Read Central Bicolano Judith 12 Bible Online

Judith 12 - Central Bicolano bible

Judith 12

¹Pinagbotan ni Holofernes an saiyang mga tawohan na darahon si Judit sa lamesa na inandaman kan saiyang mga kagamitan sa pagkakan na gibo sa plata. Nagboot man siya na tawan si Judit kan saiyang espesyal na pagkakan saka arak.

²Alagad nagsabi si Judit, “Dai ako pwedeng magkakan kan saindong kakanon huli ta maglalapas ako kan katogonan kan sakong Dios. Kakakanon ko sana an dinara kong pagkakan.”

³“Alagad ano an gigibohon mo kun maubos na an saimong pagkakan saka arak?” an hapot ni Holofernes. “Saen kami makua nin pagkakan para saimo? Mayo nin ibang Israelita digdi sa samong kampo.”

⁴Nagsimbag si Judit, “Siring na buhay ka, sakong kagurangnan, an sakong pagkakan dai mauubos sagkod na dai nagigibo nin Kagurangnan sa paagi ko an saiyang plano.”

⁵Dangan dinara si Judit kan mga sorogoon ni Holofernes sa sarong tolda asin nagkatorog siya duman sagkod matangang banggi. Bago mag-aga, nagbangon siya

⁶dangan nagpadara siya nin mensahe ki Holofernes na naghahagad na tugotan siyang magduman sa kapantayan tanganing mamibi.

⁷Pinagbotan ni Holofernes an saiyang mga bantay na paagihon si Judit. Tolong aldaw na nag-erok si Judit sa kampo, asin barubanggi nagduduman siya sa kapantayan na harani sa Betulia tanganing mangarigos sa burabod.

⁸Pakatapos niyang mangarigos, namimibi siya sa Kagurangnan Dios na giyahan siya sa saiyang plano na tawan nin kapangganahan an Israel.

⁹Dangan malinig na minabalik siya sa kampo, saka nagdanay sa laog kan tolda sagkod na makakakan kan pamanggi.

¹⁰Kan ikaapat na aldaw, nagbangkete si Holofernes para sa haralangkaw niyang opisyal, alagad dai niya inalok an mga opisyal na igwa nin katongdan kan aldaw na idto.

¹¹Nagsabi siya ki Bagoas, an eunuko na namamahala kan personal niyang mga lakaw, “Dumuman ka sa Hebreya na nasa pangataman mo, asin alokon mo siyang dumigdi sa tolda ko tanganing magkakan asin mag-inom kaiba nyato.

¹²Makasosopog sato kun dai ta kuahon an oportunidad na ini na madorogan an sarong babae na arog saiya. Ngingisihan niya ako kun dai ko siya makua.”

¹³Kaya binayaan ni Bagoas si Holofernes dangan nagduman ki Judit. Sinabihan niya ini, “Magayon na babae, inaalok ka kan heneral na magduman sa saiyang tolda tanganing mag-inom nin arak. Magduman ka saka mag-ogma arog kan mga babae sa Asiria na naglilingkod sa palasyo ni Nebukadnezzar. Sarong dakulang onra an bagay na ini.”

¹⁴Nagsimbag si Judit, “Siisay ako na masayuma sa sakong kagurangnan? Gigibohon ko tolos an ano man na mawilihan niya, asin magigin kaogmahan ko iyan sagkod sa aldaw nin sakong kagadanan.”

¹⁵Kaya nagtindog si Judit dangan isinulot an pinakamarahay niyang gubing. Nag-enot saiya an sorogoon niyang babae asin sa atubangan ni Holofernes, ibiniklad kaini sa daga an anit kan kordero na itinao ni Bagoas ki Judit na tutukawan kaini mantang nagkakakan.

¹⁶Naglaog si Judit sa tolda ni Holofernes dangan nagtukaw. Nakamate nin karigsokan si Holofernes kan mahiling niya si Judit; nagkaigwa siya nin labi-labing kamawotan saiya. Magpoon kan enot na aldaw na nahiling niya si Judit, naghanap na siya nin oportunidad na makua ini.

¹⁷Kaya nagsabi si Holofernes, “Uminom ka asin mag-ogma sa kaibahan mi.”

¹⁸Nagsimbag si Judit, “Mainom ako, kagurangnan ko; an aldaw na ini iyo an pinakamaogmang aldaw sa sakong buhay.”

¹⁹Dangan kinua niya an inandam kan saiyang sorogoon, asin nagkakan saka nag-inom siya sa atubangan ni Holofernes.

²⁰Naogma saiya nin marahay si Holofernes kaya mas dakul na arak an ininom kaini ki sa iniinom niyang arak sa laog nin sarong aldaw sa bilog niyang pagkabuhay.