Read Central Bicolano Judith 11 Bible Online

Judith 11 - Central Bicolano bible

Judith 11

¹Sinabihan ni Holofernes si Judit, “Dai ka mahadit o matakot huli ta dai ko kinukulogan an siisay man na boot maglingkod ki Nebukadnezzar, an hade kan bilog na kinaban.

²Maski ngunyan, kun dai ako ininsulto kan mga kahimanwa mong nag-eerok sa kabukidan, dai ko sinda gegerahon. Sinda an nagdara kan problemang ini sa sainda man sana.

³Alagad sabihi ako, tadaw ta dinulagan mo sinda dangan nag-apil ka samo? Huli sa pagdigdi mo ilinigtas mo an saimong buhay.

⁴Dai ka matakot. Dai ka mabubugtak sa pag-alaman ngunyan na banggi o sa maabot na aldaw. Mayong maraot na mangyayari saimo; magigin marahay an pagtratar saimo kan gabos, siring kan pagtratar na itinatao sa mga sorogoon kan sakong kagurangnan na si Hadeng Nebukadnezzar.”

⁵Nagsimbag si Judit, “Kagurangnan ko, tugote akong magtaram asin hinanyoga an sakong mga sasabihon. Katotoohan an itataram ko saimo ngunyan na banggi.

⁶Kun kuyogon mo an sakong ihahatol, an Dios magibo nin darakulang bagay huli saimo, asin magigibo mo an saimong plano.

⁷Minasumpa ako saimo, sa buhay saka kosog ni Nebukadnezzar, an hade kan bilog na kinaban, na nagsugo saimo tanganing mamahala sa gabos na masasakopan kan saiyang kahadean, na bako sanang tawo an naglilingkod saiya, kundi maski an mga lalaw na hayop, mga baka, saka mga gamgam. Huli saimo, mag-uuswag si Nebukadnezzar asin an bilog niyang kahadean.

⁸Nabaretaan mi an saimong kadonongan asin kakayahan. An bilog na kinaban nakakaaram na igwa ka nin kakayahan, eksperto ka, saka mapangganang heneral sa bilog na imperyo kan Asiria.

⁹Nadangog mi an itinaram ni Akior duman sa saindong pag-orolay, huli ta ilinigtas siya kan mga lalaki sa Betulia asin sinabihan niya sinda kan mga itinaram niya saimo.

¹⁰Dai mo pawaraan nin halaga an itinaram saimo ni Akior. Pahalagahan mo huli ta totoo idto. Mayo nin makakakulog o makakasakop sa samong nasyon sagkod na dai sinda nagkakasala tumang sa saindang Dios.

¹¹“Alagad mayo ngunyan nin makakaolang saimo tanganing manggana ka huli ta nakatalaan na sindang magadan. Nasa irarom sinda ngunyan kan kapangyarihan nin kasalan; sa pagkakasala ninda mapapaanggot ninda an Dios.

¹²Ubos na an saindang pagkakan asin problema na ninda an tubig kaya nagplano na sindang bunoon an saindang mga hayop asin kakanon an gabos na pagkakan na ipinapangalad sainda nin Dios.

¹³Nagdesisyon na sindang kakanon an mga enot na bunga kan trigo asin an himoloan kan arak saka lana, na kinonsagra ninda saka itinalaan para sa mga padi na naglilingkod sa samong Dios duman sa Jerusalem, maski iyan dai pwedeng dutaan man lamang nin siisay man.

¹⁴Nagpadara sinda nin mga lalaki sa Jerusalem tanganing maghagad nin permiso huli ta maski an nag-eerok duman naggibo na man nin siring.

¹⁵Sa aldaw na tugotan sinda dangan kakanon ninda an pagkakan, magagadan mo sinda.

¹⁶Kaya kan naaraman ko ini, naghale ako tolos sa sakong banwaan. Sinugo ako nin Dios tanganing kaiba mong gumibo nin sarong bagay na ngangalasan kan bilog na kinaban, sa oras na madangog iyan kan mga tawo.

¹⁷Relihiyosa akong babae; nagsasamba ako sa Dios nin langit aldaw-banggi. Kagurangnan ko, magdadanay ako digdi asin barubanggi maduman ako sa kapantayan saka mamimibi sa Dios. Itataram niya sako kun nagkasala na sinda.

¹⁸Sa oras na maaraman ko ini, mabalik ako tanganing sabihan ka asin pwede ka nang lumuwas kaiba an bilog mong hukbo. Dai makakalaban saimo an mga Israelita.

¹⁹Gigiyahan taka pasiring sa tahaw na kabtang kan daga nin Juda sagkod na makaabot kita sa Jerusalem, saen kokoronahan taka bilang sarong hade sa tahaw kan syudad. Iwawarak mo an mga taga Jerusalem arog sa mga karnero na mayo nin pastor. Maski ayam dai mangangahas na magbatok saimo. Enot na ipinahayag sako nin Dios an mga bagay na ini asin sinugo niya ako tanganing ibareta iyan saimo.”

²⁰An sinabi ni Judit nagustohan ni Holofernes asin kan saiyang mga sorogoon. Nagngalas sinda sa kadonongan niya.

²¹Nagsarabi sinda, “Sa gayon saka sa kadonongan, mayo nin babaeng makakaarog saiya sa bilog na kinaban.”

²²Sinabihan si Judit ni Holofernes, “Marahay an ginibo nin Dios sa pagsugo saimo digdi tanganing tawan kami nin kapangganahan asin tanganing tunawon idtong mga nag-olog-olog ki Hadeng Nebukadnezzar.

²³Bako ka sanang magayon kundi marahay ka pang magtaram. Kun gigibohon mo an saimong ipinanuga, an saimong Dios magigin sakong Dios. Mag-eerok ka sa palasyo ni Hadeng Nebukadnezzar asin magigin bantog sa bilog na kinaban.”