Read Central Bicolano Judith 5 Bible Online

Judith 5 - Central Bicolano bible

Judith 5

¹Kan maaraman ni Holofernes, na heneral kan hukbo nin Asiria, na nag-andam sa pakigera an mga Israelita, na pinaserahan an mga agihan sa bukid, na pinapusog an alitoktok kan kabukidan, saka nagbugtak nin mga barikada sa mga kapatagan,

²naanggot siya nin marahay kaya ipinaapod niya an gabos na pamayo sa Moab, an gabos na heneral na Ammonita, saka an gabos na gobernador kan rehiyon sa baybayon kan Mediteraneo.

³Nagsabi siya sainda, “Sabihi nindo ako, kamong mga Cananeo, kun anong klase nin tawo an mga nag-eerok sa kabukidan na ini. Arin na mga syudad an pinag-eerokan ninda? Gurano kadakula an saindang hukbo? Ano an ginikanan kan saindang kapangyarihan saka kosog? Siisay an hade na nangengenot kan saindang hukbo?

⁴Tadaw ta sinda sana an taga solnopan na nagsayumang lumuwas saka magsuko sako?”

⁵Dangan nagsimbag si Akior na lider kan gabos na Ammonita, “Kagurangnan, kun mawilihan mong maghinanyog sako, isasabi ko an katotoohan manongod sa mga tawong ini na nag-eerok sa mga bukid na harani sa saimong kampo. Dai ako magpuputik saimo.

⁶An mga tawong ini gikan sa rasa nin nagkapirang taga Babilonia.

⁷Kaidtong panahon nag-erok sinda sa Mesopotamia, huli ta habo nindang sambahon an mga dios-dios kan saindang ginikanan.

⁸Binayaan ninda an mga gawe kan saindang mga ginikanan saka sinamba an Dios nin langit, an Dios na minimidbid ninda ngunyan. Kan pahaleon sinda sa saindang daga huli ta nagsayuma sindang sambahon an mga dios-dios kan saindang ginikanan, nagdulag sinda pasiring sa Mesopotamia, asin haloy sindang nag-erok duman.

⁹“Pakatapos, pinagbotan sinda kan saindang Dios na maghale sa Mesopotamia saka magduman sa daga nin Canaan. Nag-erok sinda duman, asin nagin mayaman nin marahay sa bulawan, plata saka mga hayop.

¹⁰Kan maglakop an gutom sa bilog na daga nin Canaan, nagpasiring sinda sa Egipto asin nag-erok duman sagkod na may pagkakan pa duman. Mantang idtoon sinda, nagdakul sindang marahay kaya dai na sinda kayang bilangon.

¹¹Kaya kinalaban sinda kan hade nin Egipto. Inapi niya sinda asin pirit na pinatrabaho na maggibo nin mga ladrilyo. Pinasakitan niya sinda saka inoripon.

¹²Alagad namibi sinda sa saindang Dios, asin nagpadara siya nin mga peste na nagpasakit sa mga Egipcio. Kan pahaleon sinda kan mga Egipcio,

¹³pinamara kan saindang Dios an Dagat na Pula na aagihan ninda,

¹⁴dangan pinangenotan niya sinda sa dalan pasiring sa Sinai asin sa Kades-barnea. “Pinahale kan mga Israelita an gabos na tawong nag-eerok sa habagat na parte kan Canaan,

¹⁵sinakop ninda an daga kan mga Amoreo, ginadan an mga taga Hesbon, binalyo an Salog nin Jordan, asin sinakop an bilog na rehiyon sa kabukidan.

¹⁶Pinahale ninda an mga Cananeo, Perezeo, Jebuseo, an mga taga Shekem, asin an gabos na Girgeseo. Kaya sa halawig na panahon digdi na nag-eerok sa kabukidan na ini an mga Israelita.

¹⁷“An karatan ikinakaongis kan saindang Dios, asin sagkod na dai sinda nagkakasala tumang saiya, nag-uuswag sinda.

¹⁸Alagad kan dai sinda nagkuyog sa saiya, nagtios sinda nin dakul na beses na pagkadaog sa gera asin dinara sindang bihag sa sarong dayuhan na daga. Rinaot kan kaiwal an templo kan saindang Dios, saka sinakop an saindang mga syudad.

¹⁹Alagad ngunyan na nagbalik sinda sa saindang Dios, nakapuli sinda hale sa mga daga na pinagwarakan sainda. Nasadirihan giraray ninda an syudad nin Jerusalem, na namumugtakan kan saindang templo, asin nag-eerok na sinda sa kabukidan huli ta mayo nin nag-eerok duman.

²⁰“Kagurangnan, kun an mga tawong ini nagkakasala tumang sa saindang dios, maski pa dai ninda iyan naaaraman, asin kun masiguro tang may pagkakasala sindang naginibo, manggagana kita kun salakayon ta sinda.

²¹Alagad kun dai sinda nagsuway sa katogonan kan saindang dios, pabayaan mo sinda huli ta tatabangan sinda kan saindang dios asin kita an mapapasopog sa bilog na kinaban.”

²²Pakataram ni Akior, nagpoon magngorob-ngorob an gabos na lalaking nagtitindog sa palibot kan tolda. Hinagad kan mga opisyal ni Holofernes, siring man kan mga taga Moab asin kan mga lalaking hale sa baybayon nin Mediteraneo, na ipagadan si Akior.

²³“Tadaw ta matatakot kita sa mga Israelita?” an hapot ninda. “Maluluya sinda; dai ninda kayang magbugtak nin makosog na depensa.

²⁴Magpadagos kita, Heneral Holofernes! Pasil sana sindang garadanon kan dakula mong hukbo.”