Read Central Bicolano Judith 16 Bible Online

Judith 16 - Central Bicolano bible

Judith 16

¹Sa atubangan kan bilog na Israel, nag-awit si Judit kan awit na ini nin pag-omaw saka pasalamat, na sinabayan kan gabos na tawo.

²Nag-awit siya, “Omawon nindo an sakong Dios asin awitan nindo siya; omawon nindo an Kagurangnan sa paagi nin mga tamborin saka gimbal; magtugtog kamo nin bagong awit para saiya. Omawon siya saka maghagad saiya nin tabang.

³An Kagurangnan iyo an paralaban na minatapos nin gera; Ilinigtas niya ako sa mga naglalamag sako asin ibinalik sa kampo kan saiyang banwaan.

⁴Hale sa kabukidan sa amihan nagdatong an mga taga Asiria kaiba an rinibo nindang mga soldados. Napano kan saindang mga soldados an mga kapantayan; nalakop kan mga nakakabayong soldados an kabukidan.

⁵Naghoma sindang susuloon an satong banwaan, gagadanon an satong mga hoben na lalaki, ipapakol sa daga an satong mga omboy, dadarahon sa harayo an satong kaakian asin bibihagon an gabos tang kadaragahan.

⁶Alagad dinaya sinda nin Kagurangnan na Makakamhan; naggamit siya nin sarong babae tanganing paontokon sinda.

⁷An bayani ninda dai nagadan kan mga hoben na soldados o sinalakay saka nagadan kan mga higanteng makokosog. Kundi pinabagsak siya ni Judit na aking babae ni Merari sa paagi kan saiyang gayon.

⁸Tinawan ni Judit nin kapangganahan an naaping banwaan nin Israel kan hukason niya an gubing na sa balo dangan isulot an gubing na lino tanganing dagkahon an kaiwal. Naglahid siya nin mamahalon na olor asin nagbugtak nin laso sa saiyang buhok.

⁹An sandalyas niya nawilihan kan mata kan kaiwal, asin binihag kan gayon niya an saiyang puso. Dangan pinutol kan espada an saiyang liog.

¹⁰Nagtarakig an mga taga Persia sa isog ni Judit; nagngaralas an mga Medo sa saiyang kaisogan.

¹¹Dangan nagkurahaw sa kapangganahan an samong banwaan. Nagluya sinda saka inapi kaidto, alagad napadulag ninda an mga kaiwal na nariribong asin natatakot.

¹²Kami an mga kapagarakian nin mga oripon alagad nagsibog an samong mga kaiwal dangan nagdurulag; ginadan mi sinda arog sa nagdudulag na oripon. Tinunaw sinda kan hukbo nin Kagurangnan.

¹³“Maawit ako nin bagong awit sa sakong Dios. O Kagurangnan, makosog ka saka mamuraway! Dai ka pa lamang nadaog.

¹⁴Tugoteng maglingkod saimo an gabos mong linalang. Itinao mo an pagboot, asin sinda gabos nagkaigwa nin buhay; hinangosan mo sinda, asin sinda gabos nalalang. Mayo nin makakaulang sa saimong pagboot.

¹⁵Nagtakig an kabukidan saka kadagatan, asin garo taro na natunaw an kagapoan kan magdolok ka. Alagad igwa ka nin pagkaherak para sa gabos na nagkukuyog saimo.

¹⁶An Kagurangnan orog na nawiwili sa mga nagkukuyog saiya ki sa gabos na piling karne sa ibabaw kan altar, o sa gabos na mahamot na sakripisyo.

¹⁷Herak man sa mga nasyon na nagtitindog laban sa sakong banwaan. Papadusahan sinda kan Kagurangnan na Makakamhan sa Aldaw nin Paghukom. Mapadara siya nin kalayo saka mga ulod tanganing halonon an saindang mga hawak, asin magtatangis sinda sa kulog sagkod lamang.”

¹⁸Kan mag-abot sa Jerusalem an mga tawo, naglinig sinda kan saindang sadiri dangan nagsamba sa Dios. Idinolot ninda an saindang mga tinutong na atang, mga boluntad na dolot, saka mga regalo.

¹⁹Idinolot ni Judit sa Dios an gabos na rogaring ni Holofernes na itinao saiya kan mga tawo. Dangan bilang sarong espesyal na dolot sa pag-otob nin sarong panuga, idinolot niya sa Kagurangnan an moskitero na kinua niya sa higdaan ni Holofernes.

²⁰Nagpadagos sa pagselebrar an mga tawo sa atubangan kan Templo sa Jerusalem sa laog nin tolong bulan, asin nag-ontok si Judit sa kaibahan ninda.

²¹Kan matapos na an selebrasyon, nagpuli an lambang saro. Nagbalik si Judit sa Betulia tanganing mag-erok sa sadiri niyang lugar. Sagkod sa huring aldaw kan saiyang buhay, nabantog siya sa bilog na daga nin Israel.

²²Dakul na lalaki an boot mag-agom saiya, alagad dai siya nagpaagom giraray pakagadan kan agom niyang si Manases.

²³Naglakop an saiyang kabantogan, asin nag-erok siya sa harong na iwinalat saiya kan saiyang agom. Bago siya nagadan, binanga ni Judit an saiyang rogaring sa hararaning kadugo kan saiyang agom saka sa sadiri niyang kadugo. Tinalingkasan man niya an sorogoon niyang babae. Kan magadan siya sa Betulia sa edad na syento singko, ilinubong siya sa kataed kan saiyang agom. Pitong aldaw na pinagmondoan kan banwaan nin Israel an saiyang pagkagadan.

²⁵Kan nabubuhay pa si Judit mayo nin nangahas na magpatakot sa banwaan nin Israel, asin sa laog nin dakul na taon maski kan gadan na siya.