Read Central Bicolano Tobit 4 Bible Online

Tobit 4 - Central Bicolano bible

Tobit 4

¹Kan aldaw man sanang idto, nagiromdoman ni Tobit an kwartang iwinalat niya ki Gabael sa Rages duman sa Media.

²Nagsaboot siya, “Ngunyan na hinagad ko na sa Dios na tugotan na akong magadan, dapat apodon ko an aki kong si Tobias tanganing ikapaliwanag ko saiya an manongod sa kwarta bago ako magadan.”

³Kaya inapod ni Tobit si Tobias dangan sinabihan, “Aki ko, kun ako magadan, tawan mo ako nin maninigong lubong. Asin kun mayo na ako, galangan mo an saimong ina. Atamanon mo siya mantang nabubuhay pa, dangan kun siya magadan ilubong mo siya sa kataed ko. Giromdoma na ibinugtak niya sa pag-alaman an saiyang buhay tanganing mamundag ka sa kinaban na ini, kaya hingowahon mong mapaogma siya, asin dai ka maggibo nin anoman na magigin dahelan kan pagmondo niya.

⁵“Giromdoma an Kagurangnan na satuyang Dios sa gabos na aldaw nin saimong pagkabuhay. Dai ka magkasala asin dai mo paglapason an saiyang mga togon. Mamuhay ka nin matanos asin dai ka maglakaw sa dalan nin karatan.

⁶Magin onesto ka, asin magigin mauswag ka sa anoman na gibohon mo.

⁷“Magin matinao ka sa kiisay man na maimbod na nagsusunod sa Dios, asin dai ka maghinayang kan itinatao mo. Dai ka magmaimot sa pagtao sa mga dukha, tanganing dai man magin maimot saimo an Dios.

⁸Magtao ka sosog sa sukol kan pagsadiri mo. Kun mas dakul an pagsadiri mo, kaipuhan orog man an itao mo. Kun igwa ka sana nin kadikit, magtao ka maski kadikit.

⁹Garo ka man sana nagtitipon kaiyan nin kwarta. Magkakaigwa ka nin premyo sa panahon nin kasakitan.

¹⁰An pag-ataman sa mga dukha iyo an atang na nawiwilihan kan Kahorohalangkawe. Gibohon mo ini asin makakaligtas ka sa madiklom na kinaban kan mga gadan.

¹²“Aki ko, maglikay ka sa karigsokan. Enot sa gabos, an babaeng agomon mo kaipuhan katribu mo, huli ta kapagarakian kita kan mga propeta. Dai ka mag-agom nin sarong dayuhan na babae. Giromdomon mo na si Noe, si Abraham, si Isaac saka si Jacob, na satong mga ginikanan, gabos nag-aragom nin mga kadugo ninda. Benendisyonan sinda nin Dios nin mga aki, kaya an mga kapagarakian ninda iyo an magmamana kan daga nin Israel.

¹³Kaya, aki ko, kamotan mo an saimong mga kadugo. Dai ka magtugot na sa kapaabaw-abawan sayumahan mong agomon an saro sainda. Huli ta sa kapaabaw-abawan yaon an karatan asin dakulang karibongan, siring na an kahugakan nagdadara nin makuring gutom asin kadaihan.

¹⁴“Bayadan mo sa aroaldaw an siisay man na nagtatrabaho saimo, asin dai mo ipagpanoodma an pagtao kaiyan. Omawon mo an Dios sa siring na paagi, asin babalosan ka niya. Magpakamarahay ka sa gabos na panahon.

¹⁵Dai mo paggibohon sa iba an anoman na habo mong gibohon nin iba saimo. “Dai ka magpakasobra sa pag-inom nin arak tanganing dai ka maburat, asin maglikay ka sa bisyo nin ngana-nganang pag-inom.

¹⁶“Pakakanon mo an nagugutom asin gubingan mo an huba. Kun mag-uswag an saimong pamumuhay, magmatinao ka asin magtao ka sa marahay na boot!

¹⁷“Kun magadan an saro sa maimbod na mga kaayon sa banwaan nin Dios, mag-andam ka nin kakanon para sa pamilya kan nagadan, alagad dai mo ini paggibohon kun an nagadan sarong maraot na tawo.

¹⁸“Maghagad ka nin hatol sa mga madonong na tawo, asin pahalagahan mo an anoman na hatol na makakatabang saimo.

¹⁹“Omawon mo an Kagurangnan na saimong Dios sa gabos na oportunidad na mag-abot saimo. Hagadon mo saiya na tanoson an saimong mga dalan asin pauswagon an saimong mga plano saka mga gibo. Dai siya nagtatao nin kadonongan sa kaayon kan mga paganong nasyon. Siya an nagtatao kan gabos na marahay na bagay, alagad kun boot niya, pwede ka niyang raoton asin darahon sa kagadanan. “Giromdoma an gabos kong mga pagboot. Dai mo nanggad iyan paglingawan.

²⁰“Tobias, boot kong maaraman mo na igwa akong iwinalat kaidto na dakulang halaga nin kwarta ki Gabael, na aking lalaki ni Gabrias, duman sa Rages sa Media.

²¹Alagad dai ka na mahadit huli ta dukha na kita ngunyan. Igwa ka nin kayamanan kun may pagkatakot ka sa Dios. Kuyogon mo siya, likayan an kasalan asin mawiwilihan ka niya.”