Read Central Bicolano 2 Chronicles 8 Bible Online

2 Chronicles 8 - Central Bicolano bible

2 Chronicles 8

¹Inabot nin beynteng taon si Solomon sa pagpatugdok kan Templo asin kan saiyang palasyo.

²Pinatindog niya giraray an mga syudad na itinao saiya ni Hadeng Hiram, asin duman pinaerok an ibang Israelita.

³Sinakop niya an Hamat saka an Zoba.

⁴Itinugdok niya an syudad nin Tadmor sa kalangtadan asin an mga syudad sa Hamat na sarayan kan mga kagamitan.

⁵Pinatindog man niya an Itaas asin Ibabang Bet-horon, mga syudad na pusog an mga kudal saka mga trangkahan;

⁶dangan an syudad nin Baalat, an gabos na syudad na sarayan kan saiyang mga kagamitan, asin an mga syudad para sa saiyang mga karwahe saka mga paralunad sa kabayo. Hinaman niya an mga edipisyo na boot niyang itugdok sa Jerusalem, sa Lebanon, asin sa gabos na lugar na sakop niya.

⁷Ipinagboot ni Solomon an pirit na pagpatrabaho sa mga kapagarakian kan mga taga Canaan na dai ginaradan kan mga Israelita kan sakopon ninda an daga. An mga ini iyo an mga Heteo, Amoreo, Perezeo, Heveo saka Jebuseo, na an mga kapagarakian naglilingkod bilang mga oripon sagkod ngunyan.

⁹An mga Israelita dai ni Solomon ginibong mga oripon; naglingkod sinda saiya bilang mga soldados, mga opisyal, mga pamayo kan mga hukbo, mga kapitan nin mga karwahe, asin mga soldados na nakakabayo.

¹⁰Igwa nin dos syentos singkwentang opisyal na namahala kan pirit na pagpatrabaho sa mga tawo.

¹¹Hale sa Syudad ni David, dinara ni Solomon an saiyang agom, na aking babae kan hade nin Egipto, sa harong na ipinatugdok niya saiya. Nagsabi si Solomon, “An sakong agom dai dapat mag-erok sa palasyo ni David na hade nin Israel, huli ta banal an arin man na lugar na nadumanan kan Kaban nin Tipan.”

¹²Nagdolot si Solomon nin mga tinutong na atang sa Kagurangnan duman sa altar na ipinagibo niya sa atubangan kan Templo.

¹³Nagdolot siya siring kan hinahagad kan mga Togon ni Moises manongod sa mga atang kun mga banal na aldaw arog kan Sabbath, Bagong Bulan asin an tolong taon-taon na mga Pyesta—an Pyesta kan Tinapay na Mayo nin Lebadura, an Pyesta nin Pag-ani saka an Pyesta nin mga Harong-harong.

¹⁴Bilang pagkuyog sa mga pagboot ni David na saiyang ama, itinalaan niya an aroaldaw na trabaho kan mga padi asin kan mga Levita na matarabang mantang nag-aawit an mga padi asin nag-ootob kan saindang katongdan. Itinalaan man niya an aroaldaw na grupo nin mga bantay kan Templo para sa mga trangkahan kaini, siring kan ipinagboot ni David na sorogoon nin Dios.

¹⁵Kinuyog nanggad kan mga padi asin kan mga Levita an gabos na pagboot ni David manongod sa mga kayamanan saka iba pang mga bagay.

¹⁶Kaya natapos an gabos na patrabaho ni Solomon magpoon sa pagbugtak kan pundasyon kan Templo nin Kagurangnan sagkod na matapos ini. Nahaman an Templo nin Dios.

¹⁷Dangan nagduman si Solomon sa Ezion-geber asin sa Elat sa baybayon kan dagat, sa daga nin Edom.

¹⁸Pinadarahan siya ni Hiram nin mga sakayan sa pamamahala kan saiyang mga opisyal saka mga lalaking tood sa dagat. Kaiba kan mga opisyal ni Solomon, nagsakay sinda pasiring sa Ofir; pagbalik ninda ki Solomon, may dara sindang haros dyes y seis na toneladang bulawan.