Read Central Bicolano Esther 5 Bible Online

Esther 5 - Central Bicolano bible

Esther 5

¹Kan ikatolong aldaw isinulot ni Esther an gubing niya bilang reyna asin nagtindog siya sa pinakalaog na patyo kan palasyo, sa atubangan kan sala kan hade. Nasa laog an hade asin nagtutukaw sa saiyang trono, nakaatubang sa pintoan.

²Pakahiling niya ki Esther na nagtitindog sa patyo, naogma siya asin iginawgaw saiya an bulawan na setro. Nagdolok si Esther saka dinutaan an poro kan setro.

³Naghapot an hade, “Ano an kaipuhan mo, Reyna Esther? Sabihan sako an boot mo asin itatao ko maski an kabanga kan sakong imperyo.”

⁴Nagsimbag si Esther, “Kun pagmarahayon mo, Mahal na Hade, boot kong alokon ka saka si Haman ngunyan na banggi sa bangkete na inandam ko.”

⁵Nagsabi an hade, “Apodon tolos si Haman tanganing masunod an kamawotan ni Esther.” Kaya nagduman an hade saka si Haman sa bangkete.

⁶Mantang nag-iinom sinda nin arak, naghapot an hade ki Esther, “Sabihan sako an nasa boot mo asin makakamtan mo iyan. Itatao ko an saimong hagadon, maski an kabanga kan sakong imperyo.”

⁷Nagsimbag si Esther, “An sakong kahagadan iyo ini:

⁸kun nawilihan ako kan hade asin kun pagmarahayon niya na itao an sakong kahagadan saka otobon ini, boot kong alokon ka asin si Haman sa saro pang bangkete na aandamon ko sa aga para saindo. Sa aga, sisimbagon ko an hapot kan hade.”

⁹Maogma asin magayagayang nagluwas si Haman kan aldaw na idto. Alagad kan nahiling niya si Mardokeo sa trangkahan kan palasyo, na dai man lamang nagtindog o nagpahiling nin paggalang kan nag-agi siya, nag-init an saiyang payo.

¹⁰Alagad nagpugol siya kan sadiri. Nagpuli siya asin pag-abot sa harong ipinaapod niya an saiyang mga katood saka si Zeres na saiyang agom.

¹¹Ipinaghambog niya sainda an saiyang kayamanan, an dakul niyang mga aking lalaki, an haralangkaw na mga katongdan na itinao saiya kan hade asin an pagigin mas mahalaga niya ki sa ibang mga opisyal.

¹²Nagsabi pa si Haman, “Bako sana iyan, ako sana an inalok ni Reyna Esther tanganing mag-iba sa hade sa bangkete na inandam niya. Sa aga imbitado niya giraray ako kaiba kan hade.

¹³Alagad mayo nin halaga an gabos na ini sagkod na nahihiling ko na nagtutukaw sa trangkahan kan palasyo an Judio na si Mardokeo.”

¹⁴Kaya sinabihan siya kan agom niya asin kan saiyang mga katood, “Magpagibo ka nin bitayan na beynte y dos metros an langkaw, asin sa aga hagadon mo sa hade na bitayon duman si Mardokeo. Dangan maogma kang maduman sa bangkete kaiba an hade.” Naoyonan ini ni Haman, kaya nagpagibo siya nin bitayan.