Read Central Bicolano Judith 3 Bible Online

Judith 3 - Central Bicolano bible

Judith 3

¹An mga nasyon na ini nagpadara ki Hadeng Nebukadnezzar nin mga sugo na dara an mensaheng ini:

²“Nagdadanay kaming maimbod saimo, dakulang Hadeng Nebukadnezzar; andam kaming maglingkod saimo saka magkuyog kan arin man na pagboot na itao mo samo.

³Giboha an anoman na pagmarahayon mo sa samong mga edipisyo, mga daga, mga oma nin trigo, mga hayop asin mga tolda.

⁴Magigin saimong mga oripon an samong namamanwaan, asin giboha an boot mo sa samong mga banwa.”

⁵Pagkasabi kan mga sugo kan mensaheng ini,

⁶pinangenotan ni Holofernes an hukbo ni Nebukadnezzar sa baybayon kan Mediteraneo. Nagbugtak siya nin mga bantay sa gabos na banwang nakukudalan saka nagpili siya nin mga lalaking tagaduman bilang mga soldados na reserba.

⁷An mga nag-eerok sa mga banwang ini asin sa palibot na mga baryo nagsarabat saiya na may darang mga kulintas nin tinuhog na mga burak asin nagsasayaw sa tugtog kan tamborin.

⁸Alagad rinaot ni Holofernes an gabos nindang mga lugar na pagsasambahan saka pinalod an saindang mga banal na kahoy, huli ta igwa nin pagboot saiya na raoton an gabos na dios-dios kan daga tanganing an gabos na nasyon saka mga tribu ki Nebukadnezzar sana magsamba asin mamibi bilang sarong dios.

⁹Dangan nakaabot si Holofernes sa Kapantayan nin Jezreel, harani sa Dotan, na nakaatubang sa pangenot na agihan kan kabukidan nin Juda.

¹⁰Nagkampo sinda sa pagultanan nin Geba saka Sitopolis, dangan nag-ontok duman sa laog nin sarong bulan tanganing matipon an gabos na kaipuhan kan saiyang hukbo.