Read Central Bicolano Nehemiah 9 Bible Online

Nehemiah 9 - Central Bicolano bible

Nehemiah 9

¹Kan ikabeynte y kwatrong aldaw kan bulan na idto, nagtiripon an banwaan nin Israel sa pag-ayuno asin pagmondo para sa saindang mga kasalan. Nagsulot sinda nin sako saka nagbugtak nin daga sa saindang mga payo bilang tanda nin pagmondo.

²Nagsiblag an mga Israelita sa gabos na dayuhan, dangan nagtindog sinda saka nagkumpisal kan saindang mga kasalan asin kan kasalan kan saindang mga ginikanan.

³Sa laog nin tolong oras binasa sainda an Katogonan nin Kagurangnan na saindang Dios; an sunod na tolong oras ginamit ninda sa pagkumpisal kan saindang mga kasalan asin sa pagsamba sa Kagurangnan na saindang Dios.

⁴Igwa nin plataporma para sa mga Levita asin duman tuminindog si Jesua, si Bani, si Kadmiel, si Sebanias, si Bunni, si Serebias, si Bani, asin si Kenani; namibi sinda nin makosog sa Kagurangnan na saindang Dios.

⁵Dangan nagsabi an mga Levita na si Jesua, Kadmiel, Bani, Hasabneias, Serebias, Odias, Sebanias, asin Petahias; “Magtirindog kamo asin mag-omaw sa Kagurangnan na saindong Dios, sa panahon na daing kasagkoran! Omawon an mamurawayon niyang ngaran na ilinangkaw sa ano man na bendisyon asin kaomawan.”

⁶Dangan an banwaan nin Israel namibi nin siring: “Kagurangnan, ika sana an Kagurangnan; linalang mo an kalangitan asin an mga bitoon sa kaitaasan. Linalang mo an daga saka an dagat, asin an gabos na yaon diyan; ika an nagtao nin buhay sa gabos. An langitnon na hukbo nagsasamba saimo.

⁷Ika, Kagurangnan Dios, an nagpili ki Abram asin nagkua saiya hale sa Ur sa Babilonia; rinibayan mo an saiyang ngaran nin Abraham.

⁸Nahiling mo na maimbod siya saimo, kaya nakipagtipan ka saiya. Nanuga ka saiya na itatao mo sa saiyang kapagarakian an daga kan mga Cananeo, mga Heteo, mga Amoreo, mga Pereseo, mga Jebuseo, asin mga Gergeseo. Inotob mo an saimong panuga, huli ta ika matanos.

⁹“Nahiling mo an kasakitan sa Egipto kan samong mga ginikanan; nadangog mo an saindang inagrangay duman sa Dagat na pula.

¹⁰Nagpahiling ka nin mga tanda saka mga ngangalasan laban sa hade nin Egipto, laban sa saiyang mga opisyal asin sa gabos na tawo sa saiyang daga, huli ta aram mo na inapi ninda an saimong banwaan. Nagin bantog an saimong ngaran sagkod ngunyan na aldaw.

¹¹Sa atubang kan saimong banwaan binanga mo an dagat, kaya nag-agi sinda sa mamarang daga sa tahaw kan dagat. An mga nagralamag sainda linamos mo sa hararom na dagat, siring sinda sa gapo na nag-irarom sa anggot na mga katubigan.

¹²Kun aldaw pinangenotan mo sinda huli sa hariging panganoron; kun banggi inilawan mo an saindang dalan huli sa hariging kalayo.

¹³Hale sa langit naghilig ka sa Bukid nin Sinai; nagtaram ka sa saimong banwaan, asin tinawan mo sinda nin mga matanos na katogonan saka marahay na mga katukdoan.

¹⁴Tinukdoan mo sinda na pakabanalon an saimong mga Sabbath, asin huli kan saimong sorogoon na si Moises itinao mo sainda an saimong katogonan.

¹⁵“Kan sinda nagutom, tinawan mo sinda nin tinapay hale sa langit, asin nin tubig hale sa sarong gapo kan sinda napaha. Sinabihan mo sinda na sakopon an daga na pinanuga mong itatao sainda.

¹⁶Alagad an samong mga ginikanan nagin mapaabaw-abaw saka matagas an payo, asin dai ninda inotob an saimong mga togon.

¹⁷Habo sindang magkuyog, asin liningawan ninda an mga ngangalasan na ginibo mo para sainda. Sa kapaabaw-abawan pinili ninda an sarong lider, na madara sainda pabalik sa kaoripnan sa Egipto. Alagad ika sarong Dios na nagpapatawad; maugayon ka saka mamomoton, haloy bago maanggot asin mayaman sa pagkamoot, asin dai mo sinda pinabayaan.

¹⁸Naggibo sinda nin sarong ladawan na baka asin nagsabi na iyo idto an dios na nagluwas sainda hale sa Egipto! Dakula an ginibo nindang paglanghad saimo.

¹⁹Alagad dai mo sinda pinabayaan duman sa kalangtadan, huli ta dakula an saimong pagkaherak. Dai mo hinale an hariging panganoron na nangenot sainda kun aldaw ni an hariging kalayo na nag-ilaw sa saindang agihan kun banggi.

²⁰Sa saimong pagkamarahayon tinukdoan mo sinda; pinakakan mo sinda nin manna asin tinawan mo nin tubig na inomon.

²¹Sa laog nin kwarentang taon sa kalangtadan, dai sinda nagkulang nin anoman; dai nagdaan an sulot nindang mga gubing asin dai naggatok an saindang mga bitis.

²²“Pinasakop mo sainda an mga nasyon saka mga kahadean, mga dagang yaon sa saindang pagdolonan. Sinakop ninda an daga nin Hesbon, na an hade iyo si Sihon, asin an daga nin Basan, na an hade iyo si Og.

²³Pinadakul mo an saindang kapagarakian siring sa mga bitoon sa langit; pinamugtak mo sinda sa daga na ipinanuga mong itatao sa saindang mga kapagarakian.

²⁴Sinakop ninda an daga nin Canaan; dinaog mo an banwaan na nag-erok duman. An saimong banwaan tinawan mo nin kapangyarihan na gibohon an boot ninda sa mga hade saka mga banwaan nin Canaan.

²⁵Sinakop kan saimong banwaan an mga pinapusog na syudad, sarong mayaman na daga saka mga harong na pano nin kayamanan, mga bubon na dati nang kinalot, mga olibahan, mga kahoy na namumunga, asin mga ubasan. Nagkarakan sinda kan boot ninda asin sinda, nagtaraba; nag-orogma sinda sa dakulang karahayan na itinao mo sainda.

²⁶“Alagad an saimong banwaan nagrebelde asin dai nagkuyog saimo; nagtalikod sinda sa saimong katogonan. Ginadan ninda an mga propeta na nagpatanid sainda, na nagtaram sainda na dai magtalikod saimo. Dakul na beses sindang naglanghad saimo,

²⁷kaya tinugotan mong madaog saka masakop sinda kan saindang mga kaiwal. Dangan sa saindang kasakitan naghagad sinda saimo nin tabang, asin hale sa langit sinimbag mo sinda. Sa dakula mong pagkaherak nagpadara ka nin mga lider, na nagligtas sainda sa kamot kan saindang mga kaiwal.

²⁸Alagad kan magkaigwa sinda nin katoninongan, nagkasala giraray sinda, kaya ipinasakop mo giraray sinda sa saindang mga kaiwal. Alagad kan magsolsol sinda saka maghagad saimo nin tabang, hale sa langit dinangog mo sinda. Kadakul na beses na ilinigtas mo sinda huli kan saimong dakulang pagkaherak.

²⁹Pinatanidan mo sinda na magkuyog kan saimong mga katukdoan, alagad sa kapaabaw-abawan isinikwal ninda an saimong mga katogonan, maski ngani an pag-otob kaiyan iyo an dalan pasiring sa buhay. Sutil saka matagas an payo na nagsayuma sindang magkuyog.

³⁰Dakul na taon matinios na pinatanidan mo sinda. Pinasabongan mo an saimong mga propeta tanganing magtaram sainda, alagad dai sinda nagdangog; kaya ipinasakop mo sinda sa ibang mga nasyon.

³¹Alagad sa dakula mong pagkaherak, dai mo sinda tinunaw o pinabayaan; huli ta ika sarong maugayon asin maheherakon na Dios!

³²“O Dios, samuyang Dios, dakula kang gayo, makangirhat asin mapangyari! Inootob mo an tipan asin ipinapahiling mo an danay na pagkamoot. Dai mo man logod ibilang na kadikit sanang kasakitan an nag-abot samuya, poon kan apihon kami kan mga hade nin Asiria asin sagkod ngunyan; mga kasakitan na nag-abot sa samuyang mga hade, mga lider, mga padi, asin mga propeta, sa samuyang mga ginikanan asin sa bilog na banwaan.

³³Nagin matanos ka sa pagpadusa sa samo; nagin maimbod ka, maski ngani kami nagkasala.

³⁴An samuyang mga ginikanan, mga hade, mga lider, asin mga padi dai nag-otob kan saimong Katogonan, dai nagdangog kan saimong mga pagboot asin mga patanid.

³⁵Huli kan saimong bendisyon, pinamayohan kan mga hade an saimong banwaan kan nag-erok sinda sa mahiwas, matubang na daga na itinao mo sainda; alagad dai sinda nagtalikod sa maraot nindang gibo asin dai naglingkod saimo.

³⁶Ngunyan mga oripon kami sa daga na itinao mo sa samuyang mga ginikanan, sa mayaman na daga na nagtatao samo nin kakanon.

³⁷Huli sa samong mga kasalan, napaduman sa mga hade na ibinugtak mong mamayo samo, an bunga kan daga na itinao mo sa samo. Nagigibo ninda an anoman na boot ninda sa samong mga hawak saka sa samong mga hayop, asin dakula an samong kahorasaan!”

³⁸Huli kan mga nangyaring ini, kami, an banwaan nin Israel, minagibo nin sarong masasarigan na nasusurat na tipan, na pipirmahan kan samong mga lider, kan samong mga Levita, saka samong mga padi.