Read Central Bicolano Esther 1 Bible Online

Esther 1 - Central Bicolano bible

Esther 1

¹Hale sa saiyang trono sa Susa, an pangenot na syudad nin Persia, naghade si Hadeng Jerjes magpoon sa India sagkod sa Etiopia; syento beynte y syete gabos na probinsya an sakop niya.

³Kan ikatolong taon nin saiyang paghahade, nagbangkete siya para sa gabos niyang opisyal saka mga administrador, para sa mga hukbo nin Persia saka Media, asin para sa mga gobernador saka mga ginagalangan na tawo kan mga probinsya.

⁴Sa laog nin anom na bulan, ipinahiling niya sainda an mga kayamanan kan saiyang kahadean, an kamurawayan saka kagayonan kaini.

⁵Pakatapos kaiyan, pitong aldaw siyang nagbangkete para sa gabos na taga Susa, mayaman man o dukha. Pitong aldaw na ginibo an bangkete sa patyo kan tatamnan kan palasyo.

⁶An patyo may kurtinang kolor puti saka asul. An lubid kaini, na gibo sa pinong lino na kolor purpura, iginakod sa mga platang siningsing, sa itaas nin mga marmol na harigi. Bulawan saka plata an mga tukawan na ibinugtak sa patyo, asin ini sinalogan nin mosaik na gibo sa porfido, marmol, nakar saka mahalagang mga bato.

⁷An mga kalis gabos bulawan asin manlaen-laen na klase. Daing patod na ipinagserbe an arak kan hade sa bangketeng idto.

⁸An pag-inom mayo nin limitasyon huli ta nagboot an hade sa mga sorogoon sa palasyo na tawan siya asin an saiyang mga bisita nin arak sagkod na boot ninda.

⁹Kan panahon na iyan, si Reyna Vasti nagbangkete man sa laog kan palasyo para sa mga babae.

¹⁰Kan ikapitong aldaw kan bangkete, burat na asin maogma an hade, kaya ipinaapod niya si Mehuman, Bizta, Harbona, Bigta, Abagta, Zetar, asin si Carkas, an pitong eunuko na personal na sorogoon kan hade.

¹¹Pinagbotan niya sinda na kuahon si Reyna Vasti, na sulot an saiyang korona. Magayon na babae an reyna, asin boot kan hade na ipahiling an kagayonan kaini sa mga opisyal asin sa gabos niyang mga bisita.

¹²Alagad kan isabi kan mga sorogoon ki Reyna Vasti an pagboot kan hade, nagsayumang magduman an reyna. Huli kaini naanggot nin makuri an hade.

¹³Kaugalean na kan hade na makihumatol manongod sa katogonan asin sa paghukom, kaya ipinaapod niya an saiyang mga parahatol, na nakakaaram kan dapat na gibohon.

¹⁴An danay niyang hinahagadan nin hatol iyo si Carshena, Setar, Admata, Tarsis, Meres, Marsena, asin si Memucan, an pitong opisyal nin Persia saka Media, na nagkapot kan pinakahalangkaw na katongdan sa kahadean.

¹⁵Nagsabi an hade sa mga lalaking ini, “Ako, si Hadeng Jerjes, nagpadara nin pagboot ki Reyna Vasti sa paagi kan sakong mga sorogoon. Alagad habo niyang magkuyog kaiyan! Ano an sinasabi kan Katogonan na dapat tang gibohon saiya?”

¹⁶Dangan nagpahayag si Memucan sa hade asin sa mga opisyal, “Sinupog ni Reyna Vasti bako sana an hade kundi sagkod an mga opisyal asin an gabos na lalaki sa mga probinsya ni Hadeng Jerjes!

¹⁷Maaaraman kan gabos na babae sa imperyo an gibong ini kan reyna. Huli kaiyan magigin dahelan ini tanganing dai ninda galangan an saindang mga agom. Masabi sinda, ‘Nagboot si Hadeng Jerjes na dumuman saiya si Reyna Vasti, alagad nagsayuma ini.

¹⁸Kun an gibong ini kan reyna maaraman kan mga agom kan opisyal nin Persia saka Media, sasabihon ninda an manongod kaini sa saindang mga agom na lalaki bago matapos an aldaw. Maski saen, mahahale an paggalang sa mga lalaki, asin an mga ini maaanggot sa saindang mga agom.

¹⁹Kaya kun pagmarahayon kan Mahal na Hade, magpaluwas ka nin sarong pagboot na si Vasti dai na nanggad makaatubang sa hade. An pagboot na ini iiba mo sa mga katogonan kan Persia saka Media tanganing dai mabago. Dangan itao mo an saiyang katongdan bilang reyna sa sarong mas marahay na babae.

²⁰Kun ipahayag na ini sa mahiwas na imperyong ini, igagalang kan mga babae an saindang mga agom, mayaman man o dukha.”

²¹An hatol na ini naoyonan kan hade asin kan saiyang mga opisyal; ginibo kan hade an hatol ni Memucan.

²²Pinadarahan niya nin surat an mga probinsya na sakop niya, an lambang probinsya sosog sa sadiring lengwahe asin paagi nin pagsurat, tanganing an lambang agom na lalaki iyo an magin kagurangnan kan sadiri niyang harong asin makapagtaram na may kapangyarihan.