Read Central Bicolano Tobit 3 Bible Online

Tobit 3 - Central Bicolano bible

Tobit 3

¹Nasopog akong marahay kaya naghangos ako nin hararom asin nagpoon sa paghibi. Dangan nagsisiloksigok akong namibi,

²“Matanos ka, O Kagurangnan! Maheherakon ka asin maimbod sa gabos mong gibo saka mga palakaw. Ika an hukom kaining kinaban.

³Giromdoma ako asin saimong kaherakan. Dai mo ako pagpadusahan huli kan sakong mga kasalan, asin kan mga dai ko tinutuyong mga kasombikalan, maski kan kasalan kan sakong mga magurang.

⁴Dai ninda kinuyog an saimong mga pagboot, kaya an samong banwaan pinabayaan mong habonan, bihagon asin gadanon. An samong banwaan ginibo mong patamaan kan pagtuyatuya kan gabos na nasyon na pinagwarakan mo samuya.

⁵Hinukoman mo an samong mga ginikanan huli kan saindang mga kasalan, asin pinadusahan mo ako huli man kan sakong mga kasalan. Dai kami nagin maimbod asin dai nagsunod sa saimong mga pagboot, kaya totoong matanos an padusa mo samo.

⁶“Ngunyan giboha sako an saimong magustohan. Kuaha an sakong buhay asin halea ako sa kinaban na ini; pabalika sa alpog an sakong hawak. Mas marahay pa sako an magadan ki sa mabuhay, huli ta pinupurisaw ako kan mga pagtuyatuya na dai man dapat ipanongod sako, asin nawawaraan na ako nin paglaom. Kaya magboot ka na matapos na an sakong mga kasakitan, daraha ako sa daing kataposan kong erokan. Dai mo pagsayumahan an sakong pamibi. Mas marahay pa sako an magadan ki sa mabuhay sa kasakitan, asin mag-atubang sa makuring mga pagtuyatuya.”

⁷Kan aldaw man sanang idto sa syudad nin Ecbatana sa Media, nangyari na si Sara, na aking babae nin sarong lalaki na an ngaran Raguel, pinagtuyatuya kan saro sa mga sorogoon na babae kan saiyang ama,

⁸huli ta pitong beses nang naagom si Sara alagad an lambang saro sainda ginadan kan demonyong si Asmodeo bago sinda magdorog bilang mag-agom. Kaya sinabihan si Sara kan sorogoon na babae, “Paragadan nin agom! Pagmasdan mo an sadiri mo! Pito na an nagin agom mo, alagad maski saro sainda dai nakatao saimo nin aki.

⁹Tano ta idinadamay mo pa kami? Tano ta dai ka man magadan asin ibahan mo an mga gadan mong agom? Dai mi logod ika mahilingan nin aki, babae man o lalaki!”

¹⁰Pakadangog kaini ni Sara, namondo siya nin marahay kaya nag-isip siyang maghugot. Alagad kan mahorophorop niya ini, nagsabi siya, “Solo akong aki kan sakong ama. Kun maghugot ako, masosopgan siya; gurang na siya asin ako an magdadara saiya nin kamondoan sagkod na siya magadan. Kaya dai ako mahugot.”

¹¹Dangan nagtindog si Sara sa may bintana, itinaas an mga kamot sa pagpamibi, asin nagsabi, “O Kagurangnan na sakuyang Dios, pag-omawon ka, asin pag-omawon an saimong banal na ngaran; pag-omawon ka sagkod pa man kan gabos mong linalang!

¹²“Kagurangnan, sa saimo ako minahagad nin tabang.

¹³Magboot ka na maghale na ako sa daga, dangan dai ko na madadangog ining mga pagtuyatuya.

¹⁴Aram mo, Kagurangnan, na birhen pa ako; dai pa ako nadigtaan nin lalaki.

¹⁵Dai ko pa lamang dinigtaan an sadiri kong ngaran o an ngaran nin sakong ama, mantang nabubuhay kami digdi sa dagang pinagtapokan samo. Solo akong aki nin sakong ama, asin mayo siyang paramana; mayo man siyang kadugo na pwede kong magin agom. Nagkagaradan na an pito kong agom, kaya tano ta padagos pa akong mabuhay? Alagad kun bako mong kabotan na kuahon an sakong buhay, pahilingan man lamang sako an pagkaherak. Hare pagtugot na madangog ko pa an mga pagtuyatuyang idto!”

¹⁶Nadangog nin Dios sa langit an pamibi ni Tobit saka ni Sara,

¹⁷asin ipinadara an saiyang anghel na si Rafael tanganing tabangan sinda. Sinugo niya si Rafael tanganing haleon an puting mga kiskis sa mga mata ni Tobit, tanganing makahiling giraray ini, asin tanganing ipaagom si Sara na aki ni Raguel ki Tobias na aki ni Tobit, huli ta si Tobias, bilang primo ni Sara, igwa nin deretso na agomon ini. Sinugo man si Rafael tanganing haleon ki Sara an demonyong si Asmodeo. Kan oras man sanang idto, nagpuli si Tobit sa saiyang harong mantang si Sara naglulusad hale sa saiyang kwarto.