Read Central Bicolano Nehemiah 4 Bible Online

Nehemiah 4 - Central Bicolano bible

Nehemiah 4

¹Kan madangog ni Sanballat na pinapatindog mi giraray an kudal, naanggot siya asin tinuyatuya niya an mga Judio.

²Sa atubangan kan saiyang mga kairiba asin kan hukbo nin Samaria, nagsabi siya, “Ano an ginigibo kan mga maluluyang Judiong ini? Boot daw nindang patindogon giraray an syudad? Naghohona daw sinda na kun magdolot sinda nin sakripisyo, matatapos ninda an trabaho sa laog nin saro sanang aldaw? Makakagibo daw sinda nin mga gapo hale sa tambak nin sinulong ragpa?”

³Nagsabi man si Tobias na Ammonita na nakatindog sa kataed niya, “Anong klaseng kudal an itutugdok ninda? Marurumpag sana iyan kun sakatan nin sarong lobo!”

⁴Namibi ako, “O Dios, dangoga an pagtuyatuya ninda samo; mahulog logod sa saindang payo an saindang paglibak. Mahabon logod an gabos nindang rogaring saka madara sinda bilang mga bihag sa dayuhan na daga.

⁵Hare pagpatawada an saindang gibong maraot asin hare paglingawe an saindang mga kasalan, huli ta ininsulto ninda kami na nagtutugdok.”

⁶Kaya ipinadagos mi an paghirahay kan kudal; dai nahaloy naabot mi an kabangaan kan langkaw kaini, huli ta bilog an boot kan mga tawo sa pagtrabaho.

⁷Naanggot nin makuri si Sanballat, si Tobias, asin an mga Arab, mga Ammonita, saka an mga Asdodita kan madangog ninda na padagos an paghirahay mi kan mga kudal nin Jerusalem asin na nagkasurulat mi na an mga labot kaini.

⁸Kaya nagplano sinda gabos na dumanon asin salakayon an Jerusalem tanganing maggibo nin karibokan.

⁹Alagad namibi kami sa samuyang Dios dangan nagbugtak kami nin mga bantay laban sainda aldaw-banggi.

¹⁰Nag-awit an mga taga Juda: “Sa gabat kan mga dara kami pinanruluya; kadakul nin marahay kan ati na hahaleon, kaya paano ming mahihirahay an kudal ngunyan na aldaw?”

¹¹Naghona an samuyang mga kaiwal na dai mi sinda mahihiling ni maaaraman an nangyayari sagkod na makaharani sinda, gadanon kami asin ontokon an trabaho.

¹²Alagad danay kaming pinatanidan kan mga Judio na nag-eerok sa kaibahan kan samong mga kaiwal manongod sa mga plano kan mga ini na pagsalakay samo.

¹³Kaya sa mga kabtang kan kudal na dai pa tapos, nagbugtak ako nin mga bantay sa likod kan kudal, sosog sa saindang mga kamaganakan, na an mga ini may mga armas na espada, garod, saka mga pana.

¹⁴Nahiling kong nahandal an mga tawo, kaya sinabihan ko sinda asin an saindang mga lider saka mga opisyal, “Dai kamo matakot sainda. Giromdoma nindo an Kagurangnan, dakula asin makangirhat siya. Ipaglaban nindo an saindong mga tugang, an saindong mga kaakian, an saindong mga agom saka mga harong.”

¹⁵Nabaretaan kan samong mga kaiwal na naisihan mi an saindang mga plano asin nahiling ninda na dai ini pinapangyari nin Dios. Dangan nagbalik kami gabos sa kudal, lambang saro sa saiyang trabaho.

¹⁶Magpoon kan aldaw na idto, an kabanga kan sakong tawohan nagtrabaho mantang an kabanga nagbantay na armado nin garod, kalasag, saka mga pana asin nakasulot kan gubing na panggera. An mga lider nakidumamay man sa mga tawo,

¹⁷na naghihirahay kan kudal. An mga nagdadara kan mga kagamitan nagtatrabaho na dara an karga sa sarong kamot asin an armas sa saro pang kamot.

¹⁸An mga paratugdok igwa man nin espada sa saindang habayan mantang nagtatrabaho. Kataed ko an paratrompetang andam sa pagtao nin alarma.

¹⁹Sinabihan ko an mga tawo, an mga lider, saka an mga opisyal, “Dakula saka mahiwas an satuyang pinagtatrabahoan sa kudal asin siriblag kita sa lambang saro.

²⁰Kun madangog nindo an tanog kan trompeta, magdaralagan kamo pasiring sako. An satuyang Dios an makikilaban para sato.”

²¹Kaya aroaldaw, poon aga sagkod pagtunga kan mga bitoon sa banggi, an kabanga nagtrabaho sa kudal mantang an kabanga nagbantay na may darang mga garod.

²²Sinabihan ko pa kaidto an mga lalaking namamahala na sinda asin an gabos nindang katabang maontok kun banggi sa Jerusalem tanganing mabantayan mi an syudad kun banggi asin makapagtrabaho kun aldaw.

²³Kaya dai na ako naghuba nin gubing maski kun banggi, siring man an sakong mga kairiba, mga sorogoon, saka an sakong mga bantay; an lambang saro samo danay na may darang armas.