Read Central Bicolano Nehemiah 13 Bible Online

Nehemiah 13 - Central Bicolano bible

Nehemiah 13

¹Kan basahon sa mga tawo an Katogonan ni Moises, nabasa ninda digdi na ipinapangalad sa kiisay man na Ammonita o Moabita na mag-ayon sa banwaan nin Dios;

²huli ta an mga taga Ammon saka mga taga Moab dai nagtao nin pagkakan asin tubig sa mga Israelita pakahale kaini sa Egipto. Embes kaiyan, binayadan ninda si Balaam tanganing maldisyonon an mga Israelita. Alagad an maldisyon na ini ginibo nin Dios na sarong bendisyon.

³Pakadangog kan mga Israelita kan Togon na ini, isinuhay ninda sa komunidad an gabos na dayuhan.

⁴Marahay kaidto an pakiiba ki Tobias kan padi na si Eliasib, na namamahala kan mga kwartong sarayan kan Templo.

⁵Tinugotan niya si Tobias na gamiton an sarong kwarto na sarayan kaidto kan mga dolot na pagkakan saka insenso, kan kagamitan sa Templo, kan mga dolot para sa mga padi, saka kan mga tinagba nin trigo, arak patin lana nin oliba na itinao sa mga Levita, sa mga parakanta asin sa mga bantay sa Templo.

⁶Kan nangyari ini, mayo ako sa Jerusalem huli ta kan ikatreynta y dos na taon kan pagigin emperador ni Artajerjes sa Babilonia, nagbalik ako sa hade. Dai nahaloy, nagpaaram ako sa emperador

⁷asin nagbalik ako sa Jerusalem. Dangan ko naaraman an salang gibo ni Eliasib sa pagtugot ki Tobias na gamiton an sarong kwarto sa Templo.

⁸Naanggot ako asin itinapok ko sa luwas an gabos na kagamitan ni Tobias.

⁹Dangan nagboot ako na linigan an mga kwarto asin ibalik sa laog kan Templo an mga kagamitan, an mga dolot na pagkakan saka an insenso.

¹⁰Naaraman ko man na an mga parakanta asin an ibang mga Levita nagbalik sa saindang mga oma, huli ta dai sinda tinawan kan mga tawo kan saindang kahirasan.

¹¹Inanggotan ko an mga opisyal huli ta pinabayaan ninda an Templo. Dangan pinabalik ko sa Templo asin sa saindang mga trabaho an mga parakanta saka an mga Levita.

¹²Dangan an mga tawo nagdara giraray nin mga himoloan na trigo, arak saka lana nin oliba saka ilinaog sa mga kwartong sarayan.

¹³Bilang parapamahala kan mga kwartong sarayan, ibinugtak ko si Selemias na sarong padi, si Zadok na sarong paratukdo kan Katogonan, asin si Pedaias na sarong Levita. Si Hanan na aking lalaki ni Zaccur saka makoapo ni Mattanias iyo an katabang ninda. Aram kong an mga tawong ini maimbod sa paghiras ninda kan mga kakanon para sa saindang mga tugang.

¹⁴Giromdoma, Dios ko, an mga ginibo kong ini para sa saimong Templo asin sa paglingkod diyan.

¹⁵Kan mga aldaw na idto, nakahiling ako nin mga tawo na nagtatrabaho sa pugaan nin ubas sa aldaw na Sabbath. An iba nagdadara nin mga trigo, arak, ubas, higera, asin iba pang mga bagay na ilinulunad ninda sa mga asno dangan dinadara sa Jerusalem. Pinatanidan ko sinda na dai magpabakal nin anoman kun Sabbath.

¹⁶May mga taga Tiro, na nag-erok sa Jerusalem an nagdadara man nin sira asin iba pang mga kagamitan dangan ipinapabakal ninda sa mga tawo sa aldaw na Sabbath.

¹⁷Inanggotan ko an mga lider nin Juda asin sinabihan, “Ano ining karatan na ginigibo nindo? Dai nindo pinapabanal an Sabbath!

¹⁸Dai nindo aram na an gaweng ini kan saindong mga ginikanan an dahelan kan pagpadusa nin Dios sa syudad na ini? Alagad mas makuring kaanggotan nin Dios an boot nindong darahon sa Israel huli kan paglapas nindo kan Sabbath.”

¹⁹Kaya nagboot ako na serahan an mga trangkahan kan syudad sa lambang pagpoon kan Sabbath, kun magbabanggi, asin dai iyan pagbukasan sagkod na dai pa natatapos an Sabbath. Nagbugtak ako sa mga trangkahan nin nagkapira sa sakong mga tawohan tanganing dai nin anoman na ikalaog na mga ititinda sa syudad kun aldaw nin Sabbath.

²⁰Makasaro o makaduwang beses, na nagpalihis kan banggi sa luwas kan kudal kan syudad an mga negosyanteng nagpapabakal nin manlaen-laen na kagamitan.

²¹Pinatanidan ko sinda, “Mayo nin mangyayari sa saindong pagpaaga diyan sa luwas kan kudal. Kun gibohon pa nindo iyan, mapipiritan akong gamitan kamo nin kosog!” Poon kaidto, dai na sinda nagbalik kun Sabbath.

²²Pinagbotan ko an mga Levita na maglinig kan sadiri dangan magduman saka magbantay sa mga trangkahan tanganing mapabanal nanggad an Sabbath. Giromdoma ako, Dios ko, para sa bagay na ini, asin iligtas mo ako sosog sa kadakulaan kan danay mong pagkamoot.

²³Kan mga aldaw na idto, naaraman ko na dakul sa mga Judio an nag-agom nin mga babaeng taga Asdod, Ammon, asin Moab.

²⁴An kabanga sa saindang kaakian nagtataram kan lengwahe nin Asdod o iba pang lengwahe asin dai tatao kan sadiri ming lengwahe.

²⁵Sinagwe ko sinda, pinatakot nin mga maldisyon, hinampak asin rinabnotan nin buhok. Dangan pinasumpa ko sinda sa ngaran nin Dios na dai ninda ipagpaagom asin pagpaagomon sa mga dayuhan an saindang mga aki.

²⁶Sinabihan ko sinda, “Mga dayuhan na babae an nagin dahelan kan pagkasala ni Hadeng Solomon. Sa gabos na hade sa ibang nasyon mayo nin hade na mas nagin dakula ki sa saiya. Namotan siya nin Dios saka ginibong hade kan bilog na Israel, alagad nagkasala siya huli sa mga dayuhan na babae.

²⁷Dapat daw nyamo kamong dangogon, gibohon an dakulang karatan na ini asin dai magkuyog sa satong Dios huli sa pag-agom nin mga dayuhan na babae?”

²⁸Si Jehoiada na aki ni Eliasib na Halangkaw na Padi, igwa nin sarong aki na nag-agom sa aking babae ni Sanballat na taga Bet-horon, kaya pinahale ko si Jehoiada sa Jerusalem.

²⁹Giromdoma, Dios ko, kun paano dinigtaan kan mga tawong idto an katongdan nin pagkapadi asin an tipan na ginibo mo sa mga padi saka sa mga Levita.

³⁰Lininigan ko an banwaan sa gabos na digta nin dayuhan, asin ginibo ko an mga pagsusundon kan mga padi saka mga Levita sa paggibo kan saindang katongdan.

³¹Ihinusay ko an pagdadara kan mga kahoy para sa mga atang sa talaan na mga panahon, siring man an pagdadara kan mga tawo kan trigo, saka enot na mga bunga nin kahoy. Giromdoma an gabos na ini, Dios ko, asin itao mo sako an maninigong balos.