Read Central Bicolano Nehemiah 11 Bible Online

Nehemiah 11 - Central Bicolano bible

Nehemiah 11

¹Nag-erok sa Jerusalem an mga lider kan banwaan, asin an iba nagripa tanganing magpili nin sarong pamilya, sa lambang grupo nin sampolong pamilya, na iyo an maerok sa banal na syudad nin Jerusalem, mantang an siyam na pamilya na dai napili duman maerok sa ibang mga syudad saka banwa.

²Inomaw kan mga tawo an lambang nagboluntad na mag-erok sa Jerusalem.

³An banwaan nin Israel, an mga padi, mga Levita, mga trabahador sa Templo asin an mga kapagarakian kan mga sorogoon ni Solomon nag-erok sa ibang mga banwa saka mga syudad sa sadiri nindang rogaring. Iyo ini an lista kan mga ginagalangan na mga namamanwaan sa probinsya nin Juda na nag-erok sa Jerusalem:

⁴An mga kaayon sa tribu ni Juda: Si Ataias, na aking lalaki ni Uzzias saka makoapo ni Zacarias. An iba niyang mga ginikanan iyo si Amarias, si Sefatias saka si Mahalalel, na mga kapagarakian ni Perez na aking lalaki ni Juda.

⁵Si Maaseias, na aking lalaki ni Baruc saka makoapo ni Colhoze. An iba niyang mga ginikanan iyo si Hazaias, si Adaias, si Joiarib, asin si Zacarias, na mga kapagarakian ni Shela na aking lalaki ni Juda.

⁶Sa mga kapagarakian ni Perez, kwatro syentos sesenta y otsong pangenot na kalalakihan an nag-erok sa Jerusalem.

⁷An mga kaayon sa tribu ni Benjamin: Si Sallu, na aking lalaki ni Mesullam saka makoapo ni Joed. An iba niyang mga kapagarakian iyo si Pedaias, Kolaias, Maaseias, Itiel, saka si Jesaias.

⁸Si Gabbai saka si Sallai na mga haraning kadugo ni Sallu. Nuebe syentos beynte y otso gabos na Benjaminita an nag-erok sa Jerusalem.

⁹Si Joel na aking lalaki ni Zikri iyo an namahala sainda, asin si Juda na aking lalaki ni Hassenua iyo an ikaduwang parapamahala kan syudad.

¹⁰An mga Padi: Si Jedaias, na aking lalaki ni Joiarib, asin si Jakin.

¹¹Si Seraias, na aking lalaki ni Hilkias saka makoapo ni Mesullam. An iba niyang mga ginikanan iyo si Zadok, si Meraiot, saka si Ahitub na iyo an Halangkaw na Padi.

¹²Otso syentos beynte y dos gabos na kaayon sa kamaganakan na ini an naglingkod sa Templo. Si Adaias, na aking lalaki ni Jeroham saka makoapo ni Pelalias. An iba niyang mga ginikanan iyo si Amzi, Zacarias, Pasur, saka Malkias.

¹³Dos syentos kwarenta y dos na kaayon sa kamaganakan na ini an pamayo nin mga pamilya. Si Amasai, na aking lalaki ni Azarel saka makoapo ni Azai. An iba niyang mga ginikanan iyo si Mesillemot asin si Immer.

¹⁴Syento beynte y otsong mga kaayon kan kamaganakan na ini an maiisog na mga soldados. An saindang pamayo iyo si Zabdiel na aki ni Haggedolim.

¹⁵An mga Levita: Si Semaias, na aking lalaki ni Hassub saka makoapo ni Azrikam. An iba pa niyang mga ginikanan iyo si Hasabias asin si Bunni.

¹⁶Si Sabbetai asin si Jozabad, na mga bantog na Levita, na namamahala kan patrabaho sa luwas kan Templo.

¹⁷Si Mattanias, na aking lalaki ni Mica saka makoapo ni Zabdi asin kapagarakian ni Asaf. Siya an namayo kan koro kan Templo sa pag-awit kan pamibi nin pasasalamat. Si Bakbukias, na katabang ni Matanias. Si Abda, na aking lalaki ni Sammua saka makoapo ni Galal, asin kapagarakian ni Jedutun.

¹⁸Dos syentos otsenta y kwatrong Levita an nag-erok sa banal na syudad nin Jerusalem.

¹⁹An mga bantay sa Templo: Si Akkub, si Talmon, asin an saindang mga kadugo; syento setenta y dos sinda gabos.

²⁰An iba sa mga Israelita asin an iba pang mga padi saka mga Levita duman nag-erok sa sadiri nindang rogaring, sa iba pang mga syudad saka mga banwa nin Juda.

²¹An mga trabahador sa Templo nag-erok sa sarong lugar sa Jerusalem na inapod Ofel, asin si Ziha saka si Gispa iyo an namahala sainda.

²²An namahala kan mga Levita na nag-erok sa Jerusalem iyo si Uzzi na aking lalaki ni Bani saka makoapo ni Hasabias. Kabilang sa mga ginikanan niya iyo si Mattanias saka Mica. Kaayon siya sa kamaganakan ni Asaf, na iyo an namahala kan musika sa gabos na paglingkod sa Templo.

²³Igwa nin mga pagboot an hade manongod sa aroaldaw na paglingkod kan mga kamaganakan na ini sa Templo.

²⁴Si Petahias, na aking lalaki ni Mesezabel, na kaayon sa kamaganakan ni Zera kan tribu ni Juda, iyo an nagrepresentar kan banwaan nin Israel sa atubang kan hade nin Persia.

²⁵Dakul sa mga tawo an nag-erok sa mga banwa na harani sa saindang mga oma. An mga gikan sa tribu nin Juda nag-erok sa Kiriat-arba, Dibon saka Jekabzeel, asin sa mga baryo na harani sa mga syudad na ini.

²⁶Nag-erok man sinda sa mga syudad nin Jesua, Molada, Betpelet,

²⁷Hazarsual, asin Beer-sheba saka sa mga baryo na nasa palibot kan mga ini.

²⁸Nag-erok sinda sa syudad nin Ziklag, sa Mecona asin sa mga baryo kaini,

²⁹sa Enrimmon, Zora, Jarmut,

³⁰Zanoa, Adullam, asin sa mga baryo na harani sa mga banwa na ini. Nag-erok sinda sa Lakis saka sa mga haraning oma, sa Azeka asin sa mga baryo kaini. Kaya an mga taga Juda nag-erok sa teritoryo magpoon sa Beer-sheba sagkod sa Kapantayan nin Hinnom.

³¹An mga gikan sa tribu ni Benjamin nag-erok sa teritoryo magpoon sa Geba sagkod sa Micmas, sa Ai, sa Betel asin sa mga baryo na harani digdi,

³²sa Anatot, Nob, Ananias,

³³Hazor, Rama, Gittaim,

³⁴Hadid, Zeboim, Neballat,

³⁵Lod, Ono, asin sa Kapantayan kan mga Paradibuho.

³⁶Nagkapira sa grupo nin mga Levita sa Juda an pinaerok sa kaibahan kan tribu ni Benjamin.