Read Central Bicolano Ezra 7 Bible Online

Ezra 7 - Central Bicolano bible

Ezra 7

¹Pakalihis nin dakul na taon, kan si Artajerjes iyo an emperador nin Persia, igwa nin sarong lalaki na an ngaran Esdras. Si Esdras aking lalaki ni Seraias, na aki ni Azarias na aki ni Hilkias.

²Si Hilkias aki ni Sallum, na aki ni Zadok na aki ni Ahitub.

³Si Ahitub aki ni Amarias, na aki ni Azarias, na aki ni Meraiot.

⁴Si Meraiot aki ni Zerahias, na aki ni Uzzi na aki ni Bukki.

⁵Si Bukki aki ni Abisua, na aki ni Finehas, na aki ni Eleazar, na aki ni Aaron, an Halangkaw na Padi.

⁶Si Esdras sarong madonong sa Katogonan na itinao ki Moises kan Kagurangnan, an Dios nin Israel. Huli ta benendisyonan si Esdras nin Kagurangnan na saiyang Dios, tinawan siya kan hade kan anoman na hinagad niya. Kan ikapitong taon kan pamamayo ni Artajerjes, naghale si Esdras sa Babilonia dangan nagpasiring sa Jerusalem, kaiba an sarong grupo nin mga Israelita na an iba mga padi, an iba mga Levita, mga paratugtog sa Templo, mga bantay, asin mga sorogoon sa Templo.

⁸Naghale sinda sa Babilonia kan enot na aldaw kan enot na bulan. Sa tabang nin Dios, nag-abot sinda sa Jerusalem kan enot na aldaw kan ikalimang bulan.

¹⁰Idinusay ni Esdras an saiyang buhay sa pag-adal kan Katogonan nin Kagurangnan, sa pag-otob kaiyan, asin sa pagtukdo sa mga Israelita kan gabos na ipinagboboot kan Katogonan.

¹¹An surat na ini itinao ni Emperador Artajerjes ki Esdras, an padi asin paratukdo na igwa nin dakulang pakasabot kan mga katogonan saka mga pagboot na itinao nin Kagurangnan sa Israel:

¹²“Hale ki Emperador Artajerjes, para ki Esdras na padi asin paratukdo kan katogonan kan Dios nin langit.

¹³“Nagboboot ako na sa bilog kong imperyo an gabos na Israelita, mga padi, saka mga Levita na boot magduman sa Jerusalem, tinutugotan na mag-iba saimo.

¹⁴Ako, kaiba an pito kong parahatol, an minasugo saimo tanganing magsiyasat kan kamugtakan sa Juda saka sa Jerusalem tanganing aramon kun kinukuyog an Katogonan nin saimong Dios na itinao sa saimong pamamahala.

¹⁵Darahon mo an bulawan saka plata na mawot kong itao asin boot man itao kan sakong mga parahatol sa Dios nin Israel na an Templo yaon sa Jerusalem.

¹⁶Darahon mo man an gabos na plata saka bulawan na nakokolekta mo sa bilog na probinsya nin Babilon asin an boluntad na mga dolot kan mga tawo saka mga padi para sa Templo nin saindang Dios sa Jerusalem.

¹⁷“An kwartang ini gamiton mo sana para sa pagbakal nin mga torong baka, mga karnero, mga kordero, trigo, saka arak, dangan idolot mo sa altar kan Templo sa Jerusalem.

¹⁸Pwede mong gamiton an matadang kwarta sa anoman na pagmarahayon mo asin nin saimong mga kapwa Israelita, sosog sa kabotan nin saimong Dios.

¹⁹Darahon mo sa atubang nin Dios sa Jerusalem an gabos na kagamitan na itinao saimo para sa paglingkod sa Templo.

²⁰An ano pa man na kaipuhan mo para sa Templo, pwede mong kuahon sa kayamanan na sadiri kan hade.

²¹“Pinagbobotan ko an mga namamahala kan kayamanan sa probinsya sa ibong kan Salog nin Eufrates na itao tolos ki Esdras, an padi asin paratukdo kan Katogonan kan Dios nin langit, an gabos na hagadon niya,

²²sagkod na dai maglampas sa tres mil kwatro syentos na kilo nin plata, dyes mil na kilo nin trigo, dos mil na litro nin arak, dos mil na litro nin lana nin oliba, saka an gabos na asin na kaipuhan niya.

²³Gibohon nindo an anoman na ipagboot kan Dios nin langit para sa saiyang Templo, tanganing dai siya maanggot sako asin sa sakong mga aking lalaki.

²⁴Ipinapaisi ko man saindo na ipinapangalad an pagkolekta nin buhis sa mga padi, sa mga Levita, sa mga paratugtog sa Templo, sa mga bantay, sa mga sorogoon sa Templo, o sa kiisay man na sorogoon sa Templong ini nin Dios.

²⁵“Ika, Esdras, sosog sa kadonongan na itinao saimo nin saimong Dios, an mabugtak nin mga administrador saka mga hukom na mamamahala kan gabos na tawo sa Solnopan kan Salog nin Eufrates. Sinda gabos kaipuhan na tukdoan mo kan Katogonan nin saimong Dios.

²⁶An siisay man na maglapas kan Katogonan nin saimong Dios asin kan mga katogonan kan imperyo, papadusahan tolos sa paagi nin kagadanan o pagtapok o pag-embargo kan pagrogaring o pagkabilanggo.”

²⁷Nagsabi si Esdras, “Pagomawon an Kagurangnan, an Dios nin samuyang mga ginikanan, na naghiro kan puso kan emperador tanganing pagayonon an Templo nin Kagurangnan sa Jerusalem,

²⁸asin naghiras sako kan danay niyang pagkamoot sa atubangan kan emperador, kan mga parahatol kaini, asin sa atubangan kan gabos na mapangyaring opisyal kan emperador. Sa tabang nin Kagurangnan na sakuyang Dios, nagkosog an sakong boot asin natipon ko an mga pamayo kan mga kamaganakan nin Israel tanganing magbalik kaiba ko.”