Read Central Bicolano Ezra 5 Bible Online

Ezra 5 - Central Bicolano bible

Ezra 5

¹Kan panahon na iyan an mga propeta na si Hageo asin si Zacarias na aking lalaki ni Iddo, nagpropesiya sa mga Judio na nasa Juda saka Jerusalem sa ngaran kan Dios nin Israel na nakakasakop sainda.

²Kan madangog sinda ni Zerubabel na aking lalaki ni Sealtiel dangan ni Josue na aking lalaki ni Jehozadak, pinonan kan mga ini an paghirahay kan Templo sa Jerusalem, asin tinabangan sinda kan mga propeta.

³Nagduman tolos sa Jerusalem si Tattenai na gobernador kan probinsya sa ibong kan Salog nin Eufrates, si Setar-bozenai, asin an saindang mga kairiba dangan nagsabi, “Siisay an nagboot saindo na itugdok giraray asin taposon an Templong ini?”

⁴Hinagad man ninda an ngaran kan gabos na nagtabang sa pagtugdok kan Templo.

⁵Alagad binantayan nin Dios an mga kamagurangan na Judio, kaya dai pinaontok kan mga taga Persia an mga nagtrabaho sagkod na dai sinda makapag-osip ki Emperador Dario dangan suratan sinda kaini.

⁶Iyo ini an inosip ninda sa emperador:

⁷“Para ki Emperador Dario, mamayo ka logod na matoninong.

⁸“Mahal na Emperador, kaipuhan na maaraman mo na nagduman kami sa probinsya nin Juda asin nahiling mi an hinihirahay na Templo kan dakulang Dios. Dakulang mga gapo saka kahoy an ginagamit sa pagtugdok asin padagos an maigot saka marahay na pagtrabaho.

⁹“Hinapot nyamo an kamagurangan kun siisay an nagboot sainda na itugdok giraray saka taposon an Templo.

¹⁰Hinapot mi man an saindang mga ngaran tanganing maaraman mo an mga lider ninda.

¹¹“Ini an simbag ninda samo, ‘Kami an mga sorogoon kan Dios nin langit asin daga, asin itinutugdok giraray nyamo an Templo na dating itinugdok saka sinamnohan kaidto kan sarong dakulang hade nin Israel.

¹²Alagad huli ta pinaanggot kan samong mga ginikanan an Dios nin langit, itinao niya sinda sa kamot ni Nebukadnezzar na hade nin Babilonia, an Caldeo na iyo an nagrumpag kan Templo asin nagtapok kan banwaan sa Babilonia.

¹³Dangan kan enot na taon kan pamamayo ni Ciro sa Babilonia, nagpaluwas siya nin pagboot na itugdok giraray an Templong ini.

¹⁴Ibinalik niya an mga kagamitan na bulawan saka plata kan Templo na sinamsam ni Nebukadnezzar hale sa Templo sa Jerusalem dangan ibinugtak sa templo sa Babilonia. An mga kagamitan na iyan itinao ni Ciro sa sarong lalaki na an ngaran Sesbazzar, na saiyang ibinugtak na gobernador nin Juda.

¹⁵Sinabihan ni Emperador Ciro si Sesbazzar na kuahon an mga kagamitan asin ibalik sa Templo sa Jerusalem, dangan patindogon giraray an Templo sa dating namumugtakan kaidto.

¹⁶Kaya nagdigdi si Sesbazzar dangan ibinugtak an mga pundasyon kan Templo sa Jerusalem; poon kaidto sagkod ngunyan an pagpatrabaho, alagad dai pa iyan natatapos.’

¹⁷“Kaya, Mahal na Emperador, kun pagmarahayon mo, ipahalungkat mo an mga libro kan mga hade diyan sa Babilon tanganing maaraman kun totoo mananggad na nagboot si Emperador Ciro na itugdok giraray an Templo sa Jerusalem, dangan paisihon mo man kami dapit sa bagay na ini.”