Read Central Bicolano Tobit 7 Bible Online

Tobit 7 - Central Bicolano bible

Tobit 7

¹Kan makalaog na sa syudad nin Ecbatana si Tobias asin si Rafael, dangan makaabot sa harong ni Raguel, sinabat sinda ni Sara asin nagtaong galang ini sainda. Nagtao man sinda nin galang ki Sara, dangan pinadagos sinda kaini sa harong.

²Dangan sinabihan ni Raguel an saiyang agom na si Edna, “Bakong kalalawogon kan hoben na lalaking ini an satong primo na si Tobit?”

³Hinapot sinda ni Edna, “Saen kamo hale, mga tugang?” Nagsimbag sinda, “Mga Israelita kami na kaayon sa tribu ni Neftali, alagad itinapok sa syudad nin Nineve sa Asiria.”

⁴“Midbid nindo an samong primo na si Tobit?” an hapot ni Edna. “Midbid mi siya,” an simbag ninda. “Komusta siya?” an hapot ni Edna.

⁵“Buhay pa siya asin marahay man an kamugtakan,” an simbag ninda. Dangan nagsabi si Tobias, “Si Tobit iyo an sakong ama.”

⁶Pakadangog kaini, nagtindog si Raguel dangan naghihibing hinadokan si Tobias.

⁷Dangan nagsabi si Raguel, “Aki ko, bendisyonan ka logod nin Dios. An saimong ama sarong marahay saka ginagalangan na lalaki.” Kan madangog ni Raguel na nabuta si Tobit, nagmondo siya saka naghibi.

⁸Naghibi man si Edna na saiyang agom asin si Sara. Maogmang inako ni Raguel si Tobias saka si Rafael, asin ipinabuno niya an sarong lalaking karnero dangan nag-andam nin bangkete para sainda. Bago sinda nagkakan, sinabihan ni Tobias si Rafael, “Tugang kong Azarias, nuarin mo tataraman si Raguel na ipaagom sako si Sara?”

⁹Kaya sinabihan ni Rafael si Raguel manongod kaini. Nagsabi si Raguel ki Tobias, “Magkakan ka, mag-inom asin mag-ogma.

¹⁰Igwa ka nin deretsong agomon si Sara. Alagad tugote akong ipaliwanag saimo an katotoohan.

¹¹Pitong beses ko nang ipinaagom si Sara asin an lambang saro sainda nagadan kan banggi nin saindang kasal, pakalaog tolos niya sa saindang kwarto. Alagad ngunyan mag-ogma ka.” Nagsimbag si Tobias, “Dai ako makakan o mainom sagkod na dai ka mangako sako.”

¹²Nag-oyon si Raguel, “Nangangako ako. Itatao ko siya saimo sosog sa ipinagboboot kan Togon ni Moises. Kadugo mo siya asin may deretso ka saiya. Magpoon ngunyan asin sagkod pa man, sadiri mo na si Sara. An Dios na maheherakon iyo logod an mag-antabay saindo.”

¹³Dangan inapod ni Raguel si Sara. Pakalaog ni Sara, dinara siya ni Raguel ki Tobias saka itinao bilang agom asin nagsabi, “Uya siya, sadiriha siya bilang agom sosog sa Togon ni Moises. Ipag-iba mo siya sa saimong ama.” Dangan benendisyonan niya sinda.

¹⁴Pakatapos, inapod ni Raguel si Edna tanganing magkua nin sarong masusuratan kan kontrata nin pag-inagoman; pinirmahan ninda ini.

¹⁵Pakatapos kan kasal, nagpoon sindang magkakan.

¹⁶Inapod ni Raguel an saiyang agom na si Edna dangan sinabihan, “Andama an sarong kwarto asin ipag-iba mo si Sara duman.”

¹⁷Inandam ni Edna an higdaan siring sa sinabi ni Raguel. Dangan ipinag-iba niya si Sara sa laog kan kwarto. Nagpoon na maghibi si Sara, kaya rinanga siya ni Edna asin sinabihan,

¹⁸“Aki ko, dai ka mahandal. Nananarig ako na an Kagurangnan nin langit asin daga matao nin kaogmahan ngunyan, asin bakong kamondoan. Kaya mag-ogma ka, aki ko.” Dangan nagluwas si Edna sa kwarto.