Read Central Bicolano Ezra 9 Bible Online

Ezra 9 - Central Bicolano bible

Ezra 9

¹Pakatapos na magibo an gabos na ini, dinolok ako kan nagkapirang lider kan banwaan nin Israel dangan sinabihan, “An mga tawo, an mga padi, asin an mga Levita dai nagsuhay sa mga tawo na nag-eerok sa kataraed na mga nasyon nin Ammon, Moab, saka Egipto, o sa mga Cananeo, Heteo, Perezeo, Jebuseo saka Amoreo. Inaarog pa ninda an makauuyam na mga gawe kan mga ini.

²An mga Judio nag-agom nin mga dayuhan na babae, kaya nadigtaan an banal na banwaan nin Dios. An mga lider saka an mga opisyal iyo an nangenot sa pagkasala.”

³Kan madangog ko ini, ginisi ko an sakong gubing saka alikboy, rinabnot an sakong buhok saka barabas, asin mamondo akong nagtukaw.

⁴Dangan pinalibotan ako kan mga tawo, na nagkatarakot sa sinabi kan Dios nin Israel manongod sa mga kasalan kan mga nagbalik hale sa pagkatapokan; nagmomondo na nagtukaw ako duman sagkod na uminabot an oras para sa pagdolot kan pangbangging sakripisyo.

⁵Kan oras na kan pagdolot kan pangbangging sakripisyo, nagtindog ako hale sa pagmondo asin mantang sulot ko pa an gisi kong gubing saka alikboy nagluhod ako asin initaas ko an sakong mga kamot sa pagpamibi sa Kagurangnan na sakuyang Dios.

⁶Nagsabi ako, “O Dios, nasosopog ako na iitaas an sakong lalawogon sa atubangan mo, huli ta mas halangkaw an samong mga kasalan ki sa samong mga payo, asin an samong karatan nakakaabot sagkod sa kalangitan.

⁷Poon pa kan aldaw kan samong mga ginikanan sagkod ngunyan, kami, na saimong banwaan, nagkasala na nin makuri. Huli kan samong mga kasalan, kami, an samong mga hade, asin mga padi nahulog sa kamot kan mga dayuhan na hade, ginadan, binihag asin sinamsaman. Napasopog kami sagkod ngunyan.

⁸Alagad ngunyan, O Kagurangnan, na samuyang Dios, sa kadikit na panahon naherak ka asin tinugotan mong makadulag sa kaoripnan an nagkapira samo asin tinugotan mong mag-erok na ligtas sa banal na lugar na ini. Pinadulag mo kami sa kaoripnan asin tinawan mo nin bagong buhay.

⁹Nagin mga oripon kami alagad dai mo itinugot na kami magin mga oripon sagkod pa man, kundi ipinaabot mo samo an danay mong pagkamoot sa atubang kan mga emperador nin Persia tanganing tugotan kaming mabuhay asin magtugdok giraray kan saimong Templo na narumpag, dangan makakua nin kaligtasan digdi sa Juda saka sa Jerusalem.

¹⁰“Alagad ngunyan, o samuyang Dios, ano an masasabi nyamo pakatapos kaini? Huli ta tinalikodan mi an saimong mga togon,

¹¹na itinao mo samo sa paagi kan mga propeta na saimong mga sorogoon. Sinabihan ninda kami na, “An daga na saindong lalaogon asin sasadirihon sarong maating daga. Magpoon sa sarong poro kaiyan sagkod sa saro pang poro, pano iyan nin mga tawo na naggigibo nin makauuyam na mga bagay.

¹²Kaya dai nindo ipagpaagom an saindong mga aking babae sa mga aki ninda, asin an saindong mga aking lalaki dai nindo pagpaagomon sa mga aki ninda. Dai nindo sinda pagtabangan na mag-uswag tanganing kumosog kamo saka magkakan kan bunga kan daga dangan ikapamana nindo iyan sa saindong mga aki sagkod pa man.’

¹³Maski pakatapos kan gabos na nangyari samo bilang padusa kan samong mga kasalan asin kasombikalan, aram nyamo na kulang pa nin marahay an padusa mo samo, O samuyang Dios, asin tinugotan mo pa kaming mabuhay.

¹⁴Lalapason pa daw giraray nyamo an saimong mga togon asin makipag-agoman sa mga tawong ini na naggigibo nin makauuyam na mga bagay? Kun gibohon mi iyan, maaanggot ka nin makuri samo asin tutunawon mo kami sagkod na mayo na nin matada samo.

¹⁵Matanos ka, O Kagurangnan na Dios nin Israel, huli ta may natada samong buhay. Ikinukumpisal nyamo saimo an samong mga kasalan; bako kaming maninigo na magdolok sa saimong atubang.”