Read Central Bicolano Tobit 6 Bible Online

Tobit 6 - Central Bicolano bible

Tobit 6

¹Naglakaw si Tobias asin an anghel pasiring sa Media. Ipinag-iba ni Tobias an saiyang ayam sa saindang pagbyahe. Naglakaw sinda bilog na aldaw, dangan pag-abot kan diklom, nag-ontok sinda sa tampi kan Salog nin Tigris.

²Kan magduman si Tobias sa tubig tanganing hanawan an saiyang mga bitis, bigla sanang naglukso hale sa irarom kan salog an sarong dakulang sira, asin boot kaining halonon an saiyang bitis. Napakurahaw si Tobias,

³asin sinabihan siya kan anghel, “Dakopa an sira!” Dangan dinakop ni Tobias an sira asin ginuyod pasiring sa pangpang.

⁴Sinabihan si Tobias kan anghel, “Baaka an sira asin halea an apdo, an puso saka an katoy. Tagoa an mga iyan; pwedeng magamit iyan sa pagbolong.”

⁵Sinunod ni Tobias an sinabi saiya kan anghel. Dangan linuto ninda an sira asin nagkakan sinda; hiniram niya an natada tanganing balonon sa paglakaw. Nagpadagos an duwa sa paglakaw sagkod na makaharani sinda sa Media.

⁶Dangan naghapot si Tobias, “Tugang kong Azarias, anong mga helang an pwedeng mabolong kaining apdo, puso, saka katoy?”

⁷Nagsimbag an anghel, “An puso asin an katoy pwedeng tutongon dangan gamiton sa pagpahale nin sarong demonyo o sarong maraot na espiritu na nagpapasakit sa sarong tawo, asin dai na ini papasakitan giraray.

⁸An apdo pwedeng gamiton sa pagbolong sa sarong tawo na an mga mata natatahoban nin garo puting mga kiskis nin sira. Ilahid mo sana iyan sa mga mata, dangan makakahiling na siya giraray.”

⁹Kan nakaabot na sinda sa Media asin nagdadangadang na sa syudad nin Ecbatana,

¹⁰nagsabi si Rafael, “Katood kong Tobias, ngunyan na banggi madagos kita sa harong kan kadugo mong si Raguel. Igwa siya nin solong aking babae na an ngaran Sara.

¹¹Huli ta ika an pinakaharani niyang kadugo, igwa ka nin deretsong agomon siya, asin manahon an pagsadiri kan saiyang ama.

¹²Si Sara sarong babaeng magayon saka may pakasabot. Kaya dangoga an plano ko. Kakaolayon ko an saiyang ama manongod sa pag-agom mo ki Sara. Dai siya makakasayuma. Dangan, pagbalik ta digdi hale sa Rages, gigibohon ta an kasal nindong duwa. Dai makakasayuma si Raguel na agomon mo si Sara, asin dai siya pwedeng itao sa iba. Kun gibohon iyan kan saiyang ama, maninigo siyang gadanon sosog sa Togon ni Moises. Aram niya na ika sana nanggad an igwa nin deretsong agomon an saiyang aki asin manahon an saiyang pagsadiri.”

¹³Nagsabi si Tobias sa anghel, “Tugang kong Azarias, nadangog kong nagkaigwa na si Sara nin pitong agom, asin an lambang saro sainda nagadan pagkabanggi kan aldaw na sinda kasalon, bago man lamang siya madorogan.

¹⁴Sosog sa nadangog ko, ginadan sinda nin sarong demonyo. Dai niya inaano si Sara, alagad ginagadan an siisay man na lalaking magrani ki Sara. Takot ako sa demonyong ini. Solo akong aki, asin kun magadan ako, an kamondoan an madara sa sakong mga magurang sa saindang lulubngan. Mayo na sinda nin iba pang aki na malubong sainda.”

¹⁵Nagsimbag an anghel, “Nalingawan mo na an pagboot kan saimong ama na magpili ka nin agom sa sadiri mong tribu? Kaya dangoga ako, tugang, huli ta maaagom mo siya. Dai ka matakot sa demonyo. Agomon mo si Sara huli ta ngunyan na banggi matugot si Raguel na ipaagom siya saimo.

¹⁶Paglaog mo sa saindong kwarto, darahon mo an puso saka an apdo kan sira, dangan ibugtak mo sa nagbabagang insenso,

¹⁷tanganing makalakop sa kwarto an parong kaiyan. Sa oras na maparong iyan kan demonyo, madulag siya asin dai na nanggad marani ki Sara. Alagad bago kamo magdorog, magtindog kamong duwa dangan mamibi sa Kagurangnan sa langit tanganing iligtas saka kaherakan ka. Dai ka matakot, huli ta si Sara itinalaan nang magin agom mo poon pa sa kapinonan kan panahon. Ililigtas mo siya sa demonyo, asin maiba siya sa saimong harong. Magkakaigwa kamo nin dakul na aki. Kaya dai ka mahandal!” Nagdangog nin marahay ki Rafael si Tobias. Nagkaigwa siya nin pagkamoot ki Sara asin nin pagmawot na maagom ini.