Read Central Bicolano Ezra 3 Bible Online

Ezra 3 - Central Bicolano bible

Ezra 3

¹Kan ikapitong bulan, an mga Israelita napamugtak na sa saindang mga banwa. Dangan nagtiripon sinda gabos sa Jerusalem.

²Nagtindog si Josue na aking lalaki ni Jehozadak, kaiba an kapwa niya mga padi, si Zerubabel na aking lalaki ni Sealtiel, kaiba an saiyang mga kadugo, dangan itinugdok ninda giraray an altar nin Dios nin Israel, tanganing magdolot sinda duman nin mga tinutong na atang, sosog sa nasusurat sa Katogonan ni Moises, an sorogoon nin Dios.

³Huli ta takot sinda sa mga tawo na nag-eerok duman, itinugdok ninda giraray an altar sa dating lugar asin nagdolot sinda nin mga tinutong na atang sa Kagurangnan aldaw-banggi.

⁴Inotob ninda an Pyesta nin mga Harong-harong sosog sa pagsusundon, asin aroaldaw nagdolot sinda kan sakripisyo na kaipuhan idolot sa aroaldaw;

⁵siring man an mga tinutong na atang, an mga dolot sa Pyesta nin Bagong Bulan asin sa iba pang itinalaan na pyesta nin Kagurangnan, dangan an boluntad na mga dolot sa Kagurangnan.

⁶Maski dai pa pinonan an paghirahay kan Templo, an mga tawo nagpoon nang magdolot nin mga tinutong na atang sa Kagurangnan kan enot na aldaw kan ikapitong bulan.

⁷Binayadan kan mga tawo an mga kantero saka mga karpintero, asin nagtao sinda nin kakanon, inomon, saka lana na ipapadara sa mga taga Sidon asin Tiro bilang karibay kan mga kahoy na sedro hale sa Lebanon, na dadarahon sa paagi nin dagat pasiring sa Jope. Ini gabos ginibo huli sa pagtugot na itinao ni Ciro na emperador nin Persia.

⁸Kaya sa ikaduwang bulan kan ikaduwang taon, pakabalik ninda sa lugar kan Templo sa Jerusalem, an trabaho pinonan ni Zerubabel na aking lalaki ni Sealtiel, ni Josue na aking lalaki ni Jehozadak, kaiba an saindang mga tugang, an mga padi saka an mga Levita na nagbaralik sa Jerusalem hale sa pagkatapokan. An mga Levita na an edad beynteng taon paitaas, iyo an pinamahala kan trabahong paghirahay kan Templo nin Kagurangnan.

⁹Si Jeshua asin an saiyang mga aki saka kadugo, si Kadmiel asin an saiyang mga aki (an kamaganakan ni Odavias) nagtarabang sa pamahala kan pagtugdok kan Templo, (kaiba an mga Levita kan kamaganakan ni Henadad.)

¹⁰Kan ibugtak kan mga paratugdok an pundasyon kan Templo nin Kagurangnan, an mga padi na nakasulot kan gubing na pangpadi saka may kapot na mga trumpeta, an mga Levita asin an kamaganakan ni Asaf nagpaenotan na may darang mga gimbal, tanganing omawon an Kagurangnan sosog sa katukdoan ni David na hade nin Israel.

¹¹Nagpasirimbagan sinda sa pag-awit nin pag-omaw asin pasasalamat sa Kagurangnan: “An Kagurangnan marahayon, asin an saiyang pagkamoot para sa Israel nagdadanay sagkod pa man.” An gabos na tawo nagkurahaw nin makosog sa pag-omaw sa Kagurangnan, huli ta namugtak na an pundasyon kan Templo.

¹²Dakul na mga gurang na padi, mga Levita, asin mga pamayo nin kamaganakan an nakahiling kan enot na Templo, kaya naghibi sinda saka naghaya kan mahiling ninda an pagbugtak kan pundasyon kan Templo. Alagad an iba na yaon duman nagkurahaw sa kaogmahan.

¹³Dai na maaraman kun arin an kurahaw nin kaogmahan asin kun arin an paghibi, huli ta makosog an ribok kan mga tawo, mala ta pwede ining madangog maski sa harayo.