Read Central Bicolano Judith 6 Bible Online

Judith 6 - Central Bicolano bible

Judith 6

¹Kan maontok na an kariribokan kan mga tawong nasa luwas kan konseho, tinaraman ni Holofernes si Akior sa atubang kan bilog na grupo, kan mga lalaking naghale sa baybayon nin Mediteraneo, kan mga taga Moab, asin kan tinandanan na mga soldados na Ammonita.

²“Siisay ka man, Akior, ta nagpopropesiya ka samo arog kan ginibo mo ngunyan? Siisay ka na masabi samo na dai kami makigera sa mga Israelita huli ta susurogon sinda kan saindang dios? Igwa pa daw nin ibang dios pwera ki Nebukadnezzar? Ipapadara ni Nebukadnezzar an saiyang hukbo asin paparaon niya sinda sa daga. Dai sinda matatabangan kan saindang dios.

³Naglilingkod kami ki Nebukadnezzar, asin dadaogon mi sinda na garo baga saro sanang tawo an bilog nindang hukbo. Dai ninda kayang labanan an samong mga soldados na nakakabayo.

⁴Uuboson mi sinda. Matotomtom kan saindang dugo an kabukidan, asin mapapano kan saindang mga bangkay an mga kapantayan. Pakatapos kan pagsalakay mi, mapapara nanggad sinda. Iyo ini an pagboot ni Nebukadnezzar, an kagurangnan kan bilog na daga, asin dai siya nagtataram nin mga tataramon na masusudya.

⁵Akior saro kang mayo nin halagang tinandanan na Ammonita asin nagtataram kang arog sa sarong traydor. Kaya magpoon ngunyan, dai mo ako mahihiling sagkod na dai ko pa napapadusahan an rasang ini nin nagdurulag na mga oripon.

⁶Dangan sa pagbalik ko, gagadanon ka kan sakong mga soldados. An saimong ngaran mabibilang sa listahan kan mga nagkagaradan.

⁷“Dadarahon ka ngunyan kan sakong mga tawohan sa kabukidan saka babayaan sa sarong banwa kan mga Israelita,

⁸dangan magagadan ka kaiba kan mga tawo duman.

⁹Kun naglalaom ka na dai ko masasakop an mga Israelita, dai ka maghadit. Gigibohon ko an gabos kong sinabi; tandaan mo iyan!”

¹⁰Dangan pinagbotan ni Holofernes an saiyang mga tawohan na naghahalat sa saiyang tolda na dakopon si Akior asin darahon sa Betulia saka itao sa mga Israelita.

¹¹Kaya dinakop ninda si Akior saka dinara sa luwas kan kampo pasiring sa kapantayan. Hale duman dinara ninda siya sa kabukidan, sagkod sa burabod na nasa ibaba kan Betulia.

¹²Kan mahiling sindang nagdadangadang kan mga kalalakihan kan banwa na idto, nagkurua an mga ini nin mga armas saka nagdaralagan sa ibabaw kan bulod. Pinauranan kan lambang lalaki na naggagamit nin lagpitaw an mga soldados ni Holofernes tanganing dai makasakat sa bukid.

¹³Napiritan an mga taga Asiria na magpaipli sa gilid kan bukid, saen ginapos ninda si Akior saka nakahigdang binayaan sa pamitisan kan bukid. Dangan nagbalik sinda ki Holofernes.

¹⁴Kan maglugsot hale sa Betulia an mga Israelita, binutasan ninda si Akior asin dinara sa atubangan kan mga opisyal kan saindang banwa.

¹⁵Kan panahon na idto, an mga opisyal iyo si Uzzias na aking lalaki ni Mikas sa tribu ni Simeon, si Cabris na aking lalaki ni Gotoniel saka si Carmis na aking lalaki ni Melkiel.

¹⁶Inapod kan mga opisyal an kamagurangan kan banwa; nagdaralagan man pasiring sa pinagtiriponan an kababaehan asin an mga hoben na lalaki. Dinara si Akior sa atubangan kan mga tawo, dangan pinonan siyang hapoton ni Uzzias.

¹⁷Itinaram sainda ni Akior an mga pinag-orolayan sa kampo ni Holofernes, an itinaram niya sa mga opisyal kan Asiria, asin kun paano naghambog si Holofernes dapit sa gigibohon niya sa mga Israelita.

¹⁸Kan madangog ini kan mga Israelita, nagruluhod sinda saka nagsamba sa Dios. Namibi sinda:

¹⁹“O Kagurangnan Dios nin langit, hilinga kun paano kami sinopog kan samong mapaabaw-abaw na mga kaiwal! Kaherakan mo kami asin tabangan.”

²⁰Dangan rinanga ninda si Akior saka inomaw huli kan saiyang ginibo.

²¹Kan matapos na an pagtiripon, ipinag-iba ni Uzzias sa saiyang harong si Akior, asin nagbangkete siya para sa kamagurangan. Bilog na banggi sindang namibi sa Dios nin Israel tanganing hagadon an saiyang tabang.