Read Central Bicolano Tobit 13 Bible Online

Tobit 13 - Central Bicolano bible

Tobit 13

¹Dangan namibi si Tobit: “Omawon an Dios na nabubuhay sagkod pa man, asin omawon an saiyang kahadean.

²Nagpapadusa siya; dangan nagpapahiling nin pagkaherak. Pinapalusad niya kita sa kinaban kan mga gadan; dangan hinahawas niya giraray. Mayo nin makakadulag sa saiyang kapangyarihan.

³“Banwaan nin Israel, midbidon nindo siya sa atubang nin mga nasyon, na pinagwarakan niya saindo.

⁴Ipahayag nindo duman an saiyang kadakulaan, asin omawon nindo siya sa atubang nin gabos, huli ta an Kagurangnan iyo an satong Dios asin an satong Ama sagkod pa man.

⁵“Maski padusahan niya kita huli kan satong kasombikalan, ipapahiling niya giraray an saiyang pagkaherak, asin titiponon niya kita hale sa mga nasyon, na pinagwarakan niya sato.

⁶“Magbalik kamo saiya sa bilog nindong puso asin kalag; mamuhay kamong makinuyog-kuyog saiya. Dangan mabalik siya saindo sa pagtabang asin dai nanggad siya matalikod saindo. Giromdoma an ginibo niya para saindo, asin magpasalamat kamo saiya sa bilog nindong puso. Omawon nindo an Kagurangnan nin katanosan; pamurawayon nindo an daing kataposan na Hade. “Maski nabubuhay ako bilang sarong itinapok sa dayuhan na daga, magpapasalamat ako sa Kagurangnan asin ipapahayag ko an saiyang kapangyarihan saka kamurawayan sa sarong nasyon nin mga parakasala. ‘Magtalikod kamo sa saindong mga kasalan, asin giboha an matanos sa atubang nin Dios! Tibaad akoon niya kamo asin maherakan.’

⁷“Inoomaw ko an sakong Dios asin ikinakaogma ko an saiyang kadakulaan; an sakong kalag nag-oomaw sa Hade nin langit.

⁸“An gabos na tawo kaipuhan magpahayag kan saiyang kadakulaan, asin magpasalamat saiya sa Jerusalem.

⁹“O Jerusalem, Banal na Syudad nin samuyang Dios, papadusahan ka niya huli sa kasalan kan saimong namamanwaan, alagad maheherak siya sa gabos na naggigibo nin matanos.

¹⁰Kaya magpasalamat ka sa Kagurangnan, huli ta siya marahayon. Omawon an daing kataposan na Hade. An saimong Templo ipapatugdok giraray, asin magigin maogma liwat an saimong banwaan. “Paogmahon logod nin Kagurangnan an mga itinapok mong namamanwaan, atamanon logod niya an mga nasasakitan sagkod sa kataposan kan panahon.

¹¹“Jerusalem, an saimong ilaw magliliwanag nin marahay para sa bilog na kinaban, asin hale sa harayo, dakul na nasyon an madolok saimo. An saindang namamanwaan madatong sa pag-omaw sa Kagurangnan na saimong Dios; madara sinda nin mga regalo para sa Hade nin Langit. Dakul na henerasyon an maawit saimo nin maogmang kaomawan sa saimong mga tinampo.

¹²Mamaldisyonon an gabos na naoongis saimo; bebendisyonan sagkod pa man an gabos na namomoot saimo.

¹³“Jerusalem, pag-ogma huli kan matanos mong mga namamanwaan; huli ta titiriponon sinda hale sa pagkatapokan tanganing mag-omaw sa Kagurangnan kan mga matanos.

¹⁴“Paladan an mga namomoot saimo! Mag-oogma sinda sa saimong katoninongan. Paladan an mga nagmomondo sa gabos mong kasakitan; huli ta maoogma sinda sagkod pa man kun mahiling na ninda an saimong kamurawayan.

¹⁵“Inoomaw ko an Dios, an dakulang Hade.

¹⁶Itutugdok giraray an Jerusalem asin iyo an saiyang magigin erokan sagkod pa man. “Jerusalem, magigin maogma ako kun an saimong kamurawayan mahiling kan sakong mga kapagarakian asin magpasalamat sa Hade nin Langit. “Safiro saka esmeralda an gagamiton sa pagtugdok kan saimong mga trangkahan; mahalagang mga bato an gagamiton sa saimong mga kudal. Bulawan an gagamiton sa saimong mga tore, asin purong bulawan, sa saimong mga bantayan.

¹⁷An saimong mga tinampo tatampokan nin mga rubi, berilo asin mahalagang mga alahas.

¹⁸An saimong mga agihan makurahaw nin ‘Aleluya!’ asin matao saimo nin kaomawan na masabi, ‘Pag-omawon an Dios, na nagpamuraway saimo sagkod pa man.’” Sa mga tataramon na ini tinapos ni Tobit an saiyang awit nin pag-omaw.