Read Central Bicolano Nehemiah 3 Bible Online

Nehemiah 3 - Central Bicolano bible

Nehemiah 3

¹Arog kaini an paghirahay ninda sa naraot na kudal. An Halangkaw na Padi na si Eliasib asin an kapwa niya mga padi an naghirahay kan Trangkahan nin Karnero, nagkonsagra kaiyan asin nagbugtak kan mga trangkahan. Kinonsagra ninda an kudal sagkod sa Tore kan Sanggatos asin sa Tore ni Hananel.

²An mga lalaking taga Jerico iyo an naghirahay kan sunod na kabtang. Si Zaccur na aking lalaki ni Imri iyo man an naghirahay kan sunod na kabtang.

³An kamaganakan ni Hassenaa iyo an naghirahay kan Trangkahan nin Sira. Ibinugtak ninda an mga kahalabaan asin an mga trangkahan sa tamang lugar dangan ibinugtak man ninda an mga barat saka mga bisagra kaini.

⁴An naghirahay kan sunod na kabtang iyo si Meremot na aking lalaki ni Urias asin makoapo ni Hakkoz. An sunod na kabtang hinirahay ni Mesullam, na aking lalaki ni Berekias asin makoapo ni Mesezabel. Si Zadok na aking lalaki ni Baana iyo an naghirahay kan sunod na kabtang.

⁵An naghirahay kan sunod na kabtang iyo an mga lalaking taga Tekoa, alagad an mga lider kan banwang ini nagsayumang maggibo kan trabahong itinao sainda kan mga parapamahala.

⁶An naghirahay kan Daan na Trangkahan iyo si Jehoiada na aking lalaki ni Pasea asin si Mesullam na aking lalaki ni Besodeias. Ibinugtak ninda an mga kahalabaan, an mga trangkahan, mga barat saka mga bisagra kaini.

⁷Si Melatias na taga Gibeon, si Jadon na taga Meronot asin an kalalakihan kan Gibeon saka Mizpa iyo an naghirahay kan sunod na kabtang, sagkod sa erokan kan gobernador kan probinsya sa ibong kan Salog nin Eufrates.

⁸An sunod na kabtang hinirahay ni Uzziel na aking lalaki ni Harhaias, na sarong alahero. Si Hananias, na sarong paragibo nin mga pahamot, iyo an naghirahay kan sunod na kabtang sagkod sa Halakbang na Kudal.

⁹An sunod na kabtang hinirahay ni Refaias na aking lalaki ni Hur asin kagsakop kan kabanga kan Distrito nin Jerusalem.

¹⁰Si Jedaias na aking lalaki ni Harumaf an naghirahay kan sunod na kabtang na kahampang kan saiyang harong. An sunod na kabtang hinirahay ni Hattus na aking lalaki ni Hasabneias.

¹¹Si Malkias na aking lalaki ni Harim asin Hassub na aking lalaki ni Pahat-moab iyo an naghirahay kan sunod na kabtang asin kan Tore kan mga Horno.

¹²An sunod na kabtang hinirahay ni Sallum na aking lalaki ni Hallohes na kagsakop kan kabanga kan Distrito nin Jerusalem. Kaiba niya sa pagtrabaho an saiyang mga aking babae.

¹³An nagtrabaho kan Trangkahan kan Kapantayan iyo si Hanun asin an mga nag-eerok sa syudad nin Zanoa. Hinirahay ninda ini, asin ibinugtak an mga trangkahan, an mga barat, saka mga bisagra. Hinirahay ninda an kudal na may labang kwatro syentos kwarenta metros sagkod sa Trangkahan nin mga Ati.

¹⁴An naghirahay kan Trangkahan nin mga Ati iyo si Malkias na aking lalaki ni Recab, na kagsakop kan Distrito nin Bet-hakerem. Hinirahay niya ini asin ibinugtak an mga trangkahan, an mga barat, saka an mga bisagra.

¹⁵An Trangkahan nin Burabod hinirahay ni Sallum na aking lalaki ni Colhoze, na kagsakop kan Distrito nin Mizpa. Inatopan niya an Trangkahan dangan ibinugtak an mga pinto, an mga barat, saka mga bisagra. Itinugdok niya an kudal kan Tangke nin Tubig nin Shela sa kataed kan tatamnan kan hade, sagkod sa mga paibabang hagdan kan Syudad ni David.

¹⁶Si Nehemias, na aking lalaki ni Azbuk na kagsakop kan kabanga kan Distrito nin Bet-zur, iyo an naghirahay kan sunod na kabtang, sagkod sa lulubngan ni David, sa tangke nin tubig asin sa harong kan mga soldados.

¹⁷An mga Levitang ini iyo an naghirahay kan mga masunod na kabtang kan kudal: Si Rehum na aking lalaki ni Bani iyo an naghirahay kan sunod na kabtang; Si Hasabias, na kagsakop kan kabanga kan Distrito nin Keila, iyo an naghirahay kan sunod na kabtang;

¹⁸An sunod na kabtang hinirahay ni Bavvai na aking lalaki ni Henadad asin kagsakop kan kabanga kan distrito nin Keila;

¹⁹Si Ezer na aking lalaki ni Jesua, na kagsakop kan Mizpa, iyo an naghirahay kan sunod na kabtang na kahampang kan lugar na sarayan kan mga armas, sagkod sa pagliko kan kudal;

²⁰An sunod na kabtang hinirahay ni Baruc na aking lalaki ni Zabbai, magpoon sa pagliko kan kudal sagkod sa pintoan kan harong kan Halangkaw na Padi na si Eliasib;

²¹Si Meremot, na aking lalaki ni Urias asin makoapo ni Hakkoz, iyo an naghirahay kan sunod na kabtang sagkod sa poro kan harong ni Eliasib.

²²An mga pading ini iyo an naghirahay kan mga masunod na kabtang kan kudal: An mga padi na nag-erok sa palibot nin Jerusalem iyo an naghirahay kan sunod na kabtang;

²³Si Benjamin saka si Hassub iyo an naghirahay kan sunod na kabtang na kahampang kan saindang mga harong; Si Azarias, na aking lalaki ni Maaseias asin makoapo ni Ananias, iyo an naghirahay kan sunod na kabtang na kahampang kan saiyang harong;

²⁴Si Binnui, na aking lalaki ni Henadad iyo an naghirahay kan sunod na kabtang, magpoon sa harong ni Azarias sagkod sa pagliko kan kudal.

²⁵Si Palal, na aking lalaki ni Uzai, iyo an naghirahay kan sunod na kabtang, magpoon sa kanto kan kudal asin kan tore kan itaas na kabtang kan palasyo kan hade, harani sa patyo kan bantay. Si Pedaias, na aking lalaki ni Paros, iyo an naghirahay kan sunod na kabtang, sagkod sa parte sa sirangan na harani sa Trangkahan kan Tubig asin sa toreng nagbabantay kan Templo. (Harani ini sa kabtang kan syudad na inapod Ofel, na pinag-erokan kan mga trabahador sa Templo.)

²⁷An mga lalaki na taga Tekoa iyo an naghirahay kan sunod na kabtang, magpoon sa lugar na kahampang kan dakulang tore na nagbabantay kan Templo sagkod sa kudal na harani sa Ofel; iyo ini an ikaduwang kabtang na hinirahay ninda.

²⁸Sarong grupo nin mga padi an naghirahay kan sunod na kabtang, magpoon sa Trangkahan kan Kabayo pasiring sa parteng amihan; an lambang saro iyo an naghirahay kan kabtang kan kudal na kahampang kan saiyang sadiring harong.

²⁹Si Zadok, na aking lalaki ni Immer, iyo an naghirahay kan sunod na kabtang, na kahampang kan saiyang sadiring harong. An sunod na kabtang hinirahay ni Semaias na aking lalaki ni Secanias, an paraataman kan Trangkahan sa Sirangan.

³⁰Si Ananias na aking lalaki ni Selemias saka si Hanun na ikaanom na aking lalaki ni Zalaf iyo an naghirahay kan sunod na kabtang; ini an ikaduwang kabtang na hinirahay ninda. Si Mesullam, na aking lalaki ni Berekias, iyo an naghirahay kan sunod na kabtang, na kahampang kan saiyang sadiring harong.

³¹Si Malkias na alahero an naghirahay kan sunod na kabtang, sagkod sa edipisyo na ginamit kan mga trabahador sa Templo asin kan mga negosyante. An edipisyong ini kahampang kan Trangkahan nin Mifkad, harani sa itaas na kwarto na nasa kanto kan kudal.

³²An mga alahero saka an mga negosyante iyo an naghirahay kan huring kabtang, magpoon sa itaas na kwarto na nasa kanto kan kudal sagkod sa Trangkahan kan Karnero.