Read Central Bicolano Nehemiah 10 Bible Online

Nehemiah 10 - Central Bicolano bible

Nehemiah 10

¹An enot na nagpirma iyo an gobernador na si Nehemias, na aking lalaki ni Hacalias, asin an sunod na nagpirma si Zedekias. Nagpirma man an mga minasunod:

²An mga padi: Seraias, Azarias, Jeremias, Pasur, Amarias, Malkias, Hattus, Sebanias, Malluc, Harim, Meremot, Obadias, Daniel, Ginneton, Baruc, Mesullam, Abias, Mijamin, Maazias, Bilgai, asin Semaias.

⁹An mga Levita: Jesua na aking lalaki ni Azanias, Binnui kan kamaganakan ni Henadad, Kadmiel, Sebanias, Odias, Kelita, Pelaias, Hanan, Mica, Rehob, Hasabias, Zaccur, Serebias, Sebanias, Odias, Bani, asin si Bininu.

¹⁴An mga lider kan banwaan: Paros, Pahat-moab, Elam, Zattu, Bani, Bunni, Azgad, Bebai, Adonias, Bigvai, Adin, Ater, Ezekias, Azzur, Odias, Hasum, Bezai, Harif, Anatot, Nebai, Magpias, Mesullam, Hezir, Mesezabel, Zadok, Jaddua, Pelatias, Hanan, Anaias, Oseas, Hananias, Hassub, Hallohes, Pilha, Sobek, Rehum, Hasabna, Maaseias, Ahias, Hanan, Anan, Malluk, Harim, asin si Baana.

¹⁵Kami, an banwaan nin Israel, an mga padi, mga Levita, mga bantay sa Templo, mga parakanta, mga trabahador sa Templo asin an gabos na nagsiblag sa mga dayuhan bilang pagsunod kan togon nin Dios, kaiba an samuyang mga agom, kaakian, patin an gabos na tatao nang magsabot,

¹⁶nakikisumaro sa samuyang mga lider sa pagsumpa na kami mamumuhay sosog sa Katogonan nin Dios, na itinao nin Dios huli ki Moises na saiyang sorogoon; na kukuyogon mi an gabos na pagboot samo nin Kagurangnan na samong Kagurangnan; na ootobon mi an gabos niyang katogonan asin pagsusundon; na mapapairarom kami sa sarong maldisyon kun lapason mi iyan.

¹⁷Dai kami makikipag-agoman sa mga dayuhan na nag-eerok sa samong daga.

¹⁸Kun an mga dayuhan magdara nin trigo o anoman na ipapabakal sa aldaw nin Sabbath o sa arin man na banal na aldaw, dai kami mabakal sainda. Sa lambang ikapitong taon, dai mi tatanoman an samong mga oma, asin paparaon mi an gabos na utang samo.

¹⁹Taon-taon, matao kami nin limang gramong plata para sa gastos kan Templo.

²⁰Para sa pagsamba sa Templo, matao kami kan mga minasunod: kan sagradong tinapay, kan dolot na pagkakan sa aroaldaw, kan mga hayop na tututongon sa aroaldaw, kan mga banal na dolot para sa aldaw na Sabbath, Pyesta kan Bagong Bulan, asin iba pang mga pyesta, kan iba pang banal na mga atang, kan mga dolot para sa kapatawadan kan mga kasalan nin Israel, asin iba pang mga kaipuhan sa Templo.

²¹Kami, an banwaan, an mga padi, mga Levita, magkakaigwa nin ripa taon-taon para sa kamaganakan na matao kan kahoy na gagamiton para sa pagtutong kan mga sakripisyo sa altar nin Kagurangnan na samuyang Dios, sosog sa nasusurat sa Katogonan.

²²Taon-taon, nanunuga kami na dadarahon mi sa Templo bilang dolot an mga enot na bunga kan samuyang daga asin mga kahoy.

²³An samong matuang aking lalaki dadarahon mi sa mga padi sa Templo tanganing ikonsagra sa Dios, sosog sa nasusurat sa Katogonan. Siring man idodolot nyamo an lambang matuang baka, karnero, asin kanding.

²⁴Dadarahon mi sa mga padi sa Templo an tinagba kan enot na trigo na samuyang inani, kan samuyang arak, lana nin oliba asin kan gabos na bunga nin kahoy. An himoloan kan samuyang mga tinanom itatao nyamo sa mga Levita, na iyo an nagkokolekta kaiyan sa samong mga banwa.

²⁵An mga padi na kapagarakian ni Aaron iyo an maiba sa mga Levita sa pagkolekta kan mga himoloan. An ikasampolong kabtang kan mga himoloan dadarahon kan mga Levita sa Templo, sa mga kwartong sarayan.

²⁶An gabos na dolot na trigo, arak saka lana nin oliba dadarahon kan banwaan nin Israel asin kan mga Levita, sa mga kwartong sarayan na namumugtakan kan mga kagamitan sa Templo. Digdi nag-eerok an mga padi na naglilingkod sa panahon na iyan, asin an mga bantay saka mga parakanta sa Templo. Dai nyamo papabayaan an Templo nin samuyang Dios.