Read Central Bicolano 2 Chronicles 7 Bible Online

2 Chronicles 7 - Central Bicolano bible

2 Chronicles 7

¹Pakapamibi ni Solomon, may kalayo na naghilig hale sa langit dangan tinutong an mga idinolot na atang, asin an Templo napano kan kamurawayan nin Kagurangnan.

²Dai nakalaog sa Templo an mga padi huli ta napano an Templo kan kamurawayan nin Kagurangnan.

³Kan mahiling kan bilog na Israel an kalayo na naghilig hale sa langit asin an kamurawayan nin Kagurangnan na nakapano sa Templo, nagdapa sinda, nagsamba saka nagpasalamat sa Kagurangnan, huli kan saiyang pagkamarahayon asin pagkamoot na daing kataposan.

⁴Dangan si Hadeng Solomon asin an bilog na banwaan nagdolot nin sakripisyo sa Kagurangnan.

⁵Bilang sakripisyo nagdolot siya nin beynte y dos mil na baka saka syento beynte mil na karnero. Sa paaging ini kinonsagra kan hade asin kan banwaan an Templo nin Dios.

⁶Nagtirindog an mga padi sa lugar na ipinanongod sainda, asin nakatindog na atubang sainda an mga Levita, na nag-omaw sa Kagurangnan sa paagi kan saindang mga instrumento dangan inawit ninda an imnong, “An Saiyang Pagkamoot Mayo Nin Kataposan,” sosog sa ipinagibo sainda ni David. Pinatanog kan mga padi an mga trompeta mantang nakatindog an gabos na tawo.

⁷Kinonsagra ni Solomon an tahaw kan patyo, na nasa atubangan kan Templo; idinolot niya duman an mga tinutong na atang, an dolot na pagkakan asin an taba kan mga hayop bilang mga dolot para sa katoninongan. Duman niya ini ginibo huli ta an bronseng altar na saiyang ipinagibo sadit nin marahay para sa gabos na dolot.

⁸Si Solomon asin an bilog na banwaan nin Israel pitong aldaw na nagselebrar kan Pyesta nin mga Harong-harong. Dakul nin marahay an mga tawo na nagtiripon na hale pa sa Dalan nin Hamat sa amihan asin sa pagdolonan nin Egipto sa habagat.

⁹Pitong aldaw an ginibo nindang pagkonsagra sa altar asin pitong aldaw man an pagselebrar ninda kan pyesta. Kan huring aldaw nagkaigwa sinda nin dakulang pagtiripon,

¹⁰dangan kan sunod na aldaw, an ikabeynte y tres na aldaw kan ikapitong bulan, pinapuli ni Solomon an mga tawo sa saindang harong. Nag-orogma sinda gabos huli sa karahayan na ipinahiling nin Kagurangnan ki David, ki Solomon, asin sa bilog na Israel.

¹¹Natapos ni Solomon an pagpatugdok kan Templo, kan palasyo asin kan gabos na inisip niyang ipagibo sa laog kan mga ini.

¹²Dangan sarong banggi nagpahiling an Kagurangnan ki Solomon asin nagtaram, “Nadangog ko an saimong pamibi asin inako ko an Templong ini bilang harong na pagdodolotan nin sakripisyo para sako.

¹³Kun serahan ko an kalangitan tanganing dai mag-uran, o kun pagbotan ko an mga doron na kakanon an mga tinanom, o padarahan ko nin peste an sakong banwaan,

¹⁴dangan magpakumbaba an sakong banwaan, mag-atubang sako, mamibi asin talikodan an saindang mga maraot na gibo, hale sa langit, dadangogon ko sinda, papatawadon an saindang kasalan asin papauswagon an saindang daga.

¹⁵Babantayan ko an Templong ini asin dadangogon ko an gabos na pamibi na gigibohon digdi,

¹⁶huli ta pinili asin kinonsagra ko ini bilang lugar na pagsasambahan sako sagkod lamang; babantayan saka aatamanon ko ini sa gabos na panahon.

¹⁷Manongod saimo, kun maimbod na maglingkod ka sako siring kan ginibo kan saimong amang si David, dangan kun kuyogon mo an sakong mga togon saka mga pagboot,

¹⁸papatindogon ko an saimong kahadean, siring kan sakong panuga sa saimong ama kan taraman ko siyang, ‘An Israel danay na paghahadean kan saimong kapagarakian.’

¹⁹Alagad kun ika asin an saimong banwaan magtalikod sako asin dai magkuyog kan sakong mga togon saka mga pagboot; kun magsunod kamo, maglingkod asin magsamba sa ibang mga dios,

²⁰hahaleon ko kamo sa daga na itinao ko saindo. Papabayaan ko an Templong ini na kinonsagra ko para sa sakong ngaran. Pagngingisihan ini saka pagtutuyatuyaon kan gabos na tawo.

²¹“An Templong ini inoomaw ngunyan alagad sa panahon na iyan, an lambang maagi sa harani kaini mangalas asin mahapot, ‘Tano ta siring an ginibo nin Kagurangnan sa dagang ini asin sa Templong ini?’

²²Masimbag an mga tawo, ‘Huli ta binayaan ninda an Kagurangnan na saindang Dios na nagluwas kan saindang mga ginikanan sa Egipto. Nagsunod sinda, naglingkod, asin nagsamba sa ibang mga dios, kaya dinara sainda nin Kagurangnan an gabos na karatan na ini.’”