Read Central Bicolano Nehemiah 1 Bible Online

Nehemiah 1 - Central Bicolano bible

Nehemiah 1

¹Iyo ini an talaan kan mga ginibohan ni Nehemias na aking lalaki ni Hacalias. Kan bulan nin Kislev, kan ikabeynteng taon kan pagigin emperador sa Persia ni Artajerjes, ako, si Nehemias, yaon duman sa Susa, an pangenot na syudad.

²Si Hanani, saro kan sakuyang mga tugang, nag-abot hale sa Juda kaiba an sarong grupo nin mga lalaki, asin hinapot ko sinda dapit sa Jerusalem saka manongod sa mga Judio na nakabalik hale sa pagtapokan sa Babilonia.

³Sinabihan ninda ako, “An mga natada sa probinsya na nakaligtas sa pagtapokan nasa dakulang kasakitan saka kasosopgan; narumpag an mga kudal nin Jerusalem asin an mga trangkahan kaini nasulo.”

⁴Pakadangog ko kaini, nagtukaw ako asin naghibi. Nagkapirang aldaw akong nagmondo saka nag-ayuno. Nagpamibi ako sa Dios,

⁵“O Kagurangnan, Dios nin langit, dakula saka ginagalangan na Dios na maimbod na nag-ootob kan tipan asin danay na namomoot sa mga namomoot saimo saka nagkukuyog kan saimong mga togon;

⁶hilinga ako, Kagurangnan, asin dangoga an sakong pamibi, siring kan sakong pagpamibi aldaw-banggi para sa saimong mga sorogoon, an banwaan nin Israel. Ikinukumpisal kong kami, an banwaan nin Israel, nagkasala saimo. Ako asin an sakuyang mga ginikanan nagkasala saimo.

⁷Nagin masombikal kami saimo asin dai mi kinuyog an mga togon saka mga pagboot na itinao mo huli sa saimong sorogoon na si Moises.

⁸Giromdoma an itinaram mo ki Moises, ‘Kun dai kamo magin maimbod, iwawarak ko kamo sa ibang nasyon.

⁹Alagad kun magbalik kamo sako asin magkuyog kan mga togon na itinao ko, titiponon ko kamo asin dadarahon sa lugar na pinili kong pagsambahan sako, maski pa magkawararak kamo sa mga poro nin kinaban.’

¹⁰“Kagurangnan, sinda an saimong mga sorogoon asin banwaan na tinubos kan saimong dakulang kapangyarihan saka kosog.

¹¹Dangoga an sakong pamibi asin an pamibi kan saimong mga sorogoon na boot mag-omaw saimo. Tawe nin marahay na resulta an lakaw ko ngunyan asin giboha na maherak sako an emperador.” Kan mga aldaw na idto ako an namamahala kan arak kan Hade.