Read Central Bicolano Tobit 8 Bible Online

Tobit 8 - Central Bicolano bible

Tobit 8

¹Pakatapos nindang magkakan, inibahan si Tobias ni Raguel saka ni Edna pasiring sa kwartong namumugtakan ni Sara.

²Nagiromdoman ni Tobias an mga sinabi ni Rafael, kaya kinua niya sa bag an puso saka apdo kan sira. Dangan ibinugtak niya an mga ini sa nagbabagang insenso.

³Kan maparong ini kan demonyo, nagdulag siya pasiring sa Egipto. Linamag siya ni Rafael asin dinakop dangan ginapos.

⁴Kan si Tobias asin si Sara na sana an nasa laog kan kwarto, nagtindog si Tobias asin nagsabi sa saiyang agom, “Mahal, magtindog ka asin mamibi kitang duwa tanganing maherakan kita nin Kagurangnan.”

⁵Dangan namibi si Tobias: “Pag-omawon ka, O Dios nin samong mga ginikanan, asin pag-omawon an saimong banal saka mamurawayon na ngaran sagkod pa man. Omawon ka kan kalangitan asin kan gabos mong linalang.

⁶Linalang mo si Adan asin itinao saiya si Eva na saiyang agom bilang saiyang katabang asin kadamay. Sinda an nagin magurang kan gabos na katawohan. Nagsabi ka, ‘Bakong marahay na magsolo-solo sana an lalaki; magibo ako nin sarong katabang niya na arog saiya.’

⁷Kagurangnan, pinili ko si Sara sa kalodokan nin puso, asin bakong huli sa karigsokan. Maherak ka samo, asin tugotan mong maghalawig an samong buhay sagkod na gumurang.”

⁸Dangan nagsabi sindang duwa, “Amen”

⁹asin nagduman na sinda sa higdaan tanganing magkatorog. Kan bangging idto, inapod ni Raguel an saiyang mga sorogoon dangan nagluwas sinda tanganing magkalot nin sarong lulubngan,

¹⁰huli ta nagsaboot si Raguel, “Tibaad magadan man si Tobias.”

¹¹Pakakalot ninda, nagbalik si Raguel sa harong

¹²dangan nagsabi sa saiyang agom na si Edna, “Sugoa an saro sa mga sorogoon na babae tanganing hilingon kun buhay pa si Tobias. Kun gadan na, ilubong ta siya bago makaaram an siisay man.”

¹³Kaya nagduman an sorogoon na babae sa kwarto ni Tobias saka ni Sara, asin nahiling niyang torog nin marahay an duwa.

¹⁴Kaya nagluwas siya asin nagsabi ki Raguel asin ki Edna na buhay pa si Tobias.

¹⁵Dangan inomaw ni Raguel an Dios: “Pag-omawon ka, O Dios, nin sarong pag-omaw na banal asin dalisay. Omawon ka kan mga banal asin kan gabos mong linalang; omawon ka kan saimong mga anghel asin kan saimong piniling banwaan sagkod pa man.

¹⁶Pag-omawon ka, huli ta pinaogma mo ako. Dai ko pinaghona na mangyari ini sako, alagad ipinahiling mo samo an dakula mong pagkaherak.

¹⁷Pag-omawon ka, huli ta naherakan mo an duwang ini, na bugtong na mga aki kan saindang mga magurang. Pahilingan sainda an saimong pagkaherak, O Kagurangnan, asin tawan sainda an sarong buhay na pano nin pagkamoot saka kaogmahan.”

¹⁸Dangan pinagbotan ni Raguel an saiyang mga sorogoon na tahoban an lulubngan bago magbanaag an aldaw.

¹⁹Pakatapos kaini, nagtao si Raguel nin bangkete para sa ikinasal sa laog nin katorseng aldaw.

²⁰Bago natapos an mga aldaw nin bangkete, inapod ni Raguel si Tobias asin nagsumpa, “Dai ako matugot na maghale ka sagkod na dai pa tapos an katorseng aldaw nin bangkete.

²¹Pakatapos kaiyan, pwede mo nang darahon an kabanga kan sakuyang pagsadiri pagpuli mo sa saimong ama, mantang an kabanga iyo an magigin pamana mo kun gadan na ako saka si Edna.”