolano 2 Chronicles 6 Bible Online

2 Chronicles 6 - Central Bicolano bible

2 Chronicles 6

¹Dangan namibi si Solomon, “Kagurangnan, pinili mo na mag-erok sa mahibog na kadikloman.

²Itinugdok taka nin sarong magayon na Templo, sarong lugar na saimong erokan sagkod lamang.”

³Mantang nagtitirindog duman an mga tawo, nag-atubang sainda si Hadeng Solomon asin benendisyonan sinda.

⁴Nagsabi siya, “Pag-omawon an Kagurangnan, an Dios nin Israel! Inotob niya an saiyang panuga ki David na sakuyang ama, kan siya magtaram,

⁵‘Magpoon kan aldaw na iluwas ko sa Egipto an sakong banwaan, dai pa ako nagpili nin syudad sa gabos na tribu nin Israel tanganing tugdokan ko nin Templo na pagsasambahan sako. Dai man ako nagpili nin siisay man na mamamayo kan sakong banwaan na Israel.

⁶Alagad ngunyan pinili ko an Jerusalem bilang lugar na pagsasambahan sako; pinili ko man si David bilang hade kan sakong banwaan na Israel.’”

⁷Nagsabi pa si Solomon, “Nagmawot an sakong ama na si David na magtugdok nin sarong Templo para sa Kagurangnan, an Dios nin Israel.

⁸Alagad tinaraman siya nin Kagurangnan, ‘Marahay an saimong kamawotan na magtugdok nin Templo para sa sakong ngaran,

⁹alagad bako ika an matugdok kaiyan. An saimong aking lalaki iyo an matugdok kan sakuyang Templo.’

¹⁰“Inotob ngunyan nin Kagurangnan an saiyang panuga. Nagin kasalihid ako kan sakong ama na si David bilang hade nin Israel, asin itinugdok ko an Templo para sa Kagurangnan, an Dios nin Israel.

¹¹Ilinaog ko sa Templo an Kaban nin Tipan, na namumugtakan kan duwang tablang gapo kan tipan na ginibo nin Kagurangnan sa banwaan nin Israel.”

¹²Dangan sa panhiling kan bilog na banwaan, nagtindog si Solomon sa atubangan kan altar saka initaas an saiyang mga kamot sa pagpamibi. (

¹³Nagpagibo si Solomon nin sarong bronseng plataporma na ipinabugtak niya sa tahaw kan patyo. Igwa ini nin sukol na dos metros, beynte sentimetros an laba, dos metros, beynte sentimetros an lakbang saka sarong metro, treynta sentimetros an langkaw. Nagsakat siya duman, dangan nagluhod na atubang sa katiriponan nin Israel asin initaas an saiyang mga kamot.)

¹⁴Namibi siya, “Kagurangnan, Dios nin Israel, mayo nin Dios na arog saimo sa langit asin sa daga. Inootob mo an saimong tipan sa saimong banwaan asin ipinapahiling mo an danay mong pagkamoot sa mga sorogoon mong bilog na pusong nagkukuyog saimo.

¹⁵Inotob mo an panuga na ginibo mo sa sakong ama na si David; naotob ngunyan an lambang tataramon.

¹⁶Kaya ngunyan, O Kagurangnan, Dios nin Israel, otobon mo an ibang panuga na ginibo mo sa sakong ama kan taraman mo siya na danay na magkakaigwa siya nin kapagarakian na maghahade sa Israel, kun magkuyog sinda saimo siring kan ginibo niya.

¹⁷Kaya ngunyan, O Kagurangnan Dios nin Israel, patotoohan mo an saimong itinaram sa sakong ama na si David, na saimong sorogoon.

¹⁸“Alagad pwede daw na mag-erok sa daga an Dios? Kun an pinakahalangkaw na kalangitan dai nagkakanigo saimo, gurano pa daw an Templong ini na sakuyang ipinatugdok?

¹⁹Alagad hinanyoga an pamibi asin pakimaherak kan saimong sorogoon, O Kagurangnan na sakong Dios; hinanyoga an sakong pamibi asin simbaga an kahagadan na ipinapahayag ko saimo ngunyan na aldaw.

²⁰Bantayan mo logod an Templong ini aldaw-banggi, an lugar na ini na saimong pinili na pagsasambahan saimo. Hinanyoga ako kun mag-atubang ako sa Templong ini asin mamibi.

²¹Hinanyoga an saimong mga sorogoon pati an saimong banwaan na Israel sa panahon na mamibi kaming atubang sa lugar na ini. Hinanyoga kami hale sa saimong erokan sa langit dangan patawada.

²²“Kun magkasala sa saiyang kapwa an sarong tawo asin pasumpaon siya sa atubangan kan saimong altar digdi sa Templo,

²³hinanyoga Kagurangnan, dangan hukoman mo an saimong mga sorogoon. Padusahan mo an nagkasala asin ligtasan an matanos.

²⁴“Kun an banwaan mong Israel madaog nin kaiwal huli ta nagkasala sinda saimo dangan kun magbalik sinda saimo asin mamibi digdi sa Templo, mapakumbabang maghagad saimo nin kapatawadan,

²⁵hinanyoga sinda hale sa langit, saka patawada an kasalan kan saimong banwaan; ibalik mo sinda sa daga na itinao mo sa sainda saka sa saindang mga ginikanan.

²⁶“Kun serahan mo an langit asin dai mag-uran huli ta nagkasala sinda saimo dangan kun magsolsol sinda saka mag-atubang sa Templong ini, mapakumbaba na mamibi saimo,

²⁷hinanyoga sinda hale sa langit, asin patawada an kasalan kan saimong mga sorogoon, an banwaan nin Israel; tukdoan mo sinda kan marahay na gibo na dapat nindang sunodon. Dangan, O Kagurangnan, tawe nin uran an saimong daga, an daga na itinao mo sa saimong banwaan bilang pamana.

²⁸“Kun magkaigwa sa daga nin gutom o peste, o kun maraot an mga tinanom huli sa mainit na doros, sa mga doron, o kun salakayon kan mga kaiwal an saimong banwaan, asin kun may mga helang na mag-abot sainda,

²⁹hinanyoga an saindang mga pamibi. Kun an siisay man sa saimong banwaan, huli sa kamondoan, mag-itaas kan saiyang mga kamot pasiring sa Templong ini tanganing makimaherak saimo,

³⁰hale sa langit na saimong erokan hinanyoga siya asin patawada; itao mo sa lambang saro an maninigo sa saiyang mga gibo, huli ta ika sana an nakakaaram kan nasa puso nin mga tawo;

³¹tanganing mamuhay sinda na igwa nin takot saimo asin magkuyog saimo sa gabos na aldaw nin saindang pagkabuhay sa daga na itinao mo sa samong mga ginikanan.

³²“Kun an sarong dayuhan na nag-eerok sa harayong lugar makadangog kan saimong dakulang ngaran asin kan saimong makangangalas na mga gibo para sa saimong banwaan, dangan magdigdi tanganing magsamba saimo saka mamibi sa Templong ini,

³³hinanyoga an saiyang pamibi. Hale sa langit na saimong erokan, hinanyoga siya asin giboha an hinahagad niya saimo, tanganing mamidbidan asin kuyogon ka kan mga tawo sa kinaban siring kan pagkuyog saimo kan banwaan nin Israel. Dangan maaaraman ninda na an Templong ini na ipinatugdok ko iyo an lugar na pagsasambahan saimo.

³⁴“Kun pagbotan mo na magluwas an saimong banwaan tanganing makigera sa saindang mga kaiwal, dangan mamibi sinda saimo na atubang sa syudad na pinili mo asin sa Templong ini na sakong itinugdok para saimo,

³⁵hale sa langit hinanyoga an saindang mga pamibi asin tawe sinda nin kapangganahan.

³⁶“Kun magkasala sinda tumang saimo—huli ta mayo nin tawo na dai nagkakasala—asin sa kaanggotan pabayaan mo sindang madaog kan kaiwal kaya nadara sindang bihag sa ibang daga,

³⁷hinanyoga an mga pamibi nin saimong banwaan. Kun sa dagang pinagdarahan sainda magsolsol saka mamibi sinda saimo, mag-ako kan saindang kasombikalan, hinanyoga an saindang mga pamibi, O Kagurangnan.

³⁸Kun magsolsol sinda sa bilog nindang puso asin isip duman sa daga kan saindang mga kaiwal, na nagbihag sainda, asin mamibi saimo mantang nakaatubang sa dagang ini na itinao mo sa saindang mga ginikanan, sa syudad na ini na saimong pinili, asin sa Templong ini na itinugdok ko para saimo,

³⁹hale sa langit na saimong erokan, hinanyoga an saindang mga pamibi dangan maherak ka sainda. Patawada sinda kan gabos nindang kasalan.

⁴⁰“Ngunyan, O sakuyang Dios, hilinga kami asin hinanyoga an pamibi na idinolot sa lugar na ini:

⁴¹“Tumindog ka, O Kagurangnan Dios, asin kaiba an Kaban nin Tipan, an tanda kan saimong kapangyarihan, lumaog ka sa Templo dangan mag-erok ka digdi sagkod lamang. Magubingan logod nin kaligtasan, Kagurangnan, an saimong kapadian, asin mag-ogma logod an mga banal sa saimong karahayan.

⁴²O Kagurangnan Dios, hare pagsikwalan an saimong linahidan! Giromdoma an danay mong pagkamoot sa sorogoon mong si David.”