Read Central Bicolano Judith 9 Bible Online

Judith 9 - Central Bicolano bible

Judith 9

¹Dangan nagbugtak si Judit nin abo sa payo, binukasan an gubing tanganing mahiling an sako na sulot niya sa irarom kan gubing, dangan nagdapa sa salog. Kan panahon na iyan, idinodolot an pangbangging insenso sa Templo sa Jerusalem. Makosog na namibi si Judit:

²“O Kagurangnan, Dios kan sakong ginikanan na si Simeon, giromdoma an pagtao mo saiya nin armas tanganing baloson an mga dayuhan na nagdakop ki Dina na sarong birhen, naggisi kan saiyang gubing saka nagdigta saiya; hinubaan ninda siya saka sinopog; linupigan ninda siya asin hinalean nin onra, maski ipinangalad mo ini.

³Kaya ipinagadan mo an saindang mga lider—ginadan sa higdaan saen linupigan ninda an daraga. Ginadan mo sinda gabos—an mga oripon, mga prinsipe saka an mga pamayo na nasa saindang mga trono.

⁴Pinabayaan mong mabihag an saindang mga agom saka mga aking babae, asin sinamsam an saindang mga pagsadiri kan mga Israelita, an pinili mong banwaan, na andam sa paggibo kan saimong kabotan. Naanggot nin marahay an mga tugang na lalaki ni Dina huli sa pagkawarae nin onra kan saindang pamilya, kaya naghagad sinda saimo nin tabang. “O sakong Dios, hinanyoga man an pamibi ko, an pamibi nin sarong babaeng balo.

⁵Huli ta an nangyayaring ini, an nangyari kaidto saka an mga mangyayari pa anas kabotan mo. Ika an nagplano kaini gabos, an nangyayari ngunyan saka an mangyayari ngapit. Nagkakatotoo an gabos mong plano.

⁶An mga bagay na boot mong mangyari garo man sanang nangyari na. Huli ta maski kan enot na panahon aram mo na kun ano an saimong mga gigibohon asin kun ano an saimong ihahatol.

⁷Orog na makosog ngunyan an mga taga Asiria; ipinag-oorgulyo ninda an saindang hukbo na nakakabayo saka naglalakaw. Nagsasarig sinda sa saindang mga armas, alagad dai ninda naaaraman na ika, Kagurangnan, iyo an paralaban na minatapos nin gera; Kagurangnan an saimong ngaran.

⁸Sa saimong kaanggotan, gamita an saimong kapangyarihan sa pagronot kan saindang makosog na hukbo. Plano nindang digtaan an saimong Templo, saen sinasamba ka, asin haleon an mga sungay kan altar sa paagi kan saindang mga espada.

⁹Hilinga an saindang kapalangkawan asin kahambogan. Ulaan sainda an saimong kaanggotan! Saro sana akong balo, alagad tawe ako nin kosog tanganing magibo ko an sakong plano.

¹⁰Gamiton mo an madaya kong mga tataramon tanganing magadan sinda gabos, an mga oripon kaiba an saindang kagurangnan. Ronota an saindang kapaabaw-abawan sa paagi nin sarong babae.

¹¹An saimong kapangyarihan dai minasarig sa kadakulan saka kosog nin mga tawo. Huli ta ika an Dios kan mapakumbaba, an katabang kan naaapi, an sandigan kan maluya, an nag-iingat kan mga nabayaan, an paraligtas kan mayo nin paglaom.

¹²Hinanyoga ngunyan an sakong pamibi, O Dios nin sakong ginikanan na si Simeon, an Dios na sinasarigan nin Israel, na kagsakop kan langit asin daga, kaglalang kan mga salog saka dagat, hade kan gabos na linalang. Hinanyoga an sakong pamibi asin

¹³an madaya kong mga tataramon makalugad logod saka makagadan kan mga nagpaplano nin maringis na mga bagay sa saimong tipan saka sa banal na Templo, sa Bukid nin Sion asin sa daga na itinao mo sa saimong banwaan.

¹⁴Ipahiling mo sa bilog mong nasyon asin sa lambang tribu na ika an Dios na Makakamhan saka mapangyari sa gabos, asin ika sana an nag-iingat sa banwaan nin Israel!”