Read Central Bicolano Tobit 14 Bible Online

Tobit 14 - Central Bicolano bible

Tobit 14

¹Sesenta y dos an edad ni Tobit kan siya mabuta. Kan mabulong na an saiyang pagkabuta nagin mauswag an saiyang buhay. Nagin matinao siya giraray sa mga dukha saka padagos na nag-omaw sa Dios asin nagpahayag kan saiyang kadakulaan. Matoninong siyang nagadan sa edad na syento dose, asin tinawan nin maninigong lubong sa Nineve.

³Alagad bago siya nagadan, inapod niya an saiyang aki na si Tobias dangan sinabihan,

⁴“Aki ko, daraha an saimong mga aki asin magduman ka tolos sa Media. Nagtutubod ako sa sinabi ni propeta Nahum manongod sa Nineve, asin madali na ining magkatotoo. Alagad magkakaigwa nin katoninongan sa Media sa kadikit na panahon. “An kapwa ta mga Judio na nag-eerok sa Israel magkakawararak asin kukuahon sa marahay na dagang idto dangan itatapok. An bilog na Israel magigin sarong lugar na mayo nin pakinabang; an Jerusalem magigin mamondo huli ta babayaan kan mga tawo. An Templo nin Dios duman susuloon asin magigin rumpag sa halipot na panahon.

⁵Alagad maheherakan giraray nin Dios an saiyang banwaan, asin ibabalik sa saindang daga. Itutugdok ninda giraray an Templo, alagad bako na iyan arog kagayon kan enot na Templo, sagkod na umabot an tamang panahon. Pag-abot kan panahon na iyan, an gabos na taga Israel mabalik hale sa pagkatapokan, asin itutugdok ninda giraray an syudad nin Jerusalem dangan ibabalik an dating kagayonan kaini, siring sa ipinagpropesiya kan mga propeta.

⁶“Dangan an gabos na nasyon sa kinaban mabalik sa Kagurangnan Dios. Sasambahon ninda siya bilang Dios ninda asin babayaan ninda an saindang mga dios-dios.

⁷An gabos na nasyon sa kinaban mag-oomaw sa Kagurangnan, asin magpapasalamat saiya an saiyang banwaan. Papamurawayon nin Kagurangnan an saiyang banwaan. An gabos na namomoot sa Kagurangnan Dios sa katotoohan saka sa katanosan, mag-oogma asin mapahiling nin pagkaherak sa saindang kapwa.

⁸“Kaya, aki ko, maghale ka sa Nineve, huli ta mangyayari nanggad an sinabi ni propeta Nahum.

⁹Alagad kuyogon mo an mga togon asin magin matanos ka saka maheherakon tanganing magin marahay an saimong buhay.

¹⁰“Tobias, aki ko, dai ka na mag-erok digdi sa Nineve. Pakatapos mo akong ilubong, asin ngapit an saimong ina sa kataed ko, maghale ka tolos. Giromdoma an ginibo ni Nadab sa saiyang tiyo na si Ahikar, na iyo an nagpadakula saiya. Hiningowa niyang gadanon si Ahikar asin napiritan ining magtago sa lulubngan. Nagluwas giraray si Ahikar sa liwanag kan aldaw, alagad isinubol nin Dios si Nadab sa daing kataposan na kadikloman huli kan saiyang ginibo. Nakaligtas si Ahikar sa litag nin kagadanan na inandam ni Nadab para saiya, huli ta si Ahikar nagin matinao sa mga dukha. Alagad si Nadab iyo an nahulog sa litag na iyo an ikinagadan niya.

¹¹Kaya, mga aki ko, isipa nindo an nangyayari sa mga nagmamalasakit sa iba, asin kun paano nakakaligtas an matanos.” Pakataram kaini, nagadan si Tobit. Tinawan siya ni Tobias nin maninigong paglubong.

¹²Kan magadan man si Anna na saiyang ina, ilinubong man niya ini sa kataed kan saiyang ama. Dangan si Tobias kaiba an saiyang agom saka mga aki nagpuli sa Ecbatana, sa Media, saen nag-erok sinda kaiba ni Raguel na saiyang panugangan.

¹³Inataman niya si Raguel asin an agom kaini na si Edna, asin tinawan niya an mga ini nin maninigong paglubong kan sinda magadan. Namana ni Tobias an pagsadiri ni Raguel, siring na namana niya an pagsadiri ni Tobit na saiyang ama.

¹⁴Nagadan si Tobias sa Ecbatana sa edad na syento dyes y syeteng taon.

¹⁵Alagad bago siya nagadan, nadangog niya an dapit sa pagkarumpag kan Nineve asin nahiling niya an ginibong pagbihag ni Hadeng Cyaxares nin Media sa mga namamanwaan. Inomaw ni Tobias an Dios huli kan ginibong pagpadusa sa banwaan nin Nineve asin Asiria. Sa bilog niyang pagkabuhay, nagpapasalamat siya huli sa ginibo nin Dios sa Nineve.