Read Central Bicolano Judith 10 Bible Online

Judith 10 - Central Bicolano bible

Judith 10

¹Pakapamibi ni Judit sa Dios nin Israel,

²nagtindog siya, inapod an saiyang sorogoon na babae, dangan naglaog sa harong na saiyang erokan, arog kan ginigibo niya kun aldaw nin Sabbath saka mga pyesta.

³Hinuba niya an sulot na sako, asin an gubing niyang sa balo. Dangan nangarigos siya saka nagpahamot. Sinukray niya an saiyang buhok saka binugtakan ini nin laso. Isinulot niya an magayon niyang gubing na ginagamit niya sa panahon nin kaogmahan kan buhay pa an saiyang agom na si Manases.

⁴Nagsandalyas siya asin nagsulot nin mamahalon na mga alahas: mga singsing saka mga hikaw asin mga pulseras sa mga braso saka mga bitis. Nagpagayon siya nin marahay tanganing madagka niya an siisay man na lalaking makahiling saiya.

⁵Dangan ipinadara niya sa saiyang sorogoon na babae an sarong anit na laogan nin arak saka sarong garapon nin lana. An sarong supot pinano niya nin sinanlag na sebada, nin mga mamon nin pinaalang na higera saka nagkapirang masisiram na tinapay. Maingat niyang pinatos an gabos na pagkakan saka mga kagamitan, dangan itinao sa saiyang sorogoon.

⁶Nagluwas sinda sa harong asin nagduman sa trangkahan nin Betulia, saen nanumpongan ninda si Uzzias na nakatindog saka nagbabantay kaiba si Cabris asin si Carmis na mga opisyal kan banwa.

⁷Kan mahiling ninda si Judit na iba na an lalawogon saka gubing, nagayonan sinda nin marahay sa saiya. Nagsabi sinda,

⁸“Bendisyonan ka logod kan Dios nin satong mga ginikanan asin maotob logod an saimong plano, tanganing madarahan mo nin kamurawayan an Jerusalem asin nin kapangganahan an Israel.” Namibi si Judit

⁹dangan nagsabi, “Pabukasan nindo an trangkahan sa mga lalaki huli ta maluwas ako tanganing gibohon an mga bagay na satong pinag-olayan.” Kaya pinagbotan ninda an mga hoben na lalaki na bukasan an trangkahan.

¹⁰Nagluwas si Judit kaiba an saiyang sorogoon na babae. Hiniling siya kan mga kalalakihan mantang naglulugsot siya sa bukid pasiring sa kapantayan, sagkod na dai na ninda siya nahiling.

¹¹Kan naglalakaw na sa kapantayan an duwang babae, nasabat ninda an sarong grupo nin mga taga Asiria na nagroronda.

¹²Dinakop ninda si Judit dangan hinapot, “Ano an rasa mo? Saen ka hale asin saen ka maduman?” “Saro akong Hebreyo,” an simbag niya, “alagad nagdudulag ako sa mga Israelita huli ta itutugot saindo nin Dios na tunawon sinda.

¹³Maduman ako ki Holofernes, an heneral na pamayo kan saindong hukbo, tanganing tawan siya nin masasarigan na impormasyon. Itutukdo ko saiya an sarong dalan na pwede niyang agihan tanganing masakop niya an bilog na rehiyon na mayo nin saro man sa saiyang mga tawohan na magadan.”

¹⁴Mantang naghihinanyog sinda sa sinasabi niya, an saindang mga mata nakaturohok sa saiya huli ta magayon siyang marahay. Nagsabi sinda sa saiya,

¹⁵“Ilinigtas mo an saimong buhay huli sa pagpasiring mo digdi tanganing mahiling an samong heneral. Dumuman ka tolos sa saiyang tolda. Iibahan ka kan nagkapira samo tanganing iatubang saiya.

¹⁶Dai ka matakot saiya. Sabihon mo sana saiya an sinabi mo samo, asin tatrataron ka niya nin marahay.”

¹⁷Nagpili sinda nin sanggatos na lalaking maiba ki Judit saka sa sorogoon kaini pasiring sa tolda ni Holofernes.

¹⁸Nagkaigwa nin dakulang karibokan sa bilog na kampo kan mga taga Asiria kan maglakop sa gabos na tolda an bareta kan pag-abot ni Judit. Mantang nagtitindog ini sa luwas kan tolda ni Holofernes asin naghahalat na iatubang saiya, dakul na soldados an nagluwas saka nagtindog sa palibot niya.

¹⁹Nagayonan sindang marahay sa saiya asin inisip ninda kun anong klaseng tawo an mga Israelita. “Siisay an pwedeng mag-olog-olog sa sarong banwaan na may mga babaeng arog kaini kagayon?” an hapot nin lambang saro. “Marahay pang gadanon ta an gabos na lalaki, ta kun dai, dadagkahon ninda an bilog na kinaban.”

²⁰Dangan nagluwas an bantay asin an mga sorogoon ni Holofernes dangan dinara si Judit sa laog kan tolda.

²¹Nagpapahingalo si Holofernes sa saiyang higdaan na may moskitero nin hinabol na purpura saka bulawan na torsido asin nasasamnohan nin mga esmeralda saka iba pang mahahalagang mga bato.

²²Kan taraman siya kan kalalakihan na nag-abot na si Judit, nagduman siya sa luwas na kabtang kan tolda, kaiba an mga paradara nin mga ilawan na plata sa enotan niya.

²³Kan nagdolok si Judit ki Holofernes saka sa mga sorogoon kaini, nagayonan sinda gabos saiya. Nagdapa si Judit sa atubangan ni Holofernes, alagad pinatindog siya kan mga sorogoon kaini.