Read Central Bicolano Tobit 9 Bible Online

Tobit 9 - Central Bicolano bible

Tobit 9

¹Dangan inapod ni Tobias si Rafael asin sinabihan,

²“Tugang kong Azarias, mag-iba ka nin sarong sorogoon asin magdara ka nin duwang kamelyo dangan magduman ka sa harong ni Gabael sa banwa nin Rages. Itao mo saiya an pinirmahan na kontrata tanganing itao niya saimo an kwarta, dangan ipag-iba mo siya digdi sa bangkete.

³Nagsumpa si Raguel na dai ako pwedeng maghale;

⁴alagad an sakong ama nagbibilang kan mga aldaw sagkod na ako magbalik, asin mahahandal siya kun maatraso ako maski sarong aldaw.”

⁵Kaya nagbyahe si Rafael pasiring sa Rages, sa Media. Sa harong ni Gabael siya nagpalihis nin banggi. Itinao niya ki Gabael an pinirmahan na kontrata dangan sinabihan na bagong kasalon si Tobias na aki ni Tobit, kaya inalok siya sa bangkete. Ilinuwas ni Gabael an mga bag nin kwarta, na igwa pa nin mga selyo, asin itinao ki Rafael, dangan ilinunad ninda sa mga kamelyo.

⁶Pagkaaga, amay sindang nagmata dangan nagduman sa bangkete. Dangan benendisyonan ni Gabael si Tobias saka an saiyang agom.