Read Central Bicolano Judith 8 Bible Online

Judith 8 - Central Bicolano bible

Judith 8

¹Kan panahon na iyan, naaraman ni Judit an manongod sa desisyon ni Uzzias. Si Judit iyo an aking babae ni Merari asin makoapo ni Ox. Si Ox iyo an aking lalaki ni Jose na an mga ginikanan iyo sinda Oziel, Elkias, Ananias, Gideon, Rafaim, Ahitub, Elias, Hilkias, Eliab, Natanael, Salamiel, Sarasadai, saka Israel.

²An agom ni Judit iyo si Manases na gikan man sa parehong tribu saka kamaganakan. Nagadan si Manases kan panahon nin tig-anihan kan sebada.

³Naghelang siya huli kan ngana-nganang init mantang pinapamahalaan niya an mga tawong nagbubugkos kan mga inaning sebada. Nagadan siya sa Betulia na saiyang banwa. Ilinubong siya sa lulubngan kan saiyang pamilya sa oma na nasa tahaw kan Dotan saka Balamon.

⁴Si Judit namuhay bilang balo sa laog nin tolong taon asin apat na bulan.

⁵Kan mabalo siya, nagpagibo siya nin tolda sa atop kan saiyang harong asin duman siya nag-erok, na nakagubing nin sako.

⁶Aroaldaw siyang nag-ayuno sa bilog na panahon nin saiyang pagkabalo, pwera kun bisperas nin Sabbath saka kun mismong aldaw nin Sabbath, kun bisperas kan Pyesta nin Bagong Bulan saka kun mismong Pyesta nin Bagong Bulan, asin kun may mga pyesta saka mga aldaw nin pag-ogma an banwaan nin Israel.

⁷Magayon nin marahay si Judit. Winalatan siya kan saiyang agom nin bulawan asin plata, nin mga sorogoon saka oripon, nin mga hayop saka oma. Siya an namahala kan mga rogaring na ini.

⁸Mayo nin siisay man na nagtaram nin maraot laban ki Judit huli ta saro siyang babaeng relihiyosa.

⁹Nadangog ni Judit an pagreklamo kan mga tawo ki Uzzias, huli ta nawaraan na sinda nin kosog nin boot sa kakulangan nin tubig. Naaraman niya na nanuga si Uzzias sa mga tawo na isusuko niya sa mga taga Asiria an banwa pakalihis nin limang aldaw.

¹⁰Sinugo ni Judit an sarong sorogoon na babae na namamahala kan gabos niyang rogaring na alokon si Uzzias, si Cabris, saka si Carmis na magduman sa saiyang harong.

¹¹Kan mag-abot an mga opisyal, sinabihan sinda ni Judit, “Hinanyoga nindo ako. Kamo an mga lider kan banwaan nin Betulia, alagad bakong tama an sinabi nindo sa mga tawo. Dai kamo dapat nanuga sa atubangan nin Dios na isusuko nindo sa mga kaiwal an satong banwa kun dai magtabang an Kagurangnan sa laog nin nagkapirang aldaw.

¹²Ano an saindong deretso tanganing baloon an Dios arog kan ginibo nindo ngunyan? Siisay kamo na nangahas na gibohon nindo an sadiri nindo bilang kasalihid nin Dios sa tahaw kan mga tawo?

¹³An Makakamhan na Kagurangnan iyo an saindong binabalo! Dai na daw kamo makakanood?

¹⁴Mayo kamo nin paagi tanganing masabotan an nasa laog kan puso nin tawo ni an saiyang iniisip. Alagad nangahas kamong basahon an isip nin Dios asin ipaliwanag an saiyang mga kaisipan. Tadaw ta sinasabi nindo na nasasabotan nindo an Dios, an Kaglalang? Mga katood, mag-ontok na kamo sa pagpapaanggot sa Kagurangnan tang Dios!

¹⁵Kun habo niyang tabangan kita sa laog nin limang aldaw, igwa siyang kapangyarihan na iligtas kita anoman na oras na pilion niya, o ipagadan kita sa satong mga kaiwal.

¹⁶Dai nindo dapat pagbugtakan nin kasagkoran an mga katuyohan kan Kagurangnan tang Dios; huli ta an Dios bakong arog sa tawo na pwedeng takoton, ni arog sa tawo na pwedeng madara sa pakiolay.

¹⁷Kaya mantang naghahalat kita kan pagligtas niya sato, maghagad kita sa saiya nin tabang. Kun boot niya, sisimbagon niya kita.

¹⁸Mayo ni saro kaidto sagkod ngunyan sa satong mga kamaganakan, mga tribu, mga banwa, o mga syudad na nagsamba sa mga dios-dios na gibo kan tawo, maski iyan an ginibo kan satong mga ginikanan.

¹⁹Iyan an dahelan kun tadaw ta itinugot nin Dios na gadanon sinda kan mga kaiwal asin kuahon an gabos nindang rogaring. Nagtios sinda nin dakulang pagkadaog.

²⁰Alagad mayo kita nin ibang minimidbid na Dios kundi an satong Kagurangnan, kaya may paglaom kita na dai niya kita isisikwal, ni an siisay man sa satong banwaan.

²¹“Kun masakop kita kan mga kaiwal, an bilog na Juda masasakop man, dangan sasamsaman an satong Templo sa Jerusalem. Huli kaini papabayadon kita nin Dios sa paagi kan satong mga buhay kun tugotan tang madigtaan an Templo.

²²Sasalaon niya kita huli kan pagkagadan saka pagkabihag kan satong banwaan asin kan pagkaraot kan satong daga na minana nyato. Pagngingisihan saka pag-oolog-ologon kita kan mga tawo sa mga nasyon na pagdadarahan sato bilang mga oripon.

²³Dai mawiwili sato an mga kaiwal nyato sa paagi nin pagsuko sainda ngunyan. Kun sumuko kita, ipapasopog kita nin Kagurangnan na satong Dios.

²⁴“Mga katood, magpahiling kita nin sarong halimbawa sa satong mga kahimanwa. Nasa satong mga kamot an kaligtasan ninda, sagkod kan Templo asin kan altar.

²⁵Binabalo kita nin Kagurangnan na satong Dios, siring na binalo niya an satong mga ginikanan, asin dapat tang ipagpasalamat iyan.

²⁶Giromdoma nindo an pagbalo na ginibo niya ki Abraham saka ki Isaac, asin an nangyari ki Jacob duman sa Mesopotamia kan magtrabaho siya bilang pastor kan mga hayop ni Laban, na tugang na lalaki kan saiyang ina.

²⁷An pagbalo nin Dios sa satong kaimbodan bakong arog kagabat kan pagbalo niya sa satong mga ginikanan. Dai niya ipinadara an padusang ini tanganing baloson kita kundi tanganing patanidan kita na mga nagsasamba saiya.”

²⁸Nagsimbag si Uzzias ki Judit, “Tama an gabos na sinabi mo, asin mayo nin makakanegar kaiyan.

²⁹Bako ini an enot na pagpahiling mo kan saimong kadonongan. Maski kan aki ka pa, nahiling mi na an matanos mong paghatol.

³⁰Alagad napapaha na nin marahay an mga tawo, asin pinirit ninda kami na gibohon para sainda an ipinanuga mi, saka gumibo nin sumpa na dai mi manenegaran.

³¹Kaya ipamibi mo an banwaan huli ta relihiyosa kang babae; ipamibi mo sa Kagurangnan na magpadara nin uran na mapano kan satong mga tangke, tanganing magbalik an satong mga kosog.”

³²Nagsimbag si Judit, “Igwa ako nin gigibohon na dai malilingawan kan gabos na henerasyon kan satong mga kapagarakian.

³³Magbantay kamo ngunyan na banggi sa may trangkahan asin maluwas akong kaiba an sakong sorogoon na babae. Bago mag-abot an aldaw na ipinanuga nindo tanganing isuko sa mga kaiwal an banwaan, ililigtas nin Kagurangnan an Israel sa paagi ko.

³⁴Alagad dai na nindo paghingowahon na maaraman pa an sakong plano huli ta dai ko iyan sasabihon saindo sagkod na dai natatapos an gigibohon ko.”

³⁵Nagsabi saiya si Uzzias saka an ibang mga opisyal, “Lakaw sa katoninongan. Pangenotan ka logod nin Kagurangnan na satong Dios sa gigibohon mong pagbalos sa satong mga kaiwal.”

³⁶Dangan naghale sinda sa toldang erokan ni Judit saka nagbalik sa saindang mga lugar na pinagbabantayan.