Read Central Bicolano Judith 15 Bible Online

Judith 15 - Central Bicolano bible

Judith 15

¹Kan madangog kan mga soldados an nangyari, nakobhanan sinda

²asin nagpoon magtakig huli sa takot. Nagdalagan sinda sa manlaen-laen na direksyon kan kampo, asin dai na sinda naghinguang magkasararo mantang nagdudulag pasiring sa mga agihan sa mga bukid asin sa mga kapantayan.

³An mga soldados na nagkampo sa kabukidan sa palibot kan Betulia nagpoon man na magdulag. Dangan nag-abot an mga soldados na Israelita na nagralamag sainda.

⁴Nagpadara nin mga sugo si Uzzias sa mga banwa nin Betomestaim, Bebai, Koba, Kola, saka sa bilog na daga nin Israel tanganing ibareta sainda an nangyari, asin tanganing sadolon sinda na mag-ayon sa paglamag saka paggadan sa mga kaiwal.

⁵Kan makaabot sainda an bareta, nag-ayon an lambang lalaki sa Israel sa pagsalakay sa mga kaiwal asin sa paggadan sainda sagkod sa Koba. Nag-ayon man sa pagsalakay an mga taga Jerusalem saka an gabos na nag-eerok sa kabukidan, kan masabihan sinda manongod kan nangyari sa kampo kan mga taga Asiria. Hinipaan kan mga taga Gilead saka Galilea an aagihan kan nagdudulag na mga taga Asiria asin dakul nin marahay an nagadan ninda sa mga ini. Linamag ninda an mga ini sagkod sa rehiyon sa palibot nin Damasco.

⁶Naglugsot an iba kan mga taga Betulia sa kampo kan mga taga Asiria, sinamsaman an kampo asin dakul an nasamsam ninda.

⁷Kan magbalik an mga soldados na Israelita hale sa panggagadan, kinua ninda an natada pang masasamsam. Nakihiras man an mga tawong nag-eerok sa mga banwa saka baryo huli ta dakul nin marahay an nasamsam.

⁸Nag-abot hale sa Jerusalem si Joakim, an Halangkaw na Padi, saka an konseho nin Israel tanganing mahiling ninda an dakulang mga bagay na ginibo nin Kagurangnan para sa saiyang banwaan asin mahiling ninda si Judit tanganing komustahon.

⁹Pag-abot ninda, inomaw ninda siya, “Ika an korona nin kamurawayan nin Jerusalem, an bayani nin Israel, an orgulyo asin kaogmahan kan samong banwaan!

¹⁰Solo ka sana kan gibohon mo an gabos na ini; naggibo ka nin dakulang karahayan sa Israel, asin nawiwilihan iyan nin Dios. Bendisyonan ka logod nin Dios na Makakamhan sa gabos sagkod pa man.” Nagsimbag an gabos na tawo, “Amen.”

¹¹Uminabot sa treyntang aldaw an pagsamsam kan mga tawo sa kampo kan mga taga Asiria. Itinao ninda ki Judit an tolda ni Holofernes, an gabos na plata, mangko, higdaan saka gabos na kasangkapan kaini. Kinua niya an gabos na ini saka ilinunad sa saiyang mula; kinua niya an saiyang kariton dangan ilinunad man digdi an iba.

¹²Nag-abot an gabos na babae nin Israel tanganing mahiling ninda si Judit; nag-awit sinda saiya nin mga awit nin pag-omaw saka nagsarayaw para saiya. Sa maogmang okasyon na ini, si Judit saka an mga babaeng kaiba niya nagwasiwas nin sanga nin kahoy

¹³asin nagbugtak sa saindang mga payo nin mga tinuhog na dahon nin oliba. Nagduman si Judit sa enotan tanganing pangenotan an mga babae mantang sinda nagsasayaw. Nagsunod sainda an gabos na lalaki nin Israel, na kapot an saindang mga armas, nakasulot nin mga kulintas na burak, asin nag-aawit nin mga awit nin pag-omaw.