Read Central Bicolano Tobit 11 Bible Online

Tobit 11 - Central Bicolano bible

Tobit 11

¹Kan maghale na si Tobias, maogma siya nin marahay. Inomaw niya an Dios huli ta nagin marahay an saiyang lakaw. Nanuga siyang gagalangan niya si Raguel asin si Edna sagkod na buhay pa an mga ini. Kan harani na si Tobias asin si Rafael sa syudad nin Kaserin, sa palaog kan Nineve,

²sinabihan ni Rafael si Tobias, “Tugang ko, lingaw mo na daw an kamugtakan kan saimong ama paghale mo?

³Maenot kita sa agom mo dangan andamon ta an saindong harong bago mag-abot an siisay man.

⁴Dai mo nanggad paglingawan na darahon an apdo kan sira.” Kaya nagpadagos sinda, asin nagsunod sainda an ayam ni Tobias.

⁵Kan panahon na iyan, nakatukaw na nagtatanaw si Anna sa dalan sa paghalat sa saiyang aki.

⁶Nahiling niya ining nagdadangadang, kaya nagkurahaw siya ki Tobit, “Uya na an satong aki kaiba an saiyang katood!”

⁷Bago sinda makarani ki Tobit, nagsabi si Rafael ki Tobias, “Makakahiling giraray an saimong ama.

⁸Lahidan mo an saiyang mga mata kan apdo kan sira. Mahahale kaiyan an garo puting mga kiskis nin sira, dangan makakahiling giraray siya.”

⁹Nagdalagan si Anna sa pagsabat sainda, asin kinugos an saiyang aki dangan nagsabi, “Ngunyan na nahiling takang buhay, aki ko, pwede na akong magadan.” Asin pareho sindang naghibi.

¹⁰Nagtindog si Tobit asin nagpoon paglakaw pasiring sa pintoan, alagad nadasmag siya. Alagad dinalagan siya ni Tobias

¹¹asin inayudahan. Dangan ilinahid ni Tobias an apdo kan sira sa mga mata kan saiyang ama asin nagsabi, “Dai ka na maghandal, ama ko.”

¹²Kan magpoon paghaldat an mga mata ni Tobit, pinonan niya ining piripision

¹³asin nahulog hale sa mga mata niya an garo puting mga kiskis nin sira.

¹⁴Nahiling niya an saiyang aki asin kinugos ini, dangan naghibi asin nagsabi, “Pag-omawon ka, O Dios, asin pag-omawon an banal mong ngaran sagkod pa man. Pag-omawon man an saimong mga banal na anghel.

¹⁵Dinarahan mo ako kan kahelangan na ini, alagad naherakan mo ako. Nahihiling ko na ngunyan an aki kong si Tobias!” Dangan maogmang naglaog si Tobias sa saindang harong. Inosip niya sa saiyang ama an dakulang mga bagay na nangyari saiya duman sa Media. Sinabi niya na bako sanang nakua niya an kwarta, kundi naagom pa niya an aki ni Raguel na si Sara, na ngunyan nagdadangadang na asin madali nang mag-abot sa saindang harong.

¹⁶Dangan nagluwas si Tobit tanganing sabaton an saiyang manugang sa trangkahan nin Nineve. Maogma siya asin padagos na nag-oomaw sa Dios. An mga nakahiling saiya mantang siya naglalakaw na mayo nin nag-aantabay gabos nagngalas huli ta nakakahiling na siya.

¹⁷Sa atubang ninda gabos, nagpasalamat siya sa Dios na naherak saiya. Kan makarani na si Tobit ki Sara, na saiyang manugang, nagsabi siya, “Maogmang pagdatong, aki ko! Pag-omawon an Dios na nagdara saimo digdi samo, asin bendisyonan logod niya an saimong ama saka ina.” Kaya an aldaw na idto nagin maogma para sa gabos na Judio sa Nineve.

¹⁸Nag-abot an mga sobrino ni Tobit na si Ahikar saka si Nadab,

¹⁹asin pinagselebrar ninda an pagkakaigwa ni Tobias nin agom sa laog nin pito pang aldaw na pano nin dakulang kaogmahan.