Read Central Bicolano Esther 4 Bible Online

Esther 4 - Central Bicolano bible

Esther 4

¹Kan naaraman ni Mardokeo an gabos na ini, ginisi niya an saiyang gubing huli sa kamondoan. Nagsulot siya nin sako, nagbugtak nin abo sa payo, asin naglibot sa syudad. Makosog siyang naghaya saka mapait na nagtangis,

²sagkod na nakaabot siya sa agihan pasiring sa palasyo. Dai siya naglaog huli ta dai itinutugot na maglaog duman an nakagubing nin sako.

³Sa lambang probinsya na inabot kan pagboot asin dekreto kan hade, mapait na nagtangis an mga Judio. Nag-ayuno sinda, naghibi, naghaya asin an kadaklan sainda nagsulot nin sako dangan naghigda sa abo.

⁴Kan sabihan si Esther kan saiyang mga sorogoon na babae saka eunuko manongod sa ginigibo ni Mardokeo, napurisaw siya nin makuri. Nagpadara siya nin mga gubing ki Mardokeo tanganing sanglean kaini an sulot na sako, alagad dai kaini inako an mga gubing.

⁵Kaya ipinaapod ni Esther si Hatak an saro sa mga eunuko kan hade na itinalaga bilang sorogoon niya dangan pinagbotan niya si Hatak na magduman ki Mardokeo tanganing aramon an nangyayari asin dahelan kan kamondoan kaini.

⁶Nagduman si Hatak ki Mardokeo sa plasa kan syudad, na nasa atubangan kan trangkahan kan palasyo.

⁷Sinabi ni Mardokeo ki Hatak an gabos na pangyayari asin an bilog na kantidad kan kwarta na ipinangako ni Haman na ibubugtak sa kaban nin yaman kan hade kun magadan an gabos na Judio.

⁸Tinawan siya ni Mardokeo nin sarong kopya kan dekreto na pinaluwas sa Susa para sa paggadan kan mga Judio, tanganing ipahiling ki Esther. Pinakiolayan siya ni Mardokeo na ipaliwanag ki Esther an manongod sa dekreto, asin makiolay ini sa hade saka makimaherak para sa saiyang banwaan.

⁹Ginibo ini ni Hatak,

¹⁰asin itinao saiya ni Esther an mensaheng ini para ki Mardokeo:

¹¹“Gagadanon an siisay man, lalaki o babae, na lumaog sa pinakalaog na patyo asin umatubang sa hade na dai man ipinaapod. Iyan an katogonan; an lambang saro, magpoon sa mga parahatol kan hade sagkod sa mga tawo sa mga probinsya, nakakaaram kaiyan. Saro sana an paagi tanganing malikayan an katogonan na ini: kun iduta kan hade an saiyang bulawan na setro sa sarong tawo, maliligtas an buhay kan tawong iyan. Alagad sarong bulan na akong dai ipinapaapod kan hade.

¹²Kan makaabot ki Mardokeo an simbag ni Esther,

¹³pinasabihan niya ini: “Dai mo paghonaon na mas ligtas ka ki sa ibang Judio huli ta yaon ka sa palasyo kan hade.

¹⁴Kun mag-alo ka sa panahon na siring kaini, may maabot na tabang sa mga Judio hale sa langit, dangan ikakaligtas sinda, alagad magagadan ka asin mapapara an pamilya kan saimong ama. Alagad siisay an nakakaaram na tibaad nagin reyna ka para sa panahon na ini?”

¹⁵Ipinadara ni Esther ki Mardokeo an simbag na ini:

¹⁶“Lakaw asin tipona an gabos na Judio sa Susa. Mag-ayuno kamo asin mamibi para sako. Dai kamo magkakan o mag-inom nin anoman sa laog nin tolong aldaw saka banggi. Mag-aayuno man ako kaiba an sakong mga sorogoon na babae. Pakatapos, maduman ako sa hade maski tumang ini sa katogonan. Kun kaipuhan magadan ako sa paggibo kaini, mapagadan ako.”

¹⁷Naghale si Mardokeo asin ginibo an gabos na ipinapagibo saiya ni Esther.