Read Central Bicolano Tobit 5 Bible Online

Tobit 5 - Central Bicolano bible

Tobit 5

¹Dangan sinimbag ni Tobias an saiyang ama, “Gigibohon ko an gabos na ipinagboot mo sako.

²Alagad paano ko makukua an kwarta ki Gabael, huli ta dai ko man siya midbid?”

³Nagsimbag si Tobit, “Ako asin si Gabael nagpirma sa sarong kasuratan. Tinago ko an kabanga kan kasuratan na idto asin an kabanga nawalat saiya kaiba kan kwarta. Beynteng taon na an nakalihis kan magpirmahan kami. Kaya ngunyan, maghanap ka nin tawong makakaiba mo sa pagbyahe pasiring sa Media asin sa pagbalik digdi. Babayadan ta siya pagbalik nindo. Lakaw na asin kuahon mo an kwarta.”

⁴Naghale si Tobias sa paghanap nin tawong makakaiba niya pasiring sa Media. Pakahale niya sa harong, nasabat niya tolos si Rafael. Dai aram ni Tobias na si Rafael sarong anghel nin Dios,

⁵kaya hinapot niya ini, “Pwede mo akong ibahan pasiring sa Rages, sa Media? Aram mo an lugar na idto?”

⁶Nagsimbag si Rafael, “Iibahan taka; aram ko an dalan pasiring duman, asin nag-erok ako kaidto duman sa kaibahan ni Gabael.”

⁷Dangan sinabihan ni Tobias si Rafael, “Maghalat ka sako digdi mantang sinasabihan ko an sakuyang ama.”

⁸Nagsabi si Rafael, “Lakaw asin dai ka sana maghaloy.”

⁹Kaya naglaog si Tobias sa harong asin nagsabi sa saiyang ama, “Nakakua na ako nin tawong makakaiba sako.” “Padigdiha sako an lalaki,” an simbag ni Tobit. “Boot kong maaraman kun sa anong tribu siya gikan asin kun saro siyang masasarigan na kaiba mo.” Kaya nagluwas si Tobias asin inapod si Rafael, “Boot kang mamidbid kan sakong ama.” Naglaog si Rafael, asin nagkomustahan sinda.

¹⁰Hinapot siya ni Tobit, “Tugang, kiisay kang aki asin anong tribu an ginikanan mo? Sabihi ako.”

¹¹Nagsimbag si Rafael, “Ano an hinahanap mo, sarong tribu asin pamilya o sarong lalaki na babayadan mo tanganing makaiba kan saimong aki?” Nagsabi si Tobit, “Tugang ko, boot kong maaraman an ngaran mo asin an saimong banwaan.”

¹²Nagsimbag si Rafael, “Ako si Azarias, na aking lalaki kan gurang na si Ananias, na saro sa mga kadugo mo.”

¹³Dangan sinabihan siya ni Tobit, “Tugang ko, bukas an harong mi para saimo. Dai ka maanggot sako huli ta hinapot taka kun kiisay kang aki asin kun sa anong tribu ka hale. Kadugo taka, asin hale ka sa sarong marahay na pamilya. Midbid ko si Ananias asin si Natan, an duwang aking lalaki kan gurang na si Semaias. Danay na nagin maimbod sinda sa saindang relihiyon. Iribahan kami kaidto kun minaduman sa Jerusalem tanganing magsamba asin magdolot kan matua kan samong mga hayop asin kan himoloan kan samong mga ani. Tugang ko, hale ka sa sarong marahay na pamilya.”

¹⁴Nagsabi pa si Tobit, “Gurano an ibabayad ko saimo? Pwede na daw an aldawan na tandan kaiba an gastos nindong duwa kan aki ko?

¹⁵Dudugangan ko an bayad saimo, kun magin marahay kang kaiba kan aki ko, asin ligtas kamong makabalik.” Kaya nagkaoyon sinda.

¹⁶Dangan sinabihan ni Tobit an saiyang aki, “Mag-andam ka na sa pagbyahe, asin magin marahay logod an lakaw nindo.” Kaya nag-andam sa pagbyahe si Tobias. Sinabihan siya ni Tobit, “Mag-iba ka sa lalaking ini. An Dios na nag-eerok sa langit an maantabay saindo asin bantayan logod kamo kan saiyang anghel.” Dangan naghale na an duwa.

¹⁷Alagad si Anna, an ina ni Tobias, nagpoon paghibi asin nagsabi ki Tobit, “Tano ta pinahale mo an satuyang aki? Bakong siya sana an nag-aataman satuya?

¹⁸Mas mahalaga pa daw an kwartang idto ki sa buhay kan satong aki?

¹⁹Dai pa daw nagkakanigo sato an itinatao nin Kagurangnan?”

²⁰“Dai ka maghandal,” an simbag ni Tobit, “makakaduman siya dangan mahihiling mo nanggad na makakabalik siyang ligtas.

²¹Huli ta iibahan siya nin sarong marahay na anghel. Magigin marahay an resulta kan saiyang pagbyahe asin mabalik siyang marahay an hawak saka ligtas.” Kaya nag-ontok sa paghibi si Anna.