Read Central Bicolano Judith 1 Bible Online

Judith 1 - Central Bicolano bible

Judith 1

¹Mantang naghahade si Nebukadnezzar sa mga taga Asiria sa pangenot na syudad nin Nineve, si Arfaksad iyo man an naghahade sa mga Medo sa pangenot na syudad nin Ecbatana.

²Sa palibot kan Ecbatana nagpatindog si Hadeng Arfaksad nin kudal na treynta y dos metros an langkaw saka beynte y dos metros asin nubenta sentimetros an hibog; an lambang tinabas na gapo na ginamit digdi may sarong metro asin kwarenta sentimetros an hibog saka duwang metros asin setenta sentimetros an laba.

³Sa lambang trangkahan nagpagibo siya nin tore na kwarenta y singko metros asin setenta sentimetros an langkaw. An pundasyon kaini beynte y syete metros asin kwarenta sentimetros an hibog.

⁴Nagpagibo siya nin mga trangkahan na an lambang saro treynta y dos metros an langkaw asin dyes y otso metros asin treynta sentimetros an hiwas, tanganing pasil an pag-agi kan bilog niyang hukbo kaiba an nagmamartsang mga soldados.

⁵Kan ikadoseng taon kan paghahade ni Hadeng Nebukadnezzar nagluwas siya sa pakigera laban ki Hadeng Arfaksad sa mahiwas na kapatagan na nasa palibot kan syudad nin Rages.

⁶Dakul na nasyon an nagtabang ki Hadeng Arfaksad—an gabos na nag-eerok sa kabukidan, an mga nag-eerok sa tampi kan mga Salog nin Tigris, Eufrates, saka Idaspes, siring man an mga nag-eerok sa kapatagan na sakop ni Hadeng Arioc nin Elam. Kadakul na mga nasyon an nag-ayon sa alyansang ini kan mga Caldeo.

⁷Dangan si Hadeng Nebukadnezzar nin Asiria nagpadara nin mensahe sa mga taga Persia asin sa mga tawo sa solnopan, na nasa mga rehiyon nin Cilicia, Damasco, Lebanon, saka Antilebanon, sa mga nag-eerok sa may baybayon,

⁸saka sa mga nag-eerok sa mga rehiyon nin Carmelo, Gilead asin sa amihan na parte kan Galilea saka sa Kapantayan nin Jezreel.

⁹An mensahe nakaabot man sa mga tawong nag-eerok sa Samaria saka sa kataraed kaining mga banwa, sa solnopan na parte kan Salog nin Jordan, sagkod sa mga syudad nin Jerusalem, Betania, Kelus, Kades, asin sa distrito nin Gosen. An mensahe dinara man sa Tafanhes, Rameses, Tanis, saka sa Memfis na mga syudad sa Egipto, dangan sa distritong minapoon sa tampi kan Salog nin Nilo sagkod sa pagdolonan nin Etiopia.

¹¹Alagad dai pinahalagahan kan mga nag-eerok sa gabos na lugar na idto an pag-apod ni Hadeng Nebukadnezzar; nagsayuma sinda na mag-ayon saiya sa gera. Dai sinda natakot ki Nebukadnezzar huli ta inisip ninda na dai ini manggagana sa gera. An mga sugo pinapuli ninda na nasosopog saka mayo nin nahimo sa lakaw ninda.

¹²Naanggot nin marahay si Nebukadnezzar huli sa nangyaring ini asin nagsumpa siya na itataya niya an bilog niyang kahadean makabalos sana siya sa gabos na lugar na idto. Nagsumpa siya na gagadanon niya an gabos na tawo sa Cilicia, Damasco, Siria, Moab, Ammon, Juda, asin Egipto–an lambang saro magpoon sa Dagat nin Mediteraneo sagkod sa Gulpo nin Persia.

¹³Kan ikadyes y syeteng taon kan paghahade ni Hadeng Nebukadnezzar pinangenotan niya an saiyang hukbo sa pakilaban ki Hadeng Arfaksad. Nadaog niya an bilog na hukbo ni Arfaksad, sagkod an bilog na grupo kan mga soldados na nakakabayo saka mga nakalunad sa mga karwahe.

¹⁴Sinakop niya an gabos na banwa sa daga nin Media, asin nagpadagos siya sa syudad nin Ecbatana. Sinakop niya an mga tore kaini, sinamsaman an mga saodan, asin rinaot an dating magayon na syudad.

¹⁵Dinakop niya si Arfaksad sa kabukidan nin Rages saka ginadan. Pagkagadan ni Arfaksad,

¹⁶nagbalik si Nebukadnezzar sa Nineve kaiba an bilog niyang hukbo dara an gabos na sinamsaman sa gera. Nagpahingalo sinda duman saka nagbangkete sa laog nin apat na bulan.