Read Central Bicolano Ezra 4 Bible Online

Ezra 4 - Central Bicolano bible

Ezra 4

¹Kan madangog kan mga kaiwal nin Juda asin Benjamin na an Templo nin Kagurangnan, an Dios nin Israel hinihirahay kan mga hale sa pagkatapokan,

²nagduman sinda ki Zerubabel saka sa mga pamayo kan mga kamaganakan dangan nagsabi, “Tugotan nindo kaming magtrabaho kaiba nindo, huli ta sinasamba mi an parehong Dios na sinasamba nindo, asin nagdodolot kami saiya nin mga sakripisyo poon pa kan panahon ni Esarhaddon, an emperador nin Asiria, na nagdara samo digdi.”

³Sinimbag sinda ni Zerubabel, ni Josue, asin kan mga pamayo kan mga kamaganakan, “Dai mi kamo kaipuhan sa pagtugdok kan Templo nin Kagurangnan na samuyang Dios. Kami sana an matugdok kaiyan siring sa pagboot samo ni Ciro na emperador nin Persia.”

⁴Dangan an banwaan nin Juda pinatakot kan mga tawo na nag-eerok duman, asin hiningowa kan mga ini na manluya an boot kan mga Judio tanganing dai makatugdok.

⁵Sinuholan man ninda an mga opisyal sa gobyerno nin Persia tanganing olangon an pagtrabaho kan mga Judio. Padagos ninda ining ginibo sa bilog na panahon kan pamamayo ni Ciro sa Persia, asin sagkod sa pamamayo sa Persia ni Emperador Dario.

⁶Sa kapinonan kan pamamayo ni Jerjes nin Persia, an mga kaiwal kan mga nag-eerok sa Juda saka sa Jerusalem nagpaluwas nin sarong sumbong.

⁷Siring man kan panahon nin pamamayo ni Emperador Artajerjes nin Persia, nagsurat sa emperador na ini si Bislam, si Mitredat, saka si Tabeel asin an saindang mga kairiba. An surat nasa lengwaheng Arameo asin kaipuhan itradusir kun binabasa.

⁸Siring man si Rehum na gobernador saka si Simsai na sekretaryo kan probinsya nagsurat man ki Emperador Artajerjes manongod sa Jerusalem. Iyo ini an surat ninda:

⁹“Surat na hale ki Rehum na gobernador, ki Simsai na sekretaryo kan probinsya, hale man sa mga kairiba ninda, sa mga hukom saka sa iba pang mga opisyal na gikan sa Erek, sa Babilon, asin sa Susa sa daga nin Elam,

¹⁰kaiba an gabos na tawo na pinahale kan dakula saka mapangyaring si Asurbanipal sa saindang mga harong dangan pinaerok sa syudad nin Samaria asin sa iba pang probinsya sa ibong kan Salog nin Eufrates.”

¹¹Iyo ini an laog kan surat: “Para ki Emperador Artajerjes, hale sa saiyang mga sorogoon sa Solnopan nin Eufrates, an samong pangongomusta.

¹²“Boot ming maaraman kan saimong kamahalan na an mga Judio na nag-abot digdi hale sa ibang lugar na sakop mo nag-erok na ngunyan sa Jerusalem. Hinihirahay ninda idtong maraot saka rebeldeng syudad. Pinonan na ninda an paghirahay kan kudal asin matatapos na ninda.

¹³Mahal na emperador, kun mahirahay na an syudad na ini asin matapos na an kudal, dai na sinda mabayad nin buhis asin kadikit na sanang kwarta an makokolekta para sa emperador.

¹⁴Kaya nin huli ta may katongdan kami sa palasyo asin habo mi ikang mapasopog, sinasabihan mi ika

¹⁵tanganing ipasiyasat mo an mga talaan kan saimong mga ginikanan. Mahihiling mo na an syudad na ini danay na nagrebelde, asin maski kaidto nagin problema na ini kan mga hade saka mga pamayo nin mga probinsya, huli ta an mga tawo diyan dipisil na pamahalaan. Kaya rinumpag an syudad na ini.

¹⁶Pinapaisi mi ika huli ta kun mahirahay na an syudad na ini asin matapos na an kudal, dai mo na masasadirihan an probinsya sa ibong kan Salog nin Eufrates.”

¹⁷Ipinadara kan emperador an simbag na ini: “Para ki Rehum na gobernador, ki Simsai na sekretaryo kan probinsya, asin sa saindang mga kairiba na nag-eerok sa Samaria asin sa gabos na nasa Solnopan kan Salog nin Eufrates, an sakong pangongomusta.

¹⁸“Binasa sa atubang ko an surat na saindong ipinadara.

¹⁹Nagpaluwas ako nin pagboot na gibohon an pagsiyasat, asin naaraman mananggad na an syudad na ini nagrebelde poon pa kaidto sa mga hade asin dakul an mga rebelde saka mga paribok diyan.

²⁰Mapangyari an mga hade na namayo sa Jerusalem saka sa bilog na probinsya sa ibong kan Salog nin Eufrates, asin nagharagad sinda nin mga buhis.

²¹Kaya magpaluwas kamo nin pagboot tanganing ontokon an paghirahay kan syudad sagkod na dai ko ipinagboboot an pagtugdok kaiyan.

²²Giboha tolos nindo ini tanganing dai na magdakula pa an problema ko.”

²³Kan an surat na ini ni Artajerjes mabasa ni Rehum, ni Simsai, asin kan mga kairiba kaini, nagduman tolos sinda sa Jerusalem asin pirit na pinaontok an mga Judio sa paghirahay kan syudad.

²⁴Naontok an trabaho sa Templo. Dai ini ipinadagos sagkod sa ikaduwang taon kan pamamayo ni Emperador Dario nin Persia.