Read Central Bicolano Judith 14 Bible Online

Judith 14 - Central Bicolano bible

Judith 14

¹Dangan sinabihan sinda ni Judit, “Hinanyoga nindo ako, mga kahimanwa ko. Kuahon nindo an payo na ini dangan isabit nindo sa luwas kan kudal.

²Pumili kamo nin sarong lider nindo, asin pagliwanag kan aldaw, pakuahon nindo nin mga armas an gabos na makokosog na lalaki. Paluwason nindo sinda sa banwa kaiba kan lider, na garo malugsot sa pagsalakay sa kampo kan mga taga Asiria duman sa kapantayan.

³Kukuahon kan mga bantay na taga Asiria an saindang mga armas, saka madaralagan sa kampo tanganing pukawon an saindang mga opisyal. Madaralagan man an mga opisyal pasiring sa tolda ni Holofernes alagad dai ninda siya makukua. Matatakot an bilog na hukbo saka madulag saindo.

⁴Dangan lamagon nindo sinda, kamo gabos na nag-eerok sa mga pagdolonan nin Israel, asin gadanon nindo sinda mantang nagdudurulag.

⁵Alagad bago an gabos na ini, darahon nindo sako si Akior na Ammonita. Boot kong mahiling kun mamimidbid niya si Holofernes, an tawong nag-olog-olog sa Israel saka nagsugo digdi ki Akior, sa paghona na magagadan ini kaiba ta.”

⁶Kaya kinua ninda si Akior sa harong ni Uzzias. Alagad kan nag-abot ini saka nahiling an payo ni Holofernes na kapot kan saro sa kalalakihan, nadismayo siya saka natumba sa daga.

⁷Kan ikatindog ninda siya, nagluhod si Akior sa atubangan ni Judit bilang pagtaong galang. Nagsabi siya, “Omawon ka logod kan lambang pamilya sa daga nin Juda saka magtakig logod sa takot an lambang nasyon kun madangog ninda an saimong ngaran.

⁸Osipan man sako kun paano mo ginibo an bagay na ini.” Kaya sa atubangan kan mga tawo, isinaysay saiya ni Judit an gabos na ginibo niya magpoon kan maghale siya sagkod kan oras na idto.

⁹Pakatapos niyang magtaram, nagkurahaw sa kaogmahan an mga tawo. Nag-aningal kan tingog nin kaogmahan an bilog na banwa.

¹⁰Kan madangog ni Akior an gabos na ginibo kan Dios nin Israel, nagin pusog siyang paratubod. Sinerkomsisyon siya asin nagin kaayon kan komunidad nin mga Israelita, siring man an saiyang mga kapagarakian sagkod ngunyan.

¹¹Kan magbanaag an kaagahon, isinabit kan mga Israelita sa luwas kan kudal an payo ni Holofernes. Dangan kinua kan gabos na lalaki an saindang mga armas saka grupo-grupong nagduman sa mga agihan sa kabukidan.

¹²Kan mahiling sinda kan mga taga Asiria, ipinaisi ninda sa saindang mga opisyal an nangyayari. Ipinaisi man ini kan mga opisyal sa mga pamayo ninda.

¹³An mga lalaking ini nagduman sa tolda ni Holofernes dangan nagsabi ki Bagoas, “Pukawon mo an heneral! Nangahas na naglugsot hale sa bukid an mayo nin halagang mga Israelita tanganing makigera; naghahanap sana sinda kan saindang kataposan.”

¹⁴Naglaog sa tolda si Bagoas saka nagtoktok sa kwartong torogan, huli ta naghona siya na torog si Holofernes kaiba si Judit.

¹⁵Kan mayo nin nagsimbag, kinabig niya an kurtina, nagdagos sa laog, asin nahiling niya an pugot na hawak ni Holofernes na nakadapa sa plataporma.

¹⁶Makosog na nagkurahaw si Bagoas. Naghaya siya, nag-agrangay saka nagkurahaw asin ginisi an saiyang gubing.

¹⁷Nagduman siya sa tolda na pinag-eerokan ni Judit, asin kan dai niya ini nahiling, nagdalagan siya sa luwas. Dangan nagkurahaw siya sa mga opisyal,

¹⁸“Dinaya ninda kita! Sarong Hebreya an nagtaong kasosopgan sa bilog na kahadean ni Nebukadnezzar. Laog kamo digdi! Nakahutad sa daga si Holofernes na mayo nin payo!”

¹⁹Kan madangog ini kan mga opisyal, ginisi ninda an saindang mga gubing asin natakot nin marahay. An makosog nindang pagtangis saka pagkurahaw nadangog sa bilog na kampo.