Read Central Bicolano Nehemiah 2 Bible Online

Nehemiah 2 - Central Bicolano bible

Nehemiah 2

¹Pakalihis nin apat na bulan, kan nagkakakan an emperador na si Artajerjes sarong aldaw kan bulan nin Nisan, dinarahan ko siya nin arak. Dai pa lamang niya ako nahiling na mamondo kaidto,

²kaya hinapot niya ako, “Tano ta mamondo ka? Mayo ka man nin helang, kaya daing duwa-duwa na bako kang maogma.” Nabigla ako saka

³nagsimbag, “Mabuhay logod sagkod lamang an mahal na emperador! Tadaw ta dai ako magmondo mantang rumpag an syudad na pinaglubongan kan sakong mga ginikanan, asin nasulo an mga trangkahan kaiyan?”

⁴Hinapot ako kan hade, “Ano an boot mo?” Namibi ako sa Dios nin langit,

⁵dangan nagsabi ako sa emperador, “Kun pagmarahayon mo, asin kun nawilihan mo ako, tugotan mo akong magduman sa Juda, sa syudad na namumugtakan kan mga lulubngan kan sakong mga ginikanan, tanganing patindogon ko giraray an syudad.”

⁶An emperador na kaidto nakatukaw na kataed an reyna, nagtugot sa kahagadan ko. Hinapot niya ako kun mahahaloy ako sa Juda saka kun nuarin ako mabalik, kaya sinabihan ko siya.

⁷Nagsabi pa ako sa emperador, “Kun pagmarahayon mo, tawe ako nin mga surat para sa mga gobernador kan probinsya sa ibong kan Salog nin Eufrates, tanganing tugotan ninda akong mag-agi sagkod na makaabot ako sa Juda.

⁸Tawe man ako nin sarong surat para ki Asaf, na paraataman kan kadlagan kan hade, tanganing tawan niya ako nin kahoy para sa mga trangkahan kan bantayan kan Templo, asin para sa mga kudal kan syudad patin para sa harong na sakong eerokan.” Itinao kan hade an gabos kong hinagad huli ta inibahan ako nin Dios.

⁹Pinaibahan ako kan emperador nin nagkapirang opisyal kan hukbo asin mga lalaking nangangabayo. Nakaabot ako sa probinsya sa ibong kan Salog nin Eufrates dangan itinao ko an mga surat kan emperador sa mga gobernador duman.

¹⁰Nabaretaan ni Sanballat na taga Bet-horon asin ni Tobias na sarong opisyal sa probinsya nin Ammon, na igwang nagdatong tanganing magtrabaho para sa karahayan kan Israelita asin naanggot sinda nin makuri.

¹¹Nagdagos ako sa Jerusalem asin sa laog nin tolong aldaw,

¹²dai ko sinabi maski kiisay an ipinasabong sako nin Dios na gibohon ko para sa Jerusalem. Dangan sa kamatangaan nin banggi, nagbangon ako saka nagluwas kaiba an nagkapirang lalaki. An dara ming hayop iyo sana an asno na sakong linunadan.

¹³Banggi pa kan ako magluwas asin mag-agi sa Trangkahan nin Kapantayan na nasa solnopan dangan nagpasiring ako sa habagat sa Burabod nin Dragon sagkod sa Trangkahan nin mga Ati. Siniyasat ko an narumpag na mga kudal kan syudad asin an nasulong mga trangkahan.

¹⁴Dangan nagpasiring ako sa Trangkahan nin Burabod asin sa Sapa kan hade, alagad an asno na sakong nalulunadan mayong maagihan sa mga ragpa.

¹⁵Kaya naglugsot ako sa Kapantayan nin Kidron asin siniyasat ko an kudal. Kan magbalik ako sa syudad nag-agi giraray ako sa Trangkahan nin Kapantayan.

¹⁶Dai naaraman kan mga opisyal kun saen ako hale asin kun ano an sakong ginibo. Mayo ako nin tinaraman na anoman sa mga Judio, sa mga padi, sa mga lider, sa mga opisyal, asin sa gabos na tawong matarabang sa trabaho.

¹⁷Alagad ngunyan sinabihan ko sinda, “Nahiling nindo an kasakitan ta ngunyan huli ta rumpag pa an Jerusalem asin raot pa an mga trangkahan kaini! Kaya, patindogon ta giraray an kudal kan syudad tanganing matapos na an satuyang kasosopgan.”

¹⁸Dangan sinabihan ko sinda kun paano ako inibahan saka tinabangan nin Dios, asin kun ano an sinabi sako kan emperador. Nagsimbag sinda, “Poonan ta na an trabaho!” Kaya sinda nag-andam sa pagtrabaho.

¹⁹Kan madangog ini ni Sanballat kan Bet-horon, ni Tobias na opisyal kan Ammon asin ni Gesem na Arab, nginisihan ninda kami. Nagtutuyatuya sindang nagsabi, “Ano sa paghona nindo an saindong ginigibo? Marebelde kamo laban sa emperador?”

²⁰Nagsimbag ako, “An Dios nin Langit iyo an mapauswag samo. Mga sorogoon niya kami asin popoonan mi an pagtugdok. Alagad mayo kamo nin deretso sa anoman na pagsadiri sa Jerusalem asin mayo kamo nin kahirasan sa mga tradisyon kaiyan.”