Read Central Bicolano Judith 2 Bible Online

Judith 2 - Central Bicolano bible

Judith 2

¹Kan ikadyes y otsong taon kan paghahade ni Nebukadnezzar, kan ikabeynte y dos na aldaw kan enot na bulan kan taon na idto, siya saka an saiyang mga parahatol nagkasararo na gibohon na an homa niyang pagbalos sa gabos na nasyon na nagsayumang magtabang saiya.

²Inapod kan hade an gabos niyang heneral saka mga pangenot na opisyal dangan tinaraman kan ginibong pagpasaluib saiya kan mga nasyon sa solnopan. Nag-oroyon sinda na gadanon an lambang saro na nagsayumang tabangan siya sa gera. Dangan ilinadawan niya sainda an plano niyang pagsalakay.

⁴Pakatapos kan orolay, itinao ni Nebukadnezzar ki Holofernes, na iyo an pangenot na heneral kan hukbo asin ikaduwa saiya, an pagboot na ini:

⁵“Ako si Nebukadnezzar, an dakulang hade saka pamayo kan bilog na daga, nagboboot saimo na magpili nin maiisog na soldados: syento beynte mil na hukbong naglalakaw saka dose mil na nakakabayo.

⁶Dangan salakayon mo an mga nasyon sa solnopan huli ta dai sinda nagkuyog kan sakong pagboot.

⁷Patanidan mo sinda na mag-andam nin mga dolot na daga saka tubig sa pagpahiling na minasuko na nanggad sinda. Ipapamate ko sainda an labi-labi kong kaanggotan asin tutunawon ko nanggad sinda. An saindang daga mapapano kan sakong hukbo na masamsam kaiyan.

⁸An mga kapantayan papanoon ko kan saindang mga bangkay asin an lambang sapa saka salog papanoon ko kan saindang mga bangkay na iaanod kan tubig.

⁹Bibihagon ko an gabos na matatadang buhay dangan dadarahon ko sinda sa mga poro kan daga.

¹⁰“Mag-enot ka asin sakopon mo para sako an gabos nindang teritoryo. Kun magsuko sinda saimo, bantayan mo sinda sagkod na mag-abot ako sa pagpadusa sainda.

¹¹Alagad kun lumaban sinda, dai mo sinda paligtason. Gadanon mo sinda dangan samsaman mo an gabos na rehiyon na masakop mo.

¹²Nanuga ako na gigibohon ko nanggad an sinabi kong ini maski ano an mangyari sako saka sa sakong kahadean.

¹³Kuyogon mo an gabos na ipinagboot ko saimo. Giromdomon mo na ako an saimong hade. Gibohon mo tolos an lambang pagboot ko saimo.”

¹⁴Naghale si Holofernes sa atubang kan hade asin inapod niya an gabos na pamayo, an mga heneral saka an mga opisyal kan hukbo kan Asiria.

¹⁵Siring sa pagboot kan hade, nagpili siya nin syento beynte mil kan pinakamarahay sa naglalakaw na hukbo asin dose mil kan pinakamarahay sa nakakabayong mga parapana.

¹⁶Ibinugtak niya sinda sa tamang lugar tanganing makigera.

¹⁷Nagdara man siya nin dakul na kamelyo, asno, asin mga mula na magdadara kan mga kagamitan ninda. Bilang pagkakan ninda nagdara sinda nin dakul na karnero, baka, asin kanding.

¹⁸An lambang soldados nag-ako man nin dakul na pagkakan asin halangkaw na bayad hale sa palasyo kan hade.

¹⁹Kaya naglakaw si Holofernes saka an bilog na hukbo; naenot sinda ki Hadeng Nebukadnezzar. Nagruluwas an mga karwahe, an mga soldados na nakakabayo asin an naglalakaw na mga soldados tanganing salakayon an mga nasyon sa solnopan.

²⁰May nag-iba pa saindang mga grupo na dai mabilang huli sa kadaklan, na garo mga doron o pinong baybay sa desyerto.

²¹Tolong aldaw pakatapos na maghale sinda sa Nineve, nag-abot sinda sa kapantayan nin Bectilet. Nagkampo sinda sa pamitisan kan kabukidan na harani sa amihan kan Cilicia.

²²Hale duman, pinangenotan ni Holofernes pasiring sa mabulod na daga an bilog niyang hukbo, an saiyang mga soldados na naglalakaw saka nakakabayo, asin an mga nakakarwahe.

²³Rinonot niya an Libya asin an Lydia dangan sinamsaman niya an gabos na taga Rassis saka an mga Ismaelita na nag-eerok sa gilid kan desyerto na nasa habagat kan daga kan mga taga Kelean.

²⁴Dangan nagbalyo si Holofernes sa Salog nin Eufrates, nag-agi sa Mesopotamia saka rinaot an nakukudalan na mga syudad sa tampi kan Salog nin Abron sagkod sa dagat.

²⁵Sinakop niya an teritoryo nin Cilicia saka ginadan an lambang tawo na naghinguang lumaban saiya. Pakatapos, nagdagos siya sa habagat na parte kan pagdolonan nin Jafet, harani sa Arabia.

²⁶Pinalibotan niya an mga Midianita, sinulo an saindang mga tolda, saka ginadan an mga karnero duman.

²⁷Naglugsot si Holofernes sa kapatagan sa palibot kan Damasco kan panahon na inaani an trigo. Sinulo niya an gabos na oma, ginadan an mga karnero saka mga baka, dangan sinamsaman an mga syudad. Rinaot niya an bilog na kapatagan saka ginadan an gabos na hoben na lalaki.

²⁸Inabotan nin dakulang takot an gabos na tawo na nag-eerok sa baybayon kan Dagat nin Mediteraneo, asin huli kaiyan nagtarakig sinda. Nagkakorobhanan man an lambang nag-eerok sa Sidon, Tiro, Sur, Osina, Jamnia, Asdod, asin Askelon.