Read Central Bicolano Judith 4 Bible Online

Judith 4 - Central Bicolano bible

Judith 4

¹Nabaretaan kan mga taga Juda an manongod ki Holofernes na pamayo kan mga hukbo ni Hadeng Nebukadnezzar, kun paanong sinalakay niya an mga nasyon, asin kun paanong sinamsaman niya saka rinaot an saindang mga templo.

²Nagkatarakot saiya an mga taga Juda saka nagkaharadit sa tibaad na gibohon niya sa Jerusalem asin sa Templo kan Kagurangnan na saindang Dios.

³Minabalik pa sana sinda sa Juda hale sa pagkatapokan asin dai pa nahaloy na kinonsagra ninda an Templo, an mga kagamitan kaini saka an altar, pakatapos na madigtaan an mga ini.

⁴Kaya nagpadara sinda nin patanid sa bilog na rehiyon nin Samaria, dangan sa mga banwa nin Kona, Bet-horon, Belmain, Jerico, Koba saka Aesora, siring man sa Kapantayan nin Salem.

⁵Nagduman tolos sinda sa mga alitoktok kan kabukidan, pinapusog an mga baryo duman, saka nagtipon nin dakul na pagkakan bilang pag-andam sa gera. Marahay ngani ta nakaani pa sana sinda kaidto kan saindang mga oma.

⁶An Halangkaw na Padi na si Joakim, na nasa Jerusalem kan panahon na idto, nagsurat sa mga nag-eerok sa mga banwa nin Betulia saka Betomestaim, na atubang sa Kapantayan nin Jezreel, harani sa Dotan.

⁷Nagboot siya sainda na bantayan an mga agihan patukad sa kabukidan huli ta madaling masalakay an Juda hale digdi. Pasil nindang mapaontok an siisay man na maghingowang maglaog digdi huli ta duwa sana katawo an pwedeng mag-agi nin sabay sa agihan.

⁸Ginibo kan mga Israelita an pagboot sainda kan Halangkaw na Padi na si Joakim asin kan konseho na nagtiripon sa Jerusalem.

⁹An lambang lalaki sa Israel tudok sa puso na namibi sa Dios, saka nagpakumbaba saiya sa paagi nin pag-ayuno.

¹⁰Naggubing sinda nin sako—sinda saka an saindang mga agom, mga aki, mga hayop, asin an mga dayuhan na nag-eerok sa kaibahan ninda, an lambang oripon saka trabahador na tinatandanan ninda.

¹¹An altar pinatos man ninda nin sako. Dangan nagdapa sa atubangan kan Templo an gabos na lalaki, babae, saka aki; nagdapa sinda duman sa presensya nin Kagurangnan, na gabos nakagubing nin sako, saka an lambang saro may abo an payo. Nagkasararo sinda sa pagpamibi nin maigot sa Dios nin Israel, nakikimaherak saiya na dai niya itugot na masakop an saindang mga aki, na mabihag an saindang mga agom asin dai maraot an saindang banwa. Nakimaherak sinda saiya na dai niya pagtugotan an mga pagano na raoton asin digtaan an Templo sa kaogmahan kan mga ini.

¹³Nadangog nin Kagurangnan an saindang mga pamibi saka nahiling niya an saindang kasakitan. Huli ta sa laog nin dakul na aldaw an mga taga Juda asin taga Jerusalem nagpadagos sa pag-ayuno sa atubangan kan Templo nin Kagurangnan na Makakamhan.

¹⁴An Halangkaw na Padi na si Joakim, an mga padi, asin an gabos na naglilingkod sa Templo nin Kagurangnan, nakagubing nin sako kun nagdodolot kan aroaldaw na tinutong na atang, kan boluntad na dolot kan mga tawo, patin kan panugang dolot.

¹⁵Binugtakan ninda nin abo an saindang sulot na turban, dangan makosog sindang namibi sa Kagurangnan, nangangayongayo saiya na maherak sa bilog na nasyon.