Read Central Bicolano Judith 7 Bible Online

Judith 7 - Central Bicolano bible

Judith 7

¹Sunod na aldaw, tinipon ni Holofernes an bilog niyang hukbo, siring man an saiyang mga kaalyansang hukbo. An dakulang hukbong ini igwa nin syento setenta mil na mga soldados na naglalakaw saka dose mil na nakakabayo; dai kabilang digdi an mga soldados na paradara kan mga kagamitan. Pinagbotan niya sinda na magpasiring sa Betulia, sakopon an mga agihan sa bukid, asin salakayon an mga Israelita. Kaya nagluwas sinda

³saka nagpatindog nin kampo sa kataed kan burabod sa kapantayan na harani sa Betulia. Mahiwas nin marahay an kampo kaya nakalakop ini sagkod sa banwa nin Dotan sagkod an Balbaim. Halaba an kampong ini kaya poon sa Betulia nakasagkod ini sa Cyamon na nakaatubang sa Kapantayan nin Jezreel.

⁴Kan mahiling kan mga Israelita an kadakulaan kan hukbo, natakot sinda saka nagsinarabihan, “Uuboson kan mga soldados na iyan an gabos na kakanon sa bilog na daga. Dai magkakanigo an kakanon sa kabukidan, sa mga kapantayan saka sa mga bulod tanganing ipakakan sa hukbong siring kaiyan.”

⁵Alagad maski sinda nagkatarakot, kinua kan gabos na Israelita an saindang mga armas, pinailawan an mga tore, saka andam na nagbantay sa bilog na banggi.

⁶Sunod na aldaw, pinangenotan ni Holofernes an bilog niyang hukbong nakakabayo tanganing mahiling sinda kan mga Israelita sa Betulia.

⁷Siniyasat niya an mga agihan pasiring sa banwa asin an mga burabod na nagtatao nin tubig sa banwa. Sinakop niya an mga burabod dangan nagbugtak siya duman nin mga bantay bago nagbalik sa kampo.

⁸Nagdolok saiya an gabos na lider kan mga Edomita saka Moabita, kaiba an mga pamayo kan hukbong hale sa baybayon nin Mediteraneo. Nagsabi sinda,

⁹“Kagurangnan, kun maghinanyog ka sa ihahatol nyamo dai madadaog an saimong hukbo.

¹⁰An mga Israelitang iyan dai minasarig sa saindang mga armas kundi sa langkaw kan mga bukid na pinag-eerokan ninda, huli ta bakong pasil sakaton an mga bukid.

¹¹Kaya, Heneral Holofernes, dai mo sinda paglabanan nin hampangan asin maski saro mayo nin magagadan sa saimong hukbo.

¹²Duman ka sana sa saimong kampo, asin dai mo man pagpahaleon duman an saimong mga soldados. Pagbotan mo sana an saimong mga tawohan na barikadahan an mga burabod sa pamitisan kan mga bukid,

¹³huli ta duman nagkukua nin tubig an mga tawo sa Betulia. Dangan kun naghihingagdan na sinda sa paha, isusuko ninda saimo an saindang banwa. Kami asin an samong mga tawohan masarakat sa alitoktok kan mga bukid sa palibot tanganing bantayan na mayo nin siisay man na makaluwas sa banwa.

¹⁴Magagadan sa gutom an lambang saro—an mga lalaki, babae saka mga aki. Kaya dai pa ngani kita nagpopoon sa pagsalakay mapapano na nin mga bangkay an mga tinampo duman.

¹⁵Sa paaging ini mapapabayad mo sinda kan pagrebelde ninda saimo asin pagsayuma nindang matoninong na sumuko.”

¹⁶Nagustohan ni Holofernes asin kan gabos niyang mga opisyal an hatol, kaya nagboot siya na gibohon an saindang plano.

¹⁷Hinale kan mga Edomita asin kan singko mil na Ammonita an saindang kampo dangan ibinalyo sa kapantayan tanganing mabantayan an ginigikanan kan tubig kan mga Israelita.

¹⁸Nagsakat sa kabukidan an mga Edomita saka Ammonita dangan nagkampo sa atubangan kan banwa nin Dotan. An nagkapira sa saindang mga tawohan pinaduman ninda sa habagat-sirangan na direksyon nin Acraba, harani sa Kusi na kataed kan Sapa nin Mokmur. Nagkampo sa kapantayan an iba pang kaayon sa hukbo kan Asiria. Nakalakop sa bilog na daga an saindang kampo, huli ta dakul nin marahay an bilang kan mga tolda asin dakul an mga kagamitan na kaipuhan para sa dakulang hukbo na siring sainda.

¹⁹Dangan nagkurahaw an mga Israelita sa paghagad nin tabang sa Kagurangnan na saindang Dios. Nawara na an kosog kan saindang boot huli ta pinalibotan sinda kan mga kaiwal asin mayo sinda nin agihan tanganing makadulag.

²⁰Sa laog nin treynta y kwatrong aldaw pinalibotan an Betulia kan bilog na hukbo kan Asiria—kan hukbong naglalakaw, mga karwahe, saka mga soldados na nakakabayo—sagkod na naubosan nin tubig an banwa.

²¹Nagmara an gabos nindang sagurong saka mga tangke, kaya kaipuhan na irasyon an tubig, alagad dai nagkakanigo sainda an rasyon na tubig sa lambang aldaw.

²²Nanluluya na an mga aki; huli sa paha an mga babae saka mga hoben nagkakadirismayo sa mga tinampo asin trangkahan kan banwa; mayo na sinda nin kosog.

²³An gabos na tawo—an mga lalaki, babae saka mga aki—nagtiripon sa palibot ni Uzzias asin kan mga opisyal kan banwa dangan makosog na nagkurahaw,

²⁴“Papadusahan ka nin Dios huli kan ginibo mo samo! Kamo an dapat na basolon kan nangyayaring ini huli ta dai kamo nagpahayag nin katoninongan sa mga taga Asiria.

²⁵Mayo na ngunyan nin matabang sato! Ibinugtak kita nin Dios sa saindang kapangyarihan. Nanluluya na kita saka naghihingagdan huli sa paha.

²⁶Apoda ngunyan an mga taga Asiria saka isuko nindo an bilog na banwa tanganing samsaman ni Holofernes asin kan saiyang hukbo.

²⁷Mas marahay pang mabihag kita ninda. Gigibohon ninda kitang mga oripon, alagad mabubuhay kita saka dai ta masasaksihan an pagkagadan kan satong mga agom saka mga aki.

²⁸Mga saksi laban saindo an langit saka an daga, siring man an satong Dios, an Kagurangnan nin satong mga ginikanan, na nagpapadusa sato huli kan kasalan nyato asin kan satong mga ginikanan. Mayo na kitang magiginibohan kundi maglaom asin mamibi na dai niya itugot na mangyari sato ngunyan an makuring mga bagay na ini.”

²⁹An lambang saro duman nagpoon magtangis nin makosog saka mamibi sa Kagurangnan na saindang Dios.

³⁰Dangan nagsabi sainda si Uzzias, “Dai kamo mawaraan nin paglaom, mga tugang ko! Maghalat kita nin lima pang aldaw tanganing mahiling ta kun maheherakan kita nin Kagurangnan na satong Dios. Dai nanggad niya kita pababayaan.

³¹Alagad kun mayo nin mag-abot na tabang pakalihis nin limang aldaw, gigibohon ko an sinabi nindo.”

³²Kaya pinahale ni Uzzias an mga tawo. Nagbalik an mga lalaki sa mga kudal saka mga tore na itinalaan sainda tanganing bantayan, mantang an mga babae saka mga aki nagpuli sa saindang mga harong. Nawara na an kosog nin boot kan bilog na banwa.