Read Central Bicolano Ezra 1 Bible Online

Ezra 1 - Central Bicolano bible

Ezra 1

¹Kan enot na taon kan si Ciro nin Persia magin emperador, nagkatotoo an itinaram nin Kagurangnan sa paagi ni propeta Jeremias. Pinasabongan nin Kagurangnan si Ciro na magpaluwas nin sarong pagboot; sinurat niya ini asin ipinabasa nin makosog sa bilog niyang imperyo:

²“Ini an pagboot ni Ciro, an Emperador nin Persia. An Kagurangnan, an Dios nin langit, iyo an nagtao sako kan gabos na kahadean sa daga, asin pinagbotan niya ako na magtugdok nin sarong templo para saiya duman sa Jerusalem sa Juda.

³Ibahan logod kamo nin Dios, kamo gabos na saiyang banwaan. Magduman kamo sa Jerusalem asin hirahayon nindo an Templo nin Kagurangnan, an Dios nin Israel, na sinasamba sa Jerusalem.

⁴An siisay man na mangaipo nin tabang sa saiyang pagbalik, dapat tabangan kan saiyang mga kataraed. Tatawan siya ninda nin plata saka bulawan, kakanon saka mga hayop, laen pa kan mga boluntad na atang para sa Templo nin Dios duman sa Jerusalem.”

⁵Dangan an mga pamayo kan kamaganakan ni Juda asin ni Benjamin, an mga padi saka mga Levita, asin an lambang saro na an puso hiniro nin Dios, nag-andam sa pagbalik sa Jerusalem asin sa paghirahay kan Templo nin Kagurangnan duman.

⁶Tinabangan sinda kan mga kataraed ninda huli sa pagtao nin mga platang kagamitan, mga bulawan, mga kagamitan, mga hayop, asin iba pang mahalagang mga bagay, laen pa kan boluntad na atang para sa Templo.

⁷Ibinalik man ni Emperador Ciro an mga kagamitan na kinua ni Nebukadnezzar sa Templo dangan ibinugtak kaini sa templo nin saiyang mga dios-dios.

⁸An mga kagamitan itinao ni Ciro ki Mitredat, an tesorero na nagbilang kan mga ini para ki Sesbazzar, an gobernador nin Juda.

⁹Iyo ini an lista kan gabos: treyntang bulawan na palanggana, sangribong platang palanggana, beynte y nuebeng insensaryo,

¹⁰treyntang bulawan na mangko, kwatro syentos dyes na platang mangko, saka sangribo pang mga kagamitan.

¹¹An bilang kan mga kagamitan na ini nag-abot sa singko mil kwatro syentos; an mga ini iyo an dinara ni Sesbazzar kan maghale siya sa Babilon kaiba an mga itinapok dangan nagbalik sa Jerusalem.