Read Central Bicolano Nehemiah 12 Bible Online

Nehemiah 12 - Central Bicolano bible

Nehemiah 12

¹Iyo ini an mga padi asin mga Levita na nagbalik hale sa pagtapokan kaiba ni Zerubabel, na aking lalaki ni Sealtiel saka ni Josue, na Halangkaw na Padi:

²An mga Padi: Seraias, Jeremias, Esdras, Amarias, Malluc, Hattus, Secanias, Rehum, Meremot, Iddo, Ginnetoi, Abias, Mijamin, Maadias, Bilga, Semaias, Joiarib, Jedaias, Sallu, Amok, Hilkias, asin Jedaias. Iyo ini an mga lider kan kapwa ninda mga padi kan panahon ni Josue.

⁸An mga Levita: An minasuronod iyo an namamahala kan pag-awit nin pasasalamat: si Jesua, Binnui, Kadmiel, Serebias, Juda, asin Matanias.

⁹An nag-awit kan simbag iyo si Bakbukias, si Unno, asin an kapwa ninda mga Levita.

¹⁰Si Josue iyo an ama ni Joiakim na ama ni Eliasib; si Eliasib iyo an ama ni Jehoiada,

¹¹na ama ni Jonatan, asin si Jonatan iyo an ama ni Jaddua.

¹²Kan si Joiakim iyo an Halangkaw na Padi, an mga padi na ini iyo an pamayo kan saindang kamaganakan: Padi Kamaganakan Meraias Seraias Hananias Jeremias Mesullam Esdras Jehohanan Amarias Jonatan Malluki Jose Sebanias Adna Harim Helkai Meraiot Zacarias Iddo Mesullam Ginneto Zikri Abias … Miniamin Piltai Moadias Sammua Bilga Jehonatan Semaias Matennai Joiarib Uzzi Jedaias Kallai Sallai Eber Amok Hasabias Hilkias Netanel Jedaias

²²Igwa nin nakasaray na listahan kan mga pamilya kan mga padi saka Levita sa bilog na pagkabuhay kan mga Halangkaw na Padi na si Eliasib, Jehoiada, Jonatan, asin Jaddua. Natapos an listahan na ini kan si Dario iyo an emperador nin Persia.

²³Alagad an listahan kan mga pamayo kan mga pamilya kan mga Levita ikinasurat sa Libro nin mga Cronica sa panahon sana ni Jonatan na makoapo ni Eliasib.

²⁴Pinaggrupo-grupo an mga Levita sa pamamahala ni Hasabias, Serebias, Jesua, Binnui, asin Kadmiel. Danay na igwa nin duwang grupo na nag-oomaw asin nagpapasalamat sa Dios, sosog sa katukdoan na itinao ni Hadeng David, an sorogoon nin Dios. Sarong grupo an nag-awit kan mga pag-omaw asin pasalamat; an ikaduwang grupo an nag-awit kan mga simbag.

²⁵An mga bantay sa Templo na namamahala sa pagbantay kan mga kwartong sarayan iyo si Mattanias, Bakbukias, Obadias, Mesullam, Talmon, asin Akkub.

²⁶An mga tawong ini nagkaburuhay kan panahon ni Joiakim na aking lalaki ni Josue saka makoapo ni Jehozadak, kan panahon kan gobernador na si Nehemias asin kan panahon ni Esdras, an padi na paratukdo kan Katogonan.

²⁷Kan ikonsagra an kudal kan syudad nin Jerusalem, ipinaapod an gabos na Levita sa manlaen-laen na lugar na saindang pinag-eerokan tanganing makaiba sa selebrasyon na pano nin kaogmahan asin pasasalamat, kaiba an mga awit sa tanog nin mga gimbal, mga arpa, saka mga lira.

²⁸Nakisumaro man sa selebrasyon an mga pamilya kan mga paraawit na Levita, hale sa lugar na saindang pinag-eerokan sa palibot nin Jerusalem, asin sa mga banwa sa palibot nin Netofa,

²⁹hale sa Bet-gilgal, Geba, saka Azmavet.

³⁰Ginibo kan mga padi saka mga Levita an seremonya nin paglinig para sa sadiri, sa mga tawo, sa mga trangkahan, asin kudal kan syudad.

³¹Ipinag-iba ko sa ibabaw kan kudal an mga lider nin Juda dangan binanga ko sinda sa duwang grupo tanganing magprosesyon sa palibot kan syudad sa pagpasalamat sa Dios. An enot na grupo luminakaw patoo sa ibabaw kan kudal pasiring sa Trangkahan nin Ati.

³²Kasunod kan grupong ini iyo si Hosaias, kaiba an kabanga kan mga lider nin Juda.

³³Sunod sainda iyo an mga padi na nagpapatanog kan mga trompeta: si Azarias, Esdras, Mesullam, Juda, Benjamin, Semaias, saka si Jeremias. Dangan sunod si Zacarias na aking lalaki ni Jonatan saka makoapo ni Semaias. (Kabilang sa mga ginikanan niya iyo si Mattanias, Micaias, asin Zaccur, kan kamaganakan ni Asaf.)

³⁶Kasunod ni Zacarias an iba pang kaayon kan saiyang kamaganakan na iyo si Semaias, Azarel, Milalai, Gilalai, Maai, Netanel, Juda, asin Hanani, na gabos igwa nin darang instrumento sa pagtugtog arog kan mga ginamit ni Hadeng David, an sorogoon nin Dios. An namayo kan grupong ini iyo si Esdras, na paratukdo kan Katogonan.

³⁷Nagpadagos an grupong ini sa Trangkahan nin Burabod, nagsakat sa hagdan na pasiring sa Syudad ni David, nag-agi sa palasyo ni David, dangan nagbalik sa kudal na harani sa Trangkahan nin Tubig, sa sirangan na parte kan syudad.

³⁸Nagpasiring sa wala sa ibabaw kan kudal an saro pang grupo na nagpasalamat sa Dios, asin nagsunod ako sa grupong ini, kaiba an kabanga kan mga tawo. Inagihan mi an Tore nin mga Horno, kan pasiring kami sa Mahiwas na Kudal.

³⁹Hale duman inagihan mi an Trangkahan ni Efraim, an Daan na Trangkahan, an Trangkahan nin Sira, an Tore ni Hananel, asin an Tore kan Sanggatos, dangan nagpasiring kami sa may Trangkahan kan Karnero. Nag-ontok kami sa may trangkahan pasiring sa Templo.

⁴⁰Kaya an duwang grupo nagsabatan sa atubangan kan Templo. Laen pa kan mga opisyal na nag-iba sako,

⁴¹kabilang man sa grupo mi an mga pading ini na nagpapatanog nin trompeta: si Eliakim, Maaseias, Miniamin, Micaias, Elioenai, Zacarias, asin Hananias.

⁴²Kasunod ninda si Maaseias, Semaias, Eleazar, Uzzi, Jehohanan, Malkias, Elam, asin Ezer. Nagkanta an koro sa pamayo ni Jezrahias.

⁴³Kan aldaw na idto, nagdolot sinda nin mga sakripisyo asin nag-ogma huli ta tinawan sinda nin Dios nin labi-labing kaogmahan. Nag-ogma man an mga babae asin an mga aki. An ribok kan saindang pag-ogma nadangog maski sa harayong lugar.

⁴⁴Kan aldaw na idto, may mga lalaki na ibinugtak na namamahala kan mga kwartong sarayan kan mga kontribusyon, mga tinagba asin mga himoloan sa taon-taon. Sinda an nag-ako kan mga kahirasan hale sa mga oma na harani sa manlaen-laen na syudad para sa mga padi saka mga Levita, sosog sa hinahagad kan Katogonan. Nawilihan kan bilog na banwaan nin Juda an mga padi saka mga Levita,

⁴⁵huli ta ginibo kan mga ini an saindang katongdan nin paglingkod sa Dios asin paglinig kan sadiri, sosog sa kabotan nin Dios. An mga parakanta asin an mga bantay kan Templo naggibo man kan saindang katongdan sosog sa ipinagboot ni David asin ni Solomon na aki kaini.

⁴⁶Magpoon kan panahon ni David saka ni Asaf, an mga parakanta iyo an nangenot sa mga awit nin pag-omaw saka pagpasalamat sa Dios.

⁴⁷Kan panahon ni Zerubabel asin kan panahon ni Nehemias, an bilog na banwaan nin Israel aroaldaw nagtatao nin mga regalo para sa mga parakanta asin para sa mga bantay kan Templo. Nagtao man sinda nin sagradong dolot sa mga Levita, asin an mga ini nagtao kan maninigong kahirasan para sa mga padi.